டிராவிட் செல்வம் ( பரிதாபங்கள் புகழ்), சித்தி இத்னானி, அஞ்சலி நாயர், தேவதர்ஷினி, சினிமா வாலா சதீஷ், குரேஷி, ஆர் ஜே தீபக், சசி செல்வராஜ் மற்றும் பலர் நடித்துள்ள படம்தான் “டிரோன்ஸ்”. இப்படத்தை ராகவ் மிர்தாத் எழுதி இயக்கி உள்ளார்.சேது மாதவன் ஒளிப்பதிவு செய்துள்ளார்.எஸ் ஆர் ஹரி இசையமைத்துள்ளார்.
இப்படத்தின் கதையைப் பொருத்தவரையில்,
கதாநாயகன் டிராவிட் செல்வம்,ஒரு நாயகி அஞ்சலி நாயர், நடிகர் தீபக் ஆகிய மூவரும் கல்லூரி மாணவர்கள். அவர்கள் கல்லூரியில் செய்த தவறுகளால் இடைநீக்கம் செய்யப்படுகிறார்கள். தங்களை இடை நீக்கம் செய்த விஷயம் பெற்றோர்களுக்கு தெரியாமல் இருக்க பிளாக் ஹோல் எனப்படும் ஓர் அறிவியல் ஆய்வுக்கூடத்தில் தங்குகின்றனர். அந்த அறிவியல் ஆய்வுக் கூடத்திற்கு சென்ற இவர்கள் மூவரும் வெளியே வர முடியாத சூழலில் மாட்டிக் கொள்கிறார்கள். அவர்கள் அந்த அறிவியல் ஆய்வுக் கூடத்திலிருந்து வெளியே செல்ல முயன்றாலும் முடியாத சூழலில் அங்குள்ள டிரோன் (பறக்கும் தட்டு) ஒன்றின் மூலம் வெளி உலகத்தைப் பார்க்கிறார்கள்.
அப்போது கன்னக் குழியழகி அழகு தேவதை போன்ற தோற்றத்தில் இருக்கும் சித்தி இத்னானியை அனைவரும் பார்க்கிறார்கள். அவரைப் பார்த்ததும் அவர் மீது டிராவிட் செல்வத்திற்கு காதல் ஏற்படுகிறது. இந்தக் காதலை சித்தி இத்னானியின் சூனியக்காரி பாட்டி தேவதர்ஷினி எதிர்க்கிறார். ஒரு கட்டத்தில் டிராவிட் செல்வம், தீபக் ஆகிய நண்பர்களை தனது மாயக் கோட்டைக்குள் அடைத்து வைக்கிறார் சூனியக்காரி பாட்டி தேவதர்ஷினி. இன்னொரு பக்கம், நகரத்தில் அடுத்தடுத்து மர்மக் கொலைகளைச் செய்யும் சைக்கோ கொலைகாரனைப் பிடிக்கக் காவல்துறை தீவிரமாக முயற்கி செய்யும்போது காவல்துறை அதிகாரியான சினிமாவாலா சதிஷ், அஞ்சலி நாயர் இருவரும் அந்த மாயக் கோட்டை க்குள் செல்கிறார்கள்.
அப்போது சினிமாவாலா சதிஷ், சித்தி இத்னானியின் அழகில் மயங்கி அவரை காதலிக்க ஆசைபடுகிறார். ஆனால் அந்த அழகி சித்தி இத்னானிக்குள் ஒரு மர்மமும் மறைந்து இருப்பதை தெரியாமல், அதாவது அந்த சூனியக்காரியும் அவருக்குள்ளே ஒளிந்து இருப்பதை புரியாமல் காதலிக்கிறார். இறுதியில் அந்த சூனியக்காரி பாட்டி தேவதர்ஷினியிடம் சினிமாவாலா சதிஷ் மாட்டிக் கொண்டாரா? சித்தி இத்னானி யாரை திருமணம் செய்துக் கொண்டார்? அந்த இளைஞர்களின் கதி என்ன ஆனது? என்பதுதான் “டிரோன்ஸ்’ படத்தின் மீதிக் கதை.
கதாநாயகனாக நடித்திருக்கும் டிராவிட் செல்வம், இதுவரை பிற படங்களில் சின்னச்சின்ன கதாப் பாத்திரங்களில் வந்தாலும், இதில் கதாநாயகன் நிலைக்கு உயர்ந்துள்ளார். நடனம், காதல் காட்சிகள், நகைச்சுவை எனத் தனக்குக் கிடைத்த வாய்ப்பைச் சிறப்பாகப் பயன்படுத்தியிருக்கிறார்.
இப்படத்தில் கதாநாயகியாக நடித்திருக்கும் கன்னக் குழியழகி சித்தி இத்னானி, தோற்றத்தில் ஒரு அழகு தேவதையைப் போல வந்து கன்னத்தில் குழி விழுந்து ரசிகர்கள் ரசிக்கும் விதத்தில் தனது முகபாவங்களை மாற்றி நடிப்பிலும் அசத்தி இருக்கிறார். சில காட்சிகளில் வெவ்வேறு உணர்வுகளுடன் நடிப்பை வெளிப்படுத்தி வியக்க வைத்து இருக்கிறார்.
மற்றொரு கதாநாயகியாக நடித்திருக்கும் அஞ்சலி நாயர், தனது கதாபாத்திரத்தை உணர்ந்து மிக சிறப்பாக நடித்திருக்கிறார்.
சூனியக்காரியாக நடித்திருக்கும் தேவதர்ஷினி இதுவரையில் நடித்திராத ஒரு வித்தியாசமான கதாபாத்திரத்தை தேர்வு செய்து, மிரட்டல், நகைச்சுவை, கோபம் எனப் பல உணர்வுகளைக் கலந்து அந்தக் கதாபாத்திரத்துக்கு உயிர் கொடுத்து மிக சிறப்பாக நடித்திருப்பதை பாராட்ட வேண்டும்.
காவல் துறை அதிகாரியாக நடித்திருக்கும் சினிமாவாலா சதீஷ், விசாரணை போலீஸ் அதிகாரியாக வந்தாலும் அவர் நகைச்சுவையும் செய்திருக்கிறார். ஆர்.ஜே.தீபக் ,குரைஷி மற்றும் சசி செல்வராஜ் ஆகியோரும் கொடுத்த பணியை குறை இல்லாத விதத்தில் தங்களது பங்களிப்பை அனைவரும் ரசிக்கும்படி செய்துள்ளார்கள்.
ஜெயந்த் சேது மாதவனின் ஒளிப்பதிவு படத்தின் கற்பனை உலகத்தை மிக அழகாக சிறியவர்களும், பெரியவர்களும் ரசிக்கும்படி பணியாற்றியிருக்கிறார்.
ஹரி எஸ்.ஆர்.இசையமைத்திருக்கிறார். இந்தக்கதைக் களத்துக்கு பின்னணி இசை முக்கியம் என உணர்ந்து கடுமையாக உழைத்திருக்கிறார்.
‘பன் பட்டர் ஜாம்’ படத்தின் மூலம் அனைவரது கவனத்தையும் பெற்ற இயக்குநர் ஆர்.ராகவ் மிர்தாத் இந்தப்படத்தை எழுதி இயக்கியுள்ளார். சிறுவயதில் குடும்பத்தில் உள்ள பெரியோர்கள் சூனியக்கார கிழவி, பறக்கும் தட்டு, அழகு தேவதை, ஒரு அரக்கன் என்று பல்வேறு கதைகளை சொல்வார்கள். அதை தற்போதுள்ள கால கட்டத்திற்கு ஏற்றவாறு அறிவியல் நிகழ்வுகளையும், எங்கும் நிறைந்திருக்கும் வான்வழி வாகனமான ட்ரோனையும் மையமாக வைத்துக் கொண்டு சிறுவர்கள் முதல் பெரியவர்கள் வரை, என அனைத்து தரப்பினரும் ரசிக்கக் கூடிய ஒரு கலகலப்பான படத்தை கொடுத்ததில் இயக்குனரை கண்டிப்பாக பாராட்ட வேண்டும்.
மொத்தத்தில் ‘டிரோன்ஸ்’ அனைவரும் ரசிக்கக் கூடிய ஒரு பொழுது போக்குப் படம்.
ரேட்டிங் 3/5.
RADHAPANDIAN.