’29’ திரைப்பட விமர்சனம்!

சென்னை:

ஸ்டோன் பெஞ்ச் ஸ்டுடியோ மற்றும் ஜி ஸ்குவாட் சார்பில் கார்த்திகேயன்.எஸ் மற்றும் லோகேஷ் கனகராஜ் இணைந்து தயாரித்திருக்கும் ’29’ என்ற  படத்தை எழுதி இயக்கியிருக்கிறார் ரத்னகுமார்.

இப்படத்தில் விது,ப்ரீத்தி அஸ்ராணி, அவினாஷ், மாஸ்டர் மகேந்திரன் ,சிந்து ஷியாம், பிரேம்குமார், ஆதிரா பாண்டிய லட்சுமி, ஆறுமுகவேல் , ஷெனஸ் பாத்திமா ,எஸ்ஏ சதீஷ்குமார், ஷாலினி, பிரியங்கா ராய், பிரதீப் ,அனுஸ்ரீவேலன் மற்றும் பலர் நடித்துள்ளனர்.

இப்படத்தின் கதையைப் பொருத்தவரையில்,

சேலத்தில்சத்யா என்கிற விது தனது 29-வது வயதில் எந்த ஒரு லட்சியமும், படித்த படிப்புக்கு ஏற்றவாறு எந்த  வேலையும் இல்லாமல் வீடு குடும்பம் என்று உழைத்துவிட்டு காலத்தைக் கடந்து விட்டதால் திருமணம் செய்துக் கொள்ளாமல் தனித்து நிற்கின்ற ஒரு வாலிபன் விதுவின் வயது.’29’ இந்த 29 வயதில் என்ன செய்வதென்று புரியாமல் தவித்துக் கொண்டிருந்தபோது சென்னையில் ஒரு கம்பெனியில் வேலை கிடைக்கிறது. அந்த கம்பெனியில் வேலை செய்துக் கொண்டிருந்த சூழலில் ப்ரீத்தி அஸ்ராணி அதே கம்பெனியில் புதிதாக வேலைக்கு சேர்கிறார். அவர் ஐஏஎஸ் தேர்வு எழுதி கலெக்டராக வர வேண்டும் என்ற முயற்சியில் ஈடுபட்டு கொண்டிருக்கும் சூழலில் ப்ரீத்தி அஸ்ராணி, விதுவுடன் நெருக்கமாக பழகுகிறார். அவர்களது நெருக்கம் காதலாக மாறுகிறது. தனதுவாழ்க்கையில் எதைப் பின்தொடர்வது என்று தெரியாமல் தடுமாறிக் கொண்டிருந்தபோது ப்ரீத்தி அஸ்ராணியின் காதல் அவரை மகிழ்ச்சி அடைய செய்கிறது. இந்த சமுதாய வாழ்க்கையில் தான் யார் என்று அடையாளச் சிக்கலில் தவிக்கும் விது ஒரு கட்டத்தில்  ப்ரீத்தி அஸ்ராணியின் காதலன் என்பதை ஒரு அடையாளமாக நினைத்து மகிழ்கிறார்.

29 வயதான விது காதலே வாழ்க்கை என்று நம்பி வாழும் சூழலில் காதலை தாண்டியும் ஒவ்வொருவர் வாழ்க்கையிலும் சாதிக்க வேண்டிய விஷயங்கள் நிறைய இருக்கிறது என்பதை பல விதத்தில் புரிய வைக்க முயற்சிக்கிறார் ப்ரீத்தி அஸ்ராணி. ஆனால், அந்த முயற்சி  முடியாமல் போக தன் காதலை முறித்துக்கொள்ள முடிவு செய்கிறார் ப்ரீத்தி அஸ்ராணி. இதனால் காலத்தின் சூழ்நிலையால் காதலை முறித்துக் கொண்ட ப்ரீத்தி அஸ்ராணி தான் ஐஏஎஸ் படித்து கலெக்டராக வர வேண்டும் என்ற கனவும், விதுவின் பாதுகாப்பற்ற மனநிலையும் அவர்களை வெவ்வேறு திசைகளுக்கு கொண்டு செல்கிறது. இறுதியில் விதுவின் வாழ்க்கையில் என்னவெல்லாம் நடக்கின்றன? ப்ரீத்தி அஸ்ராணி ஐஏஎஸ் படித்து தேர்வாகி கலெக்டர் கனவு நிறைவேறியதா? என்பதை சொல்வதுதான் “29” படத்தின் மீதிக் கதை.

