‘தலைவர் தம்பி தலைமையில்’- திரைப்பட விமர்சனம்!

சென்னை:

ஜீவா ,பிரார்த்தனா நாதன், தம்பி ராமையா,இளவரசு, அனுராஜ், ஜென்சன் திவாகர், சர்ஜின் குமார், ஜெய்வந்த் ,ராஜேஷ் பாண்டியன்,அமித் மோகன், சுபாஷ் கண்ணன், ஷரத் ,சாவித்திரி மற்றும் பலர் நடித்துள்ள படம்தான் “தலைவர் தம்பி தலைமையில்”.

இப்படத்தின் கதையைப் பொருத்தவரையில்,

மாட்டிபுதூர் என்ற கிராமத்தில் பஞ்சாயத்து தலைவராக ஜீவா விளங்கி வருகிறார்.  அந்த கிராமத்தில் ஊராட்சி தேர்தல் நெருங்கி வருவதால் அவரது ஓட்டுக்கள் சிதறாமலும், மக்களிடம் நல்ல பெயர் வாங்கவும் அந்த கிராமத்து மக்களுடன் இணைந்து பலவித நன்மைகளையும் செய்து வருகிறார் . இந்த சூழலில் இந்த கிராமத்தில் வசிக்கும் இளவரசுவின் மகள் பிரார்த்தனாவுக்கு திருமணம் நடைபெற இருப்பதால், அதை நல்லபடியாக முடிக்க வேண்டும் என்று ஆர்வத்துடன் இளவரசுடன் இணைந்து செயல்படுகிறார் ஜீவா. ஆனால் இளவரசுவின் பக்கத்து வீட்டில் இருக்கும் தம்பி ராமையாவுக்கும் இளவரசுக்கும் முன் பகை இருப்பதால் அடிக்கடி சண்டை போட்டுக் கொள்கிறார்கள். ஆனாலும் ஜீவா அவர்கள் இருவரையும் சமாதானப்படுத்தி, திருமணத்திற்கு உண்டான பணிகளை மேற்கொள்கிறார் ஜீவா. அடுத்த நாள் காலை திருமணம் நடைபெற இருப்பதால் நாகர்கோவிலில் இருந்து மாப்பிள்ளை வீட்டார் ஒரு பேருந்தில் வந்து கொண்டிருக்கின்றனர்.

இந்த சூழ்நிலையில் பக்கத்து வீட்டில் இருக்கும் தம்பி ராமையாவின் தந்தை மாரடைப்பால இறந்து விடுகிறார். அதனால் ஜீவா,  தம்பி ராமையா வீட்டிற்கு சென்று தந்தை இறந்ததை நினைத்து துக்கம் விசாரித்து அடுத்த நாள் பக்கத்து வீட்டில் திருமணம் நடைபெற இருப்பதால் தந்தை உடலை வெளியே எங்காவது வைத்து அதற்கு உண்டான பணிகளை செய்யலாம் என்று அறிவுரை கூறுகிறார். ஆனால் தம்பி ராமையா முன் பகையின் காரணமாக அவரது மகளின் திருமணம் நாளை காலை 10.30 க்கு நடைபெறும் போது,  நானும் என் தந்தையின் இறுதி சடங்கை செய்து இங்கிருந்து தேரில் வைத்து அழைத்துச் செல்ல போகிறேன் என்று பிடிவாதம் பிடிக்கிறார். தன் மகள் திருமணம் தனது வீட்டில் தான் நடக்க வேண்டும், என்பதில் இளவரசுவும் உறுதியாக இருக்கிறார். இந்த இரண்டு குடும்பங்களையும் சமாதானப்படுத்தி, இரண்டு நிகழ்வுகளையும் சரியாக நடத்தும் பொறுப்பை ஏற்று பஞ்சாயத்து தலைவர் ஜீவா செயல்படும்போது,  இரு குடும்பமும் சமாதானம் ஆகாத நிலையில் பெரிய மோதல் ஏற்படுகிறது. இறுதியில்  பஞ்சாயத்து தலைவர் ஜீவா இந்தப் பிரச்சினைகளை எப்படி சமாளித்து  திருமணத்தையும், இறுதி ஊர்வலத்தையும்  நடத்தி வைத்தார்? என்பதுதான் “தலைவர் தம்பி தலைமையில்”. படத்தின் மீதிக் கதை.

