ஜியான் பிலிம்ஸ் சார்பில் சௌந்தர்யா ரஜினிகாந்த், எம்.ஆர். பி என்டர்டெயின்மென்ட் நிறுவனத்தின் சார்பில் மகேஷ் ராஜ் பசிலியான் தயாரித்திருக்கும் ‘வித் லவ்’ படத்தை எழுதி இயக்கியிருக்கிறார் மதன். இப்படத்தில் அபிஷன் ஜீவிந்த், அனஸ்வரா ராஜன், தேனி முருகன், கலைமாமணி சரவணன், ஹரிஷ் குமார், காவியா அனில் , சச்சின் நாச்சியப்பன், சாச்சனா ,ஆர் ஜே ஆனந்தி, டிம்பிள் கண்ணா, சித்தார்த் மற்றும் பலர் நடித்துள்ளனர்.
இப்படத்தின் கதையைப் பொருத்தவரையில்,
ஒவ்வொரு மனிதனும் வாலிப பருவத்தில் காதல் உணர்வைக் கடக்காமல் கண்டிப்பாக வந்திருக்க முடியாது. அந்த காதலை அறியாத, புரியாத மனிதர்கள் சிலர் இருந்தாலும் காதலை ரசிக்காமல் யாராலும் இருந்திருக்க முடியாது. கடந்த சில வருடங்களாக தமிழ் திரையில் கதையில் காதல் இருந்தாலும் ஒரு உன்னதமான காதல் கதை வருவது குறைவாக இருந்தது. அதை பூர்த்தி செய்யும் விதத்தில் வெளி வந்திருக்கும் படம்தான் ‘வித் லவ்’.
சென்னையில் பணிபுரியும் நாயகன் அபிஷன் ஜீவிந்திற்கு திருமணம் செய்து வைக்க அவருடைய சகோதரி ஆர்.ஜே.ஆனந்தி விரும்புவதால் பல இடங்களில் பெண் பார்த்துக் கொண்டிருக்கிறார். இந்த சூழலில் அபிஷன் ஜீவிந்தும், அனஸ்வரா ராஜனும் அவர்களது இரு வீட்டார் ஏற்பாட்டில் மணமுடிக்க பெண் பார்க்கும் படலமாக ஒரு ஹோட்டலில் தனியாக இருவரும் சந்தித்துக் கொள்கின்றனர். அங்கே அபிஷன் ஜீவிந்த் சந்திக்கும் பெண்ணான அனஸ்வரா ராஜனிடம் பேசத் தொடங்கும்போது, அவர்கள் இருவருக்குமே ஒரு பொதுவான ஏக்கத்துடன் இருப்பதை உணர்கிறார்கள். அப்போது இருவரும் தங்களைப் பற்றிய விபரங்களை பரிமாறிக் கொள்ளும் போது, தங்களது முதல் காதல் மற்றும் அதன் அனுபவத்தையும் பகிர்ந்து கொள்கிறார்கள். இருவரும் சந்தித்து பேசிக் கொண்டிருக்கும் நேரத்தில் அவர்களுக்கு ஒரு உண்மை புலப்படுகிறது. அவர்கள் இருவருமே ஒரே பள்ளியில் படித்தவர்கள் என்பது தெரிய வருகிறது.
அப்போது அவர்கள் இருவருமே அந்த பள்ளியில் படிக்கும்போது காதலில் விழுந்திருப்பது தெரிய வருகிறது. அதே சமயம் சந்தர்ப்பவசமாக தெரிந்தோ தெரியாமலோ இருவரின் காதலும் தோல்வி அடைந்துள்ளது. பழைய காதலை மறக்க முடியாமல் இருக்கும் இருவரும், நம்முடைய பழைய காதலன், காதலியைத் தேடி செல்வோம். அவர்கள் எப்படி இருக்கிறார்கள் என்பதை நாம் பார்த்துவிட்டு அதன் பின்பு நம்முடைய திருமணத்தை வைத்துக் கொள்ளலாம் என்று இருவரும் முடிவு செய்கிறார்கள். அபிஷன் ஜீவிந்த் தனது பள்ளிப் பருவக் காதலியையும், அனஸ்வரா ராஜன் தனது முன்னாள் காதலனையும் தேடிச் சென்று சந்திக்கத் திட்டமிடுகிறார்கள். அந்த தேடுதல் பயணத்தில் என்னவெல்லாம் நடக்கின்றன? இறுதியில் அவர்கள் இருவரும் தங்களது பழைய காதலியையும், காதலனையும் சந்தித்தார்களா? அபிஷன் ஜீவிந்த் யாரைத் திருமணம் செய்துகொண்டார்?என்பதுதான் “வித் லவ்” படத்தின் மீதிக் கதை.
இப்படத்தில் கதா நாயகனாக நடித்திருக்கும் அபிஷன் ஜீவிந்த், பள்ளிப் பருவம் மற்றும் இளமை பருவம் என இரண்டு தோற்றங்களுக்கும் கச்சிதமாக பொறுந்தி இருக்கிறார். அவர் தனது துள்ளனான நடிப்பின் மூலமாக அனைவரையும் ரசிக்க வைத்திருக்கிறார். டூரிஸ்ட் ஃபேமிலி படத்தின் மூலம் இயக்குநராக வெற்றி பெற்ற அவர் இந்தப்படத்தில் நடிகராகவும் வெற்றி பெற்றிருக்கிறார்.
அதேபோல் மோனிஷாவாக வரும் அனஸ்வரா ராஜனும் அந்தக் கதாபாத்திரத்தில் சற்றுச் சிந்திக்கத் தெரிந்த பெண்ணாக வந்து அலட்டிக் கொள்ளாமலேயே ரசிகர்களை கவர்கிறார். அவரது அழகிலும் நடிப்பிலும் அனைவரையும் ஈர்க்கிறார்.அவருடைய கதாபாத்திரப்படைப்பு நடிப்புத் திறமையை சிறந்த முறையில் வெளிப்படுத்தக் கூடிய வண்ணம் மிக சிறப்பாக அமைந்திருக்கிறது.
கதாநாயகன், கதாநாயகியின் முதல் காதலர்களாக நடித்திருக்கும் காவ்யா அனில், சச்சின் நாச்சியப்பன் ஆகியோரின் கதாபாத்திரங்கள் கதைக் கருவின் அடித்தளமாக அமைந்திருப்பதால், அதற்கேற்றவாறு நடிப்பு திறமையை வெளிப்படுத்தி இருக்கிறார்கள்.
கதாநாயகனின் சகோதரியாக நடித்திருக்கும் ஆர்.ஜே.ஆனந்தி, தந்தையாக நடித்திருக்கும் தேனி முருகன், பள்ளி ஆசிரியராக நடித்திருக்கும் சரவணன், நண்பர்களாக நடித்திருக்கும் ஹரிஷ் குமார், சித்தார்த், பள்ளி மாணவிகளாக நடித்திருக்கும் டிம்பிள் கண்ணா, சாச்சனா ஆகியோர் தங்களுக்கு கொடுத்த கதாபாத்திரத்தை உணர்ந்து நடித்திருக்கிறார்கள்.
ஸ்ரேயாஸ் கிருஷ்ணாவின் ஒளிப்பதிவில் கதையில் இருக்கும் காதலை காட்சிகளை தத்ரூபமாக மிக அருமையாக படமாக்கி இருப்பது பாராட்டதக்கது.
ஷான் ரோல்டனின் இசையில் பாடல்கள் அனைத்தும் கேட்கும் ரகம்தான். பின்னணி இசையின் மூலமும் தனது பலத்தை நிரூபித்து காட்டியுள்ளார்.
அறிமுக இயக்குநர் மதன், எழுதி இயக்கியிருக்கிறார். ஒரு மென்மையான காதல் உணர்வுகளை மையப்படுத்திய கதை எழுதி, இன்றைய தலைமுறையின் உறவுச் சிக்கல்களைத் தேவையற்ற ஆபாச காட்சிகள் மற்றும் அதிரடி சண்டைக் காட்சிகள் இல்லாமல் ஒரு அழகியலோடு இயக்கியுள்ளார். காதல் பற்றிய திரைப்படங்கள் எத்தனையோ வந்து கொண்டே இருந்தாலும் ஒரு சில திரைப்படங்கள்தான் நம் மனதை தொடுகின்றன. அந்த வரிசையில் தற்போதுள்ள காதலைப் பற்றி உணர்வுபூர்வமாக சொல்லியிருக்கும் ‘வித் லவ்’ அனைத்து ரசிகர்களின் மனதை வருடும் என்பதில் ஐயமில்லை.
மொத்தத்தில், ‘வித் லவ்’ காதலர்களுக்கு விருந்து.
ரேட்டிங் 3.5/5.
RADHAPANDIAN.