‘இடி மின்னல் காதல்’ திரைப்பட விமர்சனம்!

சென்னை:

சிபி, பவ்ய திரிகா, யாஸ்மின் பொன்னப்பா, ராதா ரவி, பாலாஜி சக்திவேல், ஜெகன், ஜெயதித்யா, வின்சென்ட் நகுல், மனோஜ் முல்லத், மற்றும் பலர் நடித்திருக்கு படம்தான் ‘இடி மின்னல் காதல்’ இப்படத்தை பாலாஜி மாதவன் எழுதி இயக்கி இருக்கிறார்.  மாறுபட்ட திரைக்கதையில் பரபரப்பான எமோஷனல் டிரமாவாக உருவாகியுள்ள படம் ‘இடி மின்னல் காதல் ’.

இப்படத்தின் கதையைப் பொறுத்தவரையில்,

இன்னும் ஒரு சில தினங்களில் அமெரிக்காவுக்கு செல்ல இருக்கும் கதாநாயகன் சிபி கதாநாயகி பவ்யா த்ரிகாவுடன் காரில் ஜாலியாக சிரித்து பேசிக் கொண்டு வரும்போது தன்னிலை மறந்து கதாநாயகிக்கு முத்தம் கொடுக்கும்போது ரோட்டில் திடீரென்று குறுக்கே வந்த ஹிருதேஷ் என்பவர் மீது கார் மோதி அவர் இறந்துவிடுகிறார். தன்னை அறியாமல் நடந்த விபத்து என்றாலும். ஒரு உயிர் தன்னால் நிகழ்ந்த விபத்தினால் பலியானதை நினைத்து கதாநாயகன் சிபி மனதளவில் மிகப்பெரிய அளவில் பாதிக்கப்படுகிறார். ஒரு உயிர் பலியானதை நினைத்து சிபி வருத்தப்பட்டாலும், அவர் அமெரிக்கா செல்வதற்கான அனைத்து உதவிகளையும் காதலி பவ்யா த்ரிகா செய்து வருகிறார். இந்த சூழ்நிலையில் உயிரிழந்த ஹிருதேஷின் மகன் ஆதித்யா தனது அப்பா இறந்ததை ஏற்றுக்கொள்ள முடியாமல் மன அழுத்தத்திற்கு ஆளாகிறார். அவருக்கு பாலியல் தொழிலாளி யாஷ்மின் பொன்னப்பா ஆதரவளிக்க, இறந்து போனவர் வாங்கிய கடனுக்காக அவருடைய மகன் ஆதித்யாவை தாதா வின்சென்ட் நகுல்  கடத்திச் செல்ல முயற்சிக்கிறார். சிறுவன் ஆதித்யாவை தாதா வின்சென்ட் நகுல்  கடத்தினாரா? இல்லையா? அதன் பிறகு நடந்தது என்ன? என்பதுதான் ‘இடி மின்னல் காதல்’ படத்தின் மீதிக் கதை.

கதாநாயகனாக நடித்திருக்கும் சிபி, ஆக்‌ஷன் கதாநாயகனுக்கான அனைத்து தகுதிகளும் இருந்தாலும் ஆக்சன் காட்சிகளில் சரியான முறையில் நடிக்கவில்லை.  கிளைமாக்ஸ் ஆக்‌ஷன் காட்சியில் திரைப்படத்தின் கதாநாயகனை அடிவாங்க வைத்திருப்பதை நம்மால் ரசிக்க முடியவில்லை. இவருடைய நடிப்பும் சரி,  வசன உச்சரிப்பும் சரி அந்த கதாபாத்திரத்தின் தன்மையை உணர்ந்து நடித்திருக்கிறார்.

கதாநாயகியாக நடித்திருக்கும் பவ்யா த்ரிகா, மிக அழகாக வந்து அளவான நடிப்பை கொடுத்து அழகு தேவதை போல் ரசிகர்களை கவர்ந்து இழுக்கிறார். இப்படத்தின் கதைக்கு ஏற்றவாறு கதாபாத்திரத்திற்க்கு பலம் சேர்க்கும் வகையில் வடிவமைக்கப்பட்டுள்ள காட்சிகளில்  நியாயம் சேர்க்கும் வகையில் மிக அருமையாக  நடித்திருக்கிறார்.

வில்லன் கதாபாத்திரத்தில்  நடித்திருக்கும் வின்சென்ட் நகுல், ஆரம்பத்தில் பில்டப்புடன் அறிமுகமானாலும், அடுத்தடுத்த காட்சிகளில் கொடுத்த பில்டப்புக்கு  ஏற்றவாறு நடித்திருக்கிறார்.

சிறுவன் ஆதித்யா தனது தந்தை இறந்த துக்கத்தை தாங்காமல் மன ரீதியாக பாதிக்கப்பட்டு தடுமாறும் காட்சிகள் அனைத்திலும் அருமையாகவும், மிக சிறப்பாகவும்  நடித்திருக்கிறார்.

யாஸ்மின் பொன்னப்பாவின் நடிப்பும் அருமை. மெக்கானிக்காக ஜெகன் சிறப்பாக நடித்துள்ளார். ராதாரவி, பாலாஜி சக்திவேல், அருள்தாஸ் என இதில் நடித்திருக்கும் அனைவருமே கொடுத்த கதாபாத்திரம் உணர்ந்து சிறப்பாக நடித்துள்ளார்கள்.

 ஜெயசந்தரின் ஒளிப்பதிவு படத்திற்கு பலம் சேர்த்து இருக்கிறது. சாம் சி.எஸ்ஸின் பாடல்களின் இசையும், பிண்ணனி இசையும் ரசிக்கவைக்கிறது.

எதிர்பாராமல் நடக்கும் ஒரு விபத்தை மையமாக வைத்து மூன்று விதமான கதையை ஒன்றாக இணைத்து வித்தியாசமான திரைகதையை அமைத்து  பலவிதமான கதாபாத்திரங்களின் வடிவமைப்போடு  திரைப்படத்தை மிக அருமையாக இயக்கி இருக்கிறார் இயக்குநர் பாலாஜி மாதவன். ஆனால் இயக்குனர் கிளைமாக்ஸ் காட்சியை வேறு விதமாக அமைத்து இருக்கலாம்.

மொத்தத்தில், இந்த ‘இடி மின்னல் காதல்’ படத்தை பார்க்கலாம்.

ரேட்டிங் 2.5/5.

RADHAPANDIAN.

.