’ரெட்ரோ’ படத்தில் வில்லனாக மிரட்டிய  விது இப்படத்தில் சத்யாவாக நடித்திருக்கிறார். அவர் தனது திருமண வயதைக் கடந்தாலும், அவரது முகத்தில் இனம் புரியாமல் ஏற்படும்  தாழ்வுணர்ச்சிக்கும் சோகத்திற்கும் ஏற்ற மாதிரி 29 வயதான தோற்றமும் உடல் மொழியும் நடிப்பும் மிக சிறந்த முறையில் அமைந்து இருக்கின்றன.  மிக எளிமையான தோற்றத்துடன் காதல் தோல்வியால் உடைந்து போகும் மனநிலை, காதலியை மீண்டும் சந்திக்க வேண்டும் என்ற ஏக்கம் ஆகியவற்றை மிகவும் இயல்பாக வெளிப்படுத்தியிருக்கிறார்.

இதில் ப்ரீத்தி அஸ்ராணி விஜயலட்சுமி என்கிற கதாபாத்திரத்தில் சத்யாவின் காதலியாக நடித்து படத்திற்குப் பெரும் பலம் சேர்த்திருக்கிறார். காதல் மட்டும் வாழ்க்கையில்லை என்று சொல்லி காதலனை வழிநடத்தும் காதலியாகவும் மிக சிறப்பாக தனது உணர்வுகளை வெளிப்படுத்தி இருக்கிறார்.

கதாநாயகனின் நண்பராக நடித்திருக்கும் அவினாஷுக்கும் காதல் இருக்கிறது.அது ரசிகர்களைச் சிரிக்க வைக்க உதவி செய்து இருக்கிறது.

சிறப்பு தோற்றத்தில் நடித்திருக்கும் மாஸ்டர் மகேந்திரன், கதாநாயகனின் அம்மாவாக நடித்திருக்கும் ஆதிரா பாண்டியலட்சுமி, கதாநாயகியின் அம்மாவாக நடித்திருக்கும் சிந்து ஷியாம் ஆகியோர் தங்களுக்கு கொடுத்த கதாபாத்திரங்களுக்கு ஏற்ப நடித்திருக்கிறார்கள்.

ஷான் ரோல்டனின் இசையில் பாடல்களும் வரிகளும் அனைவரையும் கவர்கின்றன. பின்னணி இசை காட்சிகளின் தன்மைக்கு ஏற்ப பயணித்து இருக்கிறது.

மாதேஷ் மாணிக்கம் ஒளிப்பதிவு பலரும் மறந்து போன கடற்கரை காதல் மற்றும் பேருந்து காதலை நினைவுப்படுத்தும் அளவிற்கு திரைக்கதைக்கு வலுச்சேர்த்துள்ளது.

இந்த சமுதாயத்தில் ஒவ்வொரு இளைஞனும் சுய  வாழ்க்கையில் தன் வயது. வேலை, காதல், திருமணம், குடும்ப பொறுப்பு மனப்போராட்டங்கள் என்ன என்பதை  மிக தெளிவாக வலிமையாக சொல்லி இருக்கிறார். வெறும் காதலை மட்டுமே வைத்து ஒவ்வொரு ஆணும் பெண்ணும் மகிழ்ச்சி அடைவது என்பது வாழ்க்கை அல்ல, அதையும்  தாண்டி லட்சியங்களும் நோக்கங்களும் கனவுகளும் வாழ்க்கையில் உள்ளன என்பதை சொல்வதற்கு ஒரு தெளிவு வேண்டும் என்கிற கருத்தை முன் வைத்து இந்த ’29’படத்தை இயக்கி வெற்றி பெற்றிருக்கிறார் இயக்குனர்  ரத்னகுமார்.

மொத்தத்தில், ‘29’  காதலர்களின் வாழ்க்கையை உணர்த்தும் படம்.

ரேட்டிங் 3.5/5.

RADHAPANDIAN.