வித்தியாசமான கதாபாத்திரங்களைத் தேர்ந்தெடுத்து தனது நடிப்புத் திறனை தொடர்ந்து வெளிப்படுத்தி வரும் நடிகை ஷாஷா சிவகுமார், தற்போது சஜீவ் பழூர் எழுதி இயக்கியுள்ள ‘என்ன விலை’ திரைப்படத்தில் முக்கிய கதாபாத்திரத்தில் நடித்துள்ளார்.
வரும் செப்டம்பர் 17ஆம் தேதி உலகம் முழுவதும் திரையரங்குகளில் வெளியாகும் இப்படத்தில், ஷாஷா சிவகுமார் முதன்முறையாக கிராமப்புறப் பெண்ணாக ‘மணிமேகலை’ என்ற கதாபாத்திரத்தில் நடித்துள்ளார். தனக்கு முற்றிலும் புதிதான இந்த கதாபாத்திரத்தை சிறப்பாக வெளிப்படுத்துவதற்காக, படப்பிடிப்பு தொடங்குவதற்கு முன்பே அதற்கான தயாரிப்புகளை மேற்கொண்டதாக அவர் தெரிவித்துள்ளார்.
மணிமேகலை கதாபாத்திரம் குறித்து ஷாஷா சிவகுமார் கூறுகையில், “மணிமேகலை எனக்கு மிகவும் நெருக்கமான மற்றும் சிறப்பான கதாபாத்திரம். இதுவரை நான் ஏற்றிராத வகையில், முதன்முறையாக ஒரு கிராமப்புறப் பெண்ணாக இதில் நடித்துள்ளேன். படப்பிடிப்புத் தளத்திற்குச் செல்வதற்கு முன்பே கதாபாத்திரத்தைப் புரிந்துகொண்டு அதற்கேற்ப என்னைத் தயார்படுத்திக் கொண்டேன். அது கதாபாத்திரத்தை இயல்பாக அணுகுவதற்கு பெரிதும் உதவியது. முற்றிலும் புதிய சூழலில் பணியாற்றிய இந்த அனுபவம் எனக்கு மகிழ்ச்சியையும் நிறைய கற்றலையும் அளித்துள்ளது” என்றார்.
‘என்ன விலை’ திரைப்படத்தில் கருணாஸ் மற்றும் நிமிஷா சஜயன் ஆகியோருடன் இணைந்து நடித்த அனுபவத்தையும் ஷாஷா சிவகுமார் பகிர்ந்து கொண்டுள்ளார்.
“கருணாஸ் சார் சிறந்த நடிகர். நிமிஷா மிகவும் திறமையானவர் மட்டுமின்றி, தனது பணியில் மிகுந்த அர்ப்பணிப்புடன் செயல்படுபவர். அவர்களைப் போன்ற திறமையான நடிகர்களுடன் இணைந்து பணியாற்றும்போது, நம்முடைய பங்களிப்பிலும் கூடுதல் பொறுப்புணர்வு ஏற்படுகிறது. அவர்களுடன் இணைந்து நடித்தது சிறந்த அனுபவமாக இருந்தது” என்று அவர் தெரிவித்துள்ளார்.
இப்படத்தின் மூலம் மலையாளத் திரையுலகைச் சேர்ந்த பல கலைஞர்களுடன் முதன்முறையாக இணைந்து பணியாற்றியதாகவும் ஷாஷா கூறியுள்ளார்.
“இயக்குநர் சஜீவ் சார் படப்பிடிப்புத் தளத்தில் அனைவரிடமும் மிகவும் பொறுமையாகவும் மரியாதையுடனும் நடந்து கொண்டார். மலையாளத் திரையுலகைச் சேர்ந்த கலைஞர்களுடன் நான் முதன்முறையாக பணியாற்றியிருக்கிறேன். எனவே, ‘என்ன விலை’ எனக்கு ஒரு வித்தியாசமான பணிச்சூழலையும், அதே நேரத்தில் நிறைய கற்றுக்கொள்ளும் வாய்ப்பையும் வழங்கியது” என்றார்.
சமூக அக்கறை கொண்ட கதைக்களத்தில் உருவாகியுள்ள ‘என்ன விலை’ திரைப்படம், ராமேஸ்வரம் அருகே கடலில் பக்தர்கள் காணிக்கையாகச் செலுத்தும் நாணயங்களை மீட்டு தனது வாழ்வாதாரத்தை நடத்தும் ஒருவரின் வாழ்க்கையை மையமாகக் கொண்டுள்ளது.
வாழ்வாதாரத்திற்காக அவர் எதிர்கொள்ளும் சவால்கள், கண்ணியத்துடன் வாழ்வதற்கான அவரது போராட்டம் ஆகியவை பின்னர் முக்கியமான சட்டப் போராட்டமாக மாறும் விதத்தில் கதை நகர்கிறது.
இப்படத்தில் கருணாஸ், நிமிஷா சஜயன், ஷாஷா சிவகுமார், விஜயலட்சுமி வீரமணி, சித்தா தர்ஷன், பூர்ணிமா பாக்யராஜ், ஒய்.ஜி. மகேந்திரன், மொட்ட ராஜேந்திரன், நிழல்கள் ரவி, பிரவீணா, மோகன் ராம், சேத்தன் குமார், கவிதாலயா கிருஷ்ணன், கமலேஷ், கோலி சோடா பாண்டி, ஜே.எஸ். கவி, சுவாமிநாதன், தீபா சங்கர், கவி நக்கலைட்ஸ் உள்ளிட்ட பலர் நடித்துள்ளனர்.
சஜீவ் பழூர் எழுதி இயக்கியுள்ள இப்படத்தை கலாமயா ஃபிலிம்ஸ் சார்பில் ஜிதேஷ் வி தயாரித்துள்ளார். சாம் சி.எஸ். இசையமைத்துள்ள இப்படத்திற்கு ஆல்பி ஆண்டனி ஒளிப்பதிவு செய்துள்ளார். படத்தொகுப்புப் பணிகளை ஸ்ரீஜித் சாரங் மேற்கொண்டுள்ளார். சமூக அக்கறை கொண்ட கதைக்களம், வலுவான கதாபாத்திரங்கள் மற்றும் திறமையான நட்சத்திரப் பட்டாளத்துடன் உருவாகியுள்ள ‘என்ன விலை’ திரைப்படம் செப்டம்பர் 17ஆம் தேதிஉலகம் முழுவதும் திரையரங்குகளில் வெளியாகிறது.