நீண்ட இடைவெளிக்கு பிறகு ஜீவா நடித்திருக்கும் இப்படத்தில் ஆக்ஷன் காட்சிகள் அதிகம் இல்லாமல்  ஒரு நல்ல கதையை தேர்வு செய்து, தனது இயல்பான நடிப்பின் மூலம் முழு படத்தையும் தன் தோளில் சுமந்திருக்கிறார். நகைச்சுவை, அதிகாரம் ஆகியவற்றின் சரியான சமநிலையுடன் சிரித்துக் கொண்டே காரியத்தை சாதிக்கும் ஜீவாவின் நடிப்பு அபாரம். கதாநாயகியோடு காதல் காட்சிகளும் பாடல்களும் இல்லாமல் நடித்திருப்பது பாராட்டத்தக்கது. அந்த ஊரில் உள்ள அனைவரிடத்திலும் அன்பாகவும், அக்கறையாகவும், நட்பாகவும் பழகும் ஒரு கலகலப்பான கதாபாத்திரத்தில் களமிறங்கி நடித்திருப்பது படத்திற்கு பெரும் பலம் என்றுதான் சொல்லலாம்.

தம்பி ராமையா, இளவரசு இருவருமே குணசித்திர கதாபாத்திரத்தில் நடித்து இருந்தாலும்,  இப்படத்தில் இருவரும்  எப்படியெல்லாம் நடிப்புத் திறமையை காட்ட முடியுமோ… அப்படி எல்லாம் இந்தப் படத்தில் இருவருமே சரிக்கு சரியாக நடிப்பை சிறப்பாக வெளிப்படுத்தி அசத்தி  இருக்கிறார்கள்.

’பார்க்கிங்’ படத்தில் மகளாக வந்தவர் பிரார்த்தனா நாதன். இதில் மணமகள் கதாபாத்திரத்தில் எளிமையான அழகு மற்றும் அளவான எதார்த்தமான நடிப்பு மூலம் அனைவரையும் கவர்கிறார்.

ஜென்சன் திவாகர், சர்ஜின் குமார், ஜெய்வந்த், ராஜேஷ் பாண்டியன், அமித் மோகன், சுபாஷ் கண்ணன், சரத், சாவித்ரி என படத்தில் நிறையப் பேர் இருக்கிறார்கள். அவர்கள் அனைவரும் தங்களுக்கு கொடுத்த கதாபாத்திரத்தை உணர்ந்து சிறப்பாக நடித்திருக்கிறார்கள்.

இசையமைப்பாளர் விஷ்ணு விஜய் இசையில் பாடல்கள் கேட்கும் வகையில் உள்ளன.பின்னணி இசையும் படத்திற்கு பலம் சேர்த்திருக்கிறது.

பப்லு அஜ்ஜுவின் ஒளிப்பதிவில் இரவு நேர காட்சிகளை தன்னுடைய நேர்த்தியான காட்சிக்கோணங்களால்  அசத்தி இருக்கிறார்.

இயக்குநர் நித்திஷ் சகாதேவ், எதார்த்தமான வாழ்வியல் சம்பவங்களை மிக நேர்த்தியான காட்சிகள் மூலம் சுவாரசியமான திரைக்கதை அமைத்து, ஒரு சிறந்த பொழுதுபோக்கு திரைப்படமாக ரசிகர்களை சிரிக்க வைத்து இருக்கிறார். ஒவ்வொரு மனிதனுக்குள் இருக்கும் கொடூரதனத்தையும் பகைமைகளையும் அதனால் வெளிப்படும் சண்டைகளையும் வெளிச்சம் போட்டு, இயல்பான கதாபாத்திரங்களின் மூலம் இந்தப் படத்தில் காட்டி உள்ளார் இயக்குநர். அந்த கிராமத்தில் இரண்டு வீடுகளுக்கிடையே நடக்கும் சண்டைகளுக்கு இடையே தண்ணீர் தொட்டியைச் சுற்றி நடக்கும் காட்சிகளை நகைச்சுவையுடன் சொல்லி இருப்பது பாராட்டத்தக்கது.

மொத்தத்தில், ‘தலைவர் தம்பி தலைமையில்’ படம் காமெடி கலாட்டா.

ரேட்டிங் 3/5.

RADHAPANDIAN.