பிக்பாஸ் நிகழ்ச்சியினால் அறியப்பட்ட ராணவ், ரோஸ்மின், சம்பத் குமார், கஸ்தூரி, அர்ச்சனா, கிருத்திக் மோகன், அமிதா ரங்கநாத், ரவி மரியா மற்றும் பலர் நடித்திருக்கும் படம்தான் “பிரேக் ஃபாஸ்ட்”. இப்படத்திற்கு கதை எழுதி இயக்கி இருப்பவர் ஆர். காந்தி கிருஷ்ணா.
இப்படத்தின் கதையைப் பொருத்தவரையில்,
பெரும் கோடீஸ்வர தொழிலதிபரான சம்பத் ராஜின் மகளான நாயகி ரோஸ்மின், நன்கு படித்த, நேர்மையான கிராமத்து இளைஞனான ராணவுக்கு சரியான வேலை கிடைக்காமல் சாலை சுத்தம் செய்யும் பணியை செய்துக் கொண்டிருக்கும்போது தனது நிறுவனத்தில் வேலை கொடுக்கிறார். ராணவ்வுக்கு ரோஸ்மின் தன் நிறுவனத்தில் வேலை கொடுத்தாலும் இருவருக்கும் இடையே ஏற்பட்ட நட்பு காதலாக மாறுகிறது. தந்தை சம்பத் ராஜின் கடும் எதிர்ப்பையும் மீறி, ரோஸ்மின் ராணவ்வை திருமணம் செய்துக் கொண்டு அவரைத் தனது நிறுவனத்தின் நிர்வாக இயக்குநர் பதவியை உருவாக்கி கொடுத்து பணக்கார வசதியான வாழ்க்கையை அமைத்து கொடுக்கிறார்.
இவர்கள் இருவரும் காதல் திருமணம் செய்துக் கொண்டு வாழ்க்கையை நடத்தி வந்தாலும் ரோஸ்மின், ராணவ்வை மதிக்காமல் அகங்காரம், ஆணவத்தால் ஏற்படும் அவலங்களால், காதலர்களாக இருந்த போது இருந்த மகிழ்ச்சி, அன்பு, பாசமும் மறைந்து, மோதலும், வெறுப்பும், ஈகோவும் இருவருக்கிடையே ஏற்படுகிறது. இதனால் மனக்கசப்பு ஏற்பட்டு ரோஸ்மின்-ராணவ் இருவரும் பிரிகின்ற சூழல் ஏற்படுகிறது. பணக்காரப் பெண்ணும் ஏழைப்பையனும் காதலித்தால் அவர்களது நிலை என்னவாகும் என்பதை காதல் செய்து உடனே திருமணம், குடும்ப முரண்பாடுகள், விவாகரத்து என பல திருப்பங்களுடன் சொல்லி இருக்கும் படம்தான் “பிரேக் ஃபாஸ்ட்”
பிக்பாஸ் நிகழ்ச்சியினால் அனைவராலும் அறியப்பட்ட ராணவ்,இந்தப்படத்தின் கதாநாயகனாகி இருக்கிறார். தன் பெற்றோரை சரியாக கவனித்துக்கொள்ள முடியாமல் தவிக்கும் காட்சிகளிலும், திருமணத்துக்குப் பிறகு மனைவியின் அகங்கார நடவடிக்கைகளால் ஏற்படும் அதிர்ச்சி ஆகிய காட்சிகளிலும் மிக சிறந்த முறையில் உணர்வுகளை வெளிப்படுத்தி வரவேற்புப் பெறுகிறார்.
கதாநாயகியாக நடித்திருக்கும் அறிமுக நடிகை ரோஸ்மின், முதல் படத்திலேயே அழுத்தமான கதாபாத்திரத்தில் அளவாக நடித்து கவனம் ஈர்க்கிறார். பணக்காரப் பெண்களின் திமிர்த்தனத்தையும் ஆணவ குணத்தையும் சரியாக வெளிப்படுத்தி அனைவரின் வெறுப்பையும் சம்பாதிக்கிறார். இதனால் பணக்கார பெண்ணை திருமணம் செய்துக் கொள்ளும் அனைவரையும் பயமுறுத்த வைத்து இருக்கிறார்.
இந்தக்கதையின் இன்னொரு நாயகன், நாயகியாக நடித்திருக்கும் கிரித்திக் மோகன் – அமிதா ரங்கநாத் இருவரும் இளமைக்கேற்ற துள்ளல்கள் மற்றும் மோதல்கள் மூலம் தங்களுக்கு கொடுத்த கதாபாத்திரத்தின் தன்மையை உணர்ந்து மிக சிறப்பாக நடிப்பை வெளிப்படுத்தி இருக்கிறார்கள்.
பெரிய தொழிலதிபராகவும், மகளின் மீது மிகுந்த அன்பு கொண்ட தந்தையாகவும் சம்பத் ராஜ் மற்றும் அம்மாவாக தேசிய விருது பெற்ற நடிகை அர்ச்சனா, கதைக்கு ஏற்றவாறு மென்மையாகவும் இயல்பாகவும் தனது நடிப்பை சிறப்பாக வெளிப்படுத்தி இருக்கிறார். மருத்துவராக நடித்திருக்கும் கஸ்தூரியும் நடிப்பும் ரசிக்கும்படி உள்லது.
ஜி.வி.பிரகாஷ் இசையில் பாடல்கள் கேட்கும்படி இல்லை. பின்னணி இசையில் அவரது திறமை முழுமையாக வெளிப்படவில்லை.
ஒளிப்பதிவாளர் எம்.வி.பன்னீர்செல்வம் தனது ஒளிப்பதிவில் இப்படத்தின் காட்சிகளை கண்களுக்கு குளிர்ச்சியளிக்கும் விதத்தில் அமைத்திருக்கிறார்.
இயக்குனர் ஏ.ஆர். காந்தி கிருஷ்ணா, நீண்ட இடைவெளிக்குப் பிறகு மீண்டும் ‘பிரேக் பாஸ்ட்’ படத்தின் மூலம் கதை எழுதி இயக்குனராக வந்திருக்கிறார். தற்போதைய காலக்கட்டத்தில் காதல் திருமணம் செய்துக் கொள்ளும் தம்பதியினர் வாழ்க்கையில் ஏற்படும் வேதனைகளை யதார்த்தமாக சொல்லி, அவர்களிடையே ஏற்படும் பிரிவுக்கு காரணம் என்ன என்பதையும், இரண்டு குடும்பங்கள் மற்றும் அவர்களுடைய குணநலன்களும் சம்பந்தப்பட்டது என்பதையும் மிக தெளிவாக கதை எழுதி இயக்கி இருக்கிறார். சில காட்சிகள் கதைக்கு எந்தப் பயனும் அளிக்காமல், ரசிகர்களுக்கு வெறுப்பும் சங்கடமும் தரும் வகையில் அமைந்துள்ளன என்றாலும் நவீனகாலப் பிரிவுகளுக்கு பின் உள்ள உளவியல் நுணுக்கங்களை, இப்படம் மூலம் விவரித்து இருந்தால் கண்டிப்பாக ரசிகர்களை யோசிக்க வைத்து இருக்கும்.
மொத்தத்தில், ‘பிரேக்ஃபாஸ்ட்’ படம் காதலர்களை யோசிக்க வைக்கும்.
ரேட்டிங் 3/5.
RADHAPANDIAN.