‘விடா முயற்சி’ – திரைப்பட விமர்சனம்!
CHENNAI:
லைக்கா புரொடக்ஷ்ன்ஸ் தயாரிப்பில் அஜித் குமார், திரிஷா, அர்ஜுன், ரெஜினா கசன்றா, ஆரவ் மற்றும் பலர் நடிப்பில் அனிருத் இசையில் மகிழ் திருமேனி இயக்கத்தில் வெளிவந்திருக்கும் படம் ‘விடாமுயற்சி’ அண்மையில் வெளி வந்து அனைத்து திரையரங்குகளிலும் வெற்றிகரமாக ஓடிக் கொண்டிருக்கும் இப்படத்தின் கதையைப் பொருத்தவரையில்,
அஜர்பைஜான் நாட்டின் தலைநகர் பாகுவில் திருமணமாகி 12 ஆண்டுகளான நிலையில், திரிஷா தன் கணவன் அஜித்துடன் ஏற்பட்ட மன கசப்பால் ஒருவரை ஒருவர் புரிந்துக் கொள்ளாத சூழ் நிலையில் விவாகரத்து பெற விரும்புகிறார். அஜித்துக்கு இதில் துளி கூட விருப்பமில்லை என்றாலும் பிறகு திரிஷா சொல்லுக்கு கட்டுப்பட்டு விவாக ரத்து செய்வதற்கு ஒப்புக் கொள்கிறார். பிறகு திரிஷாவுக்கு விவாகரத்து கொடுக்கும் வரை தன் தாய் வீட்டில் இருக்க முடிவெடுத்ததால் அவரது வீட்டில் விட காரில் இருவரும் சாலைப் பயணத்தை தொடங்குகிறார்கள். இருவரும் காரில் நெடுந்தூரம் பயணமாக செல