‘ஹிட்லர்’ – திரைப்பட விமர்சனம்!

சென்னை;

செந்தூர் பிலிம் இண்டர்நேஷனல் தயாரிப்பில் உருவான “ஹிட்லர்” படத்தில், விஜய் ஆண்டனி, ரியா சுமன், கௌதம் வாசுதேவ் மேனன், சரண்ராஜ், ரெடின் கிங்ஸ்லி, விவேக் பிரசன்னா, தமிழ், ஆடுகளம் நரேன், மற்றும் பலர் நடித்திருக்கும் இப்படத்தின் கதையைப் பொருத்தவரையில்,

விஜய் ஆண்டனி நடித்து கடைசியாக வெளியான ‘ரோமியோ’ மற்றும் ‘மழை பிடிக்காத மனிதன்’ ஆகிய இரு படங்களும் எதிர்பார்த்த வெற்றி பெறாத நிலையில் தற்போது ‘ஹிட்லர்’ திரைப்படம் வெளியாகி உள்ளது. மதுரையில் இருந்து தனியார் வங்கியில் கிடைத்த வேலைக்காக சென்னைக்கு வருகிறார் விஜய் ஆண்டனி. வேலை தேடி சென்னை வரும் விஜய் ஆண்டனி நண்பர்.கிங்ஸ்லி அறையில் தங்குகிறார். சென்னைக்கு வரும் விஜய் ஆண்டனி, ரயில் நிலையத்தில் நாயகி ரியா சுமனை கண்டதும் காதல் கொள்கிறார். இவர்களது காதல் கதை ரயில் பயணத்தில் தொடர்ந்து கொண்டிருக்கும் நிலையில், தமிழ் திராவிட சமுதாய கட்சியின் பொதுப்பணித்துறை அமைச்சர் சரண்ராஜ் ஊழல் வழக்கில் சிக்கி மக்களின் ஆதரவை இழக்கிறார்.

ஆனாலும் எப்படியாவது என்ன செய்தாவது, தேர்தலில் வெற்றிபெற திட்டம் தீட்டுகிறார் சரண்ராஜ். அதற்காக மக்களுக்கு பணம் கொடுத்து வாக்குகளை பெற நினைக்கிறார். அதனால் தொகுதியை சேர்ந்த மக்களுக்கு பணத்தைப் பிரித்துக் கொடுக்க ரூ.400 கோடியை எடுத்துச் செல்லும் அவரது ஆட்களை கொலை செய்துவிட்டு அந்த பணத்தை மர்ம கும்பல் கொள்ளையடிக்கிறது. இந்த கொலை, கொள்ளை வழக்கை விசாரிப்பதற்காக காவல்துறை  உயர் அதிகாரி டிஐஜி கெளதம் வாசுதேவ் மேனன் நியமிக்கபடுகிறார். எதற்காக கோடிக்கணக்கான் பணத்தை கொள்ளையடித்தார்கள் என்பதை கண்டுபிடிக்கும் பணியில் கெளதம் மேனனின் போலீஸ் படை இறங்குகிறது. இந்தப் பணம் கொள்ளை அடித்த பின்னணியில் இருப்பவர் யார்? என்பதை டிஐஜி கெளதம் வாசுதேவ் மேனன் கண்டுபிடித்தாரா?  இல்லையா? என்பதுதான்  ‘ஹிட்லர்’ படத்தின் மீதிக் கதை.

கதையின் நாயகனாக விஜய் ஆண்டனி வழக்கமான பாணியில் நடித்தாலும் கதாபாத்திரத்தை உணர்ந்து கதையுடன் இணைந்து காதல் மற்றும் ஆக்‌ஷன் காட்சிகளில் சிறப்பான நடிப்பை வெளிப்படுத்தியுள்ளார்.  கமர்ஷியல் கதைகளை தேர்வு செய்து நடிப்பதில் தீவிரம் காட்டினாலும் தனது தோற்றத்தையும் மாற்றிக் காட்டும் முயற்சிகளில் விஜய் ஆண்டனி ஈடுபடுவது மிக சிறப்பு. தொடர்ந்து இதுபோல் மாறுபட்ட கதைகளை தேர்வு நடித்தால் கண்டிப்பாக விஜய் ஆண்டனிக்கு வெற்றி நிச்சயம்.

கதாநாயகியாக நடித்திருக்கும் ரியா சுமன், ரொமான்ஸ் காட்சிகளில் அவரது கதாபாத்திரம் முக்கிய அங்கம் வகிக்கிறது. அதை அவர் நேர்த்தியாக செய்து அசத்தியுள்ளார்.

காவல்துறை அதிகாரியாக நடித்திருக்கும் கெளதம் மேனன், நீண்ட இடைவெளிக்குப் பிறகு வில்லனாக நடித்திருக்கும் சரண்ராஜ், அவரது தம்பியாக நடித்திருக்கும் இயக்குனர் தமிழ், ஆடுகளம் நரேன், ரெடின் கிங்ஸ்லி, விவேக் பிரசன்னா அனைவரும் கதைக்கு தகுந்தவாறு தங்களது நடிப்பை இயல்பாக வெளிப்படுத்தியுள்ளனர்.

நவின்குமார் ஒளிப்பதிவில் ரயிலில் நடக்கும் காட்சிகள் ரசிக்கும்படி அமைந்திருக்கின்றன.

விவேக் – மெர்வின் இசையில் பாடல்களும், பின்னணி இசையும் கதைக்கேற்றவாறு பயணித்து இருக்கிறது.

மக்கள் பிரச்சனையை கருவாக வைத்துக்கொண்டு கமர்ஷியல் ஆக்‌ஷன் ஜானரில் பல படங்கள் வெளி வந்தாலும் இப்படத்தில் கதை, திரைக்கதை அமைத்து இயக்கியிருக்கும் இயக்குநர் தனா. எஸ்.ஏ, எந்த ஒரு புது விஷயத்தையும் சொல்லாமல் பழைய பாணியில் இப்படத்தை எடுத்து  இருப்பது மிகவும் தொய்வடைய செய்கிறது.

மொத்தத்தில், இந்த ‘ஹிட்லர்’ படம் ஆக்ஷன் ரசிகர்களுக்கு பிடிக்கும்.

ரேட்டிங் 3/5.

RADHAPANDIAN.