‘பிரேமலு’ – திரைப்பட விமர்சனம்!

சென்னை:

மலையாள புகழ் நஸ்லேன், மமீதா பைஜு, அல்தாப் சலீம், ஷ்யாம் மோகன், அகிலா பார்கவன், மீனாட்சி ரவீந்திரன் உள்ளீட்ட நட்சத்திரங்களின் நடிப்பில் கிரிஷ் இயக்கத்தில் மலையாளத்தில் வெளிவந்த திரைப்படம் தான் ‘பிரேமலு’. பொதுவாக மலையாள திரையுலகில் தற்போது நல்ல கதையம்சம் கொண்டபடங்கள் பல வெளியாகின்றன.அப்படி ஒரு சிறந்த பொழுதுபோக்கு மற்றும் நல்ல காதல் கதையம்சம் கொண்ட படம் தான் ‘பிரேமலு’ இந்த படம் மலையாளத்தில் மாபெரும் வெற்றி படம். இந்த படம் தற்போது தமிழில் வெளியாகியுள்ளது. எல்லா தியேட்டர்களிலும் வெற்றிகரமாக ஓடிக் கொண்டிருக்கும் இப்படத்தின் கதையைப் பொறுத்தவரையில்,

கல்லூரி படிக்கும் காலங்களில் ஒரு பெண்ணை ஒரு தலை காதலாக காதலித்து வருகிறார் நாயகன் நஸ்லேன். கல்லூரி காலம் முடிவடையும் நேரத்தில் அந்த பெண்ணிடம் காதலைக் கூற, அவளோ எனக்கு யாரையும் காதலிக்க விருப்பமில்லை… என்று சொல்லி அவரை விட்டு விலகிச் செல்ல அந்த காதல் தோல்வியில் முடிவடைகிறது. இதனால் வெறுப்படைந்த நஸ்லேன், அந்த சோகத்தில் இருந்து வெளியேற படிப்பு முடிந்து லண்டன் போக முயற்சிக்கிறார். வெளிநாட்டில் பணிக்குச் செல்ல முயற்சித்து வரும் சமயத்தில் கோர்ஸ் ஒன்று படிப்பதற்காக ஹைதராபாத் செல்கிறார் நஸ்லேன். அங்கு ஒரு திருமண நிகழ்வில் சாப்ட்வேர் துறையில் பணியில் இருக்கும் நாயகி மமீதா பைஜுவை சந்திக்க,  அவர் மீதும் நஸ்லெனுக்கு காதல் ஏற்படுகிறது. அதனால் சென்னைக்கு போக நினைத்த நாயகன், காதலுக்காக ஐதராபாத்திலேயே தங்கி விடுகிறார்.

தனது காதலை கதாநாயகியின் தோழியிடம்  நஸ்லென் தெரிவிக்க, அவரோ கதாநாயகி மமீதா பைஜு எதிர்ப்பார்க்கும் எந்த தகுதியும் உன்னிடத்தில் இல்லை, அதனால் உனது காதலை மமீதா பைஜு  கண்டிப்பாக ஏற்றுக்கொள்ள மாட்டார் எனக் கூறி விடுகிறார். காரணம் மமீதா பைஜு எந்த ஒரு விஷயத்தையும் சீரியஸாக எடுத்துக் கொள்ளாமல், யாருக்கும் பயப்படாமல், தனக்கு பிடித்தமான செயலை மட்டும் செய்து கொண்டு தனது வாழ்க்கையை மகிழ்ச்சியாகவும், ஜாலியாகவும்  வாழ்ந்து வருகிறார். இந்த சூழலில் மமீதா பைஜுவுடன் அலுவலகத்தில் பணிபுரியும் நண்பரான ஷ்யாம் மோகனும், மமீதா பைஜுவுக்கும் உறவில் இருப்பதாகவும் அவரது அலுவலகத்தில் உள்ளவர்கள் சொல்வதால் மனம் வெறுத்துப் போய் ஒன்றும் புரியாமல் தவிக்கிறார் நஸ்லேன். இந்த சூழ்நிலையில்  நஸ்லேன் காதலித்த மமீதா பைஜுவை தன் காதல் வலையில் சிக்க வைத்தாரா/ இல்லையா? என்பதுதான் ‘பிரேமலு’ படத்தின் மீதிக் கதை.

இந்த பிரேமலு  திரைப்படத்தில் கதாநாயகனாக நஸ்லென் நடித்திருக்கிறார். சில மலையாள  திரைப்படங்களில் கதாநாயகனின் நண்பர் கதாபாத்திரத்தில் நடித்த  நஸ்லென், தற்போது மிகப்பெரிய அளவில் வெற்றி பெற்று இந்த திரைப்படத்தின் மூலம் கதாநாயகனாக நடித்து  அனைத்து மொழி ரசிகர்களிடம் மிகப்பெரிய அளவில்  வரவேற்பு பெற்றிருக்கிறார்.

கதாநாயகி மமீதா படத்தின் கதாபாத்திரத்தை உணர்ந்து மிகவும் சிறப்பாக நடித்து வெற்றி பெற்றிருக்கிறார். அவரது க்யூட்டான காட்சிகள் படத்தினை அதிகமாகவே ரசிக்க வைத்திருக்கிறது. அநேக இடங்களில் இவரது காட்சிகள் நன்றாக கைகொடுத்திருக்கிறது. கண்டிப்பாக  இவருக்கு தமிழ் சினிமாவில் தொடர்ந்து பல படங்களில் நடிக்க அதிக வாய்ப்புக்கள் வரும் என்பதில் ஐயமில்லை.

கதாநாயகனின் நண்பனாக நடித்திருக்கும் சங்கீத் பிரதாப், தனது காமெடி மூலம் அனைவரது கவனத்தையும் ஈர்க்கிறார். கதாநாயகனின் காதலுக்கு வில்லனாக வந்தாலும் ஷ்யாம் மோகனின் வில்லத்தனம், இறுதிக் க்ட்ட காட்சியில் அனைவரையும்  சிரிக்கவும் வைக்கிறது. கதாநாயகியின் தோழியாக நடித்திருக்கும் அகிலா பார்கவன், மீனாட்சி ரவீந்திரன், அலுவலக தோழர்களாக நடித்திருக்கும் சமீர் கான், அல்தாப் சலீம் என மற்ற வேடங்களில் நடித்திருப்பவர்களும் திரைக்கதைக்கு பலம் சேர்க்கும் வகையில் நடித்திருக்கிறார்கள்.

பின்னணி இசையும் சரி,  பாடல்களும் சரி இவை  இரண்டும் படத்திற்கு பெரிதாகவே பலம் சேர்த்திருக்கிறது.

ஒளிப்பதிவாளர் அஜ்மல்பாபு, சென்னை,ஐதராபாத் போன்ற பெருநகரங்களையும் ஆந்திர,கேரள கிராமங்களையும் அழகாகக் காட்சிப்படுத்தியிருக்கிறார்.திரைக்கதையின் ஓட்டத்துக்கு அவருடைய காட்சிகள் பெரும் பலமாக அமைந்திருக்கின்றன.

கிரண்ஜோஷியுடன் இணைந்து எழுதிய கதை,திரைக்கதை எழுதி தனியாக இயக்கியிருக்கிறார் கிரிஷ்.ஏ.டி. நாம் பார்த்துப் பழகிய காதல் கதையை புதிதாகப் பார்க்கிற மாதிரி இரசிக்க வைத்திருப்பது அவருடைய பலம். காதல் படங்களுக்கே உரித்தான சோக பாடல்கள் உள்ளிட்ட வழக்கமான பாணியை தவிர்த்துவிட்டு, காட்சிகள் அனைத்தையும் ஜாலியாகவும், காமெடியாகவும் வடிவமைத்து இளைஞர்கள் ரசிக்கும் விதத்தில் மிக சிறப்பாக இயக்கி இருக்கிறார் இயக்குனர் கிரிஷ்.ஏ.டி. இப்படத்தில் வரும் ஒரு காட்சியில் கதாநாயகன் வீட்டிற்கு அருகே உள்ள கதாநாயகி தனது வீட்டிலிருந்து அழைக்கும்போது, “ஏய் அவ துணியை தூக்கிக் காட்டறா பாரு” என்ற காட்சியில் தியேட்டரே கைத்தட்டலில் அதிர்கிறது. இந்த ‘பிரேமலு’ திரைப்படத்தை  கல்லூரி இளைஞர்கள் கொண்டாடும் கலகலப்பான காதல் படமாக இயக்கி இருப்பதை கண்டிப்பாக பாராட்டலாம்.

மொத்தத்தில் ‘பிரேமலு’ படம் காதலர்கள் ரசிக்க வேண்டிய ஒரு ஜாலியான படம்.

ரேட்டிங் 3.5/5.

RADHAPANDIAN.