‘ரத்னம்’ திரைப்பட விமர்சனம்!

சென்னை:

ஸ்டோன் பெஞ்ச் பிலிம்ஸ், ஜி ஸ்டுடியோ இணைந்து தயாரித்திருக்கும் படம்தான் ‘ரத்னம்’ இப்படத்தில் விஷால், பிரியா பவானி சங்கர், சமுத்திரக்கனி, யோகி பாபு, மொட்டை ராஜேந்திரன், டெல்லி கணேஷ், கௌதம் வாசுதேவ மேனன், விஜயகுமார்,  ஒய் ஜி மகேந்திரன், வி டிவி கணேஷ்,  ஜெயபிரகாஷ், முரளி ஷர்மா, ஹரிஷ்  பெராடி, குமார், கும்கி அஸ்வின், அஞ்சலிதேவி, , துளசி மற்றும் பலர் நடித்திருக்கும் இப்படத்தை ஹரி இயக்கி இருக்கிறார்.

இப்படத்தின் கதையைப் பொருத்தவரையில்,

தன் தாய் இறந்தவுடன் வேலூர் தொகுதி சட்டமன்ற உறுப்பினர் மற்றும் தாதாவாக இருக்கும் சமுத்திரகனியின் அரவணைப்பில் வளர்ந்து வரும் விஷால், அவர் யாரை கொலை செய்ய சொல்கிறாரோ அந்தக் கொலையை செய்து விட்டு, சிறை சாலை சென்று தண்டனை அனுபவித்து விட்டு வெளியில் வருவது வழக்கம். எதையும் துணிந்து செயல்படும் அவர் சமுத்திரகனி நடத்தும் மதுபானக் கடையை தன்னுடைய பாதுகாப்பில் வைத்து இருக்கிறார் விஷால். இந்த சூழலில் வேலூருக்கு நீட் தேர்வு எழுத வரும் கதாநாயகி பிரியா பவானி சங்கரை முதல் முறையாக பார்த்தவுடன் விஷால் அவரை பின் தொடர்கிறார். அப்போது ஒரு கொலைகார கும்பல் தேர்வு எழுத செல்லும் சமயத்தில் பிரியா பவானி சங்கரை அந்த கும்பல் கொலை செய்ய முயற்சிக்கிறது.

அவர்களை விஷால் தடுத்து அடித்து நொறுக்கி  துவம்சம் செய்கிறார். ஆனாலும் தொடர்ந்து பிரியா பவானி சங்கருக்கு அந்த கும்பல் மூலம் பிரச்சனை ஏற்படுகிறது. பிரியா பவானி சங்கரின் பிரச்சனையை தனது பிரச்சனையாக கையில் எடுத்து, ஆந்திராவில் இருக்கும்  எதிரிகளை வீழ்த்த கிளம்புகிறார் விஷால். இறுதியில் பிரியா பவானி சங்கரை கொலை செய்ய வந்த அந்த மர்ம கும்பல் யார் என்பதை கண்டறிந்து, அவரை காப்பாற்றினாரா? இல்லையா? என்பதுதான் இந்த “ரத்னம்” திரைப்படத்தின் மீதிக்கதை..

இப்படத்தில் கதாநாயகனாக விஷால் நடித்திருக்கிறார், சென்டிமென்ட், ஆக்ஷன், பாசம் கோபம் என நடிப்பில் மிகப்பெரிய அளவில் சிறப்பாக ஸ்கோர் செய்து இருக்கிறார். முழு திரைப்படத்தையும் தனது கதாபாத்திரத்தின் தன்மையை உணர்ந்து தோள் மீது சுமந்து, கடுமையாக உழைத்திருப்பது அனைத்துக் காட்சிகளிலும் தெரிகிறது. அம்மா செண்டிமெண்ட் மூலம் ரசிகர்களை கலங்கடிக்கச் செய்யும் விஷால், ஆக்‌ஷன் காட்சிகளில் அனைவரையும் கவர்கிறார்.

இப்படத்தில் கதாநாயகியாக பிரியா பவானி சங்கர் நடித்துள்ளார். பிரியா பவானி சங்கருக்கு இந்த திரைப்படத்தில் நடிப்பதற்கு மிகப்பெரிய அளவில் வாய்ப்பு  கிடைத்திருக்கிறது.அந்த வாய்ப்பை பயன்படுத்திக் கொண்டு கதாபாத்திரத்தை உணர்ந்து மிகச்சிறப்பாக நடித்து இருக்கிறார். தனது தோற்றத்திலும் நடிப்பிலும் எளிமையை வெளிப்படுத்தி ரசிகர்கள் மனதை கவர்ந்து விடுகிறார்.

வேலூர் தொகுதி சட்டமன்ற உறுப்பினரான சமுத்திரக்கனி வழக்கம் போல் தனது நடிப்பு மூலம் தனது கதாபாத்திரத்திற்கு உயிர் கொடுத்து இருக்கிறார்.

யோகி பாபு செய்யும் நகைச்சுவை, ஒரு சில காட்சிகளில் மட்டும் சிரிக்க வைக்கிறார்.அவரை தொடர்ந்து வரும் மொட்டை ராஜேந்திரன், விடிவி கணேஷ் ஆகியோர் நகைச்சுவை என்ற பெயரில் கோபத்தை ஏற்படுத்துகிறார்கள். இயக்குனர் கவுதம் வாசுதேவ் மேனன் ஒரு சில காட்சிகளில் வந்தாலும் மனதில் பதிந்து விடுகிறார்.

முரளி சர்மா, ஹரிஷ் பெராடி, முத்துக்குமார் ஆகியோரின் வில்லத்தனம் வழக்கம் போல் வில்லன்களாக வந்து மிரட்டுகிறார்கள்.

விஜயகுமார், ஜெயப்பிரகாஷ், துளசி, கஜராஜ், சிறப்பு தோற்றத்தில் நடித்திருக்கும் இயக்குநர் கெளதம் மேனன், ஒய்.ஜி.மகேந்திரன், கணேஷ் வெங்கட்ராமன், கும்கி அஸ்வின் உள்ளிட்ட ஏராளமான நட்சத்திரங்கள் படத்தில் இருந்தாலும், அனைவரும் தங்களுக்கு கொடுத்த கதாபாத்திரத்தின் தன்மையை உணர்ந்து  நடித்திருக்கிறார்கள்.

ஒளிப்பதிவாளர் எம்.சுகுமார் ஒளிப்பதிவு மூலம் ஆக்‌ஷன் காட்சிகளை மிகவும் சிறப்பாக காட்சிப்படுத்தியிருக்கிறார்.

இசையமைப்பாளர் தேவி ஸ்ரீ பிரசாத்தின் இசையில் பாடல்களும் பின்னணி இசையும் கதைக்கு ஏற்றவாறு பயணித்திருக்கிறது.

இயக்குனர் ஹரி படம் என்றாலே அது தொடக்கம் முதல் இறுதி வரை ஆக்ஷன், சண்டை, அதிரடி காட்சிகள் இருக்கும் என்பதில் சந்தேகம் இல்லை. ஏற்கனவே ‘சிங்கம்’ , ‘சாமி’ உள்ளிட்ட பல படங்களை அவர் இயக்கி நிரூபித்து காட்டி இருக்கிறார். அந்த வரிசையில் ‘ரத்னம்’ படமும் இடம் பிடித்திருக்கிறது என்பதில் ஐயமில்லை. தனது வழக்கமான பாணியிலான கதையை, சில மாற்றங்களுடன்,அதே வழக்கமான கமர்ஷியல் கலந்த முறையில், விறுவிறுப்பாக வேகத்தோடும் சொல்லியிருந்தாலும், கதாநாயகன் – நாயகி இடையில் காதலுக்கு முக்கியத்துவம் கொடுக்காமல்,  வித்தியாசமான திருப்பத்தை வைத்து திரைக்கதையை சுவாரஸ்யமாக நகர்த்தி செல்வது பாராட்டத்தக்கது.அதே சமயம், படத்தில் அளவுக்கு அதிகமான ஆக்‌ஷன், சண்டைக் காட்சிகளை  வைத்து வெட்டு,குத்து என ரசிகர்களை ரசிக்க முடியாமல் செய்திருக்கிறார். ஆக்‌ஷன் காட்சிகளையும், படத்தின் நீளத்தையும் கொஞ்சம் குறைத்து இருந்தால் படம் இன்னும் வேகமாக அமைந்து இருக்கும்.

மொத்தத்தில், ‘ரத்னம்’ படம் ஆக்‌ஷன் ரசிகர்களுக்கு விருந்து.

ரேட்டிங் 3/5.

RADHAPANDIAN.