தமிழ்த் திரைப்பட இசைக் கலைஞரர்களின் சங்கம் இந்தியாவின் முதல் திரைத்துறை சங்கம் என்று பெருமைமிகு சங்கமாக விளங்குகிறது. இந்தச் சங்கத்தின் பல ஆண்டுகாலக்கனவு தங்களது இடத்தில் ஒரு பிரமாண்டமான கட்டடம் அமைத்து, அதில் வரும் வருமானத்தில் தங்களது உறுப்பினர்களின் வாழ்வாதாரத்தை உயர்த்தும் வகையில் ஏதாவது செய்ய வேண்டும் என்பதுதான். அதற்காக இன்றைய தலைவர், செயலாளர், பொருளாளர் மற்றும் உறுப்பினர்கள் ஏக மனதாக முடிவெடுத்து மாயாபஜார் ஹப் என்ற நிறுவனத்தை அணுகி அதற்கான ஒப்பந்தத்தை செய்துள்ளனர்.
தனது பல ஆண்டுகால அனுபவத்தை முன்னிறுத்தி சென்னை திரை இசைச் சங்கம் மற்றும் அறக்கட்டளைக்குச் சொந்தமான இடத்தில் மாபெரும் வணிக வளாகம் அமைத்து, அதில் திரையுலகப் பயன்பாட்டிற்குத் தேவையான அனைத்து நவீன வசதிகளும் செய்து கொடுக்க முடிவெடுத்தனர்.
இந்த பத்து மாடி கட்டடத்தைக் கட்ட திரைப்பட இசைக்கலைஞர்கள் சங்கம் சார்பில் மாபெரும் இசை நிகழ்ச்சிகள் சென்னை, ஹைதராபாத், அகமதாபாத் ,சிங்கப்பூர் மற்றும் துபாய் நகரங்களில் நடத்தி, அதில் வரும் வருமானத்தில் இந்தத் திட்டத்தைச் செயல்படுத்த உள்ளனர். இந்தத் திட்டத்திற்கு அனைத்து தமிழ்த் திரைப்பட இசையமைப்பாளர்களும் ஒன்றிணைந்து தங்கள் சங்கத்திற்காக இலவசமாக இந்நிகழ்ச்சியை சிறப்புடன் நடத்தித்தர முன்வந்துள்ளனர்.
இம்மாபெரும் நிகழ்ச்சி டிசம்பர் மாதம் சென்னையில் மிக பிரமாண்டமாக நடக்க இருக்கிறது. அதற்காகத் தமிழக முதல்வர் திரு ஜோசப் விஜய் அவர்களிடம் அனுமதி பெறத் திரை இசை சங்கத்தினர் முயற்சி செய்து வருகின்றனர். இந்த மாபெரும் நிகழ்ச்சி வெகு விமரிசையாக நடக்கத் தமிழ்த்திரை இசைக்கலைஞர்கள் சங்கம் தனது முன்னெடுப்புகளைத் தொடங்கிவிட்டது.
இதை முன்னிட்டு இசைக் கலைஞர்களின் ஒன்று கூடுகை இசையமைப்பாளர் கங்கை அமரன் தலைமையில் சென்னையில் ஒரு நட்சத்திர ஹோட்டலில் நேற்று மாலை நடைபெற்றது.இதில் தமிழ் திரை இசைக் கலைஞர்கள் சங்கத்தைச் சேர்ந்த முன்னணிப் பொறுப்பாளர்கள் கலந்து கொண்டனர். இசையமைப்பாளர்கள் தேவா, பரத்வாஜ் ,எஸ் ஏ ராஜ்குமார்,யுவன் சங்கர் ராஜா போன்றோருடன் தென்னிந்திய திரைப்படத் தொழிலாளர் சம்மேளனத் தலைவர் ஆர் கே செல்வமணி, இயக்குநர் சங்கச் செயலாளர் ஆர்.வி. உதயகுமார், தெனிந்திய நடிகர் சங்கத் தலைவர் நாசர் மற்றும் தயாரிப்பாளர்கள் டி .சிவா, ஜி. தனஞ்செயன் போன்றவர்களும் கலந்து கொண்டனர்.அவர்கள் அனைவரும் இந்தக் கனவுத் திட்டம் சிறப்பாக வெற்றி பெற வேண்டும் என்று வாழ்த்தியதுடன் தங்கள் ஒத்துழைப்பு நிச்சயம் உண்டு என்றும் நம்பிக்கை தெரிவித்தனர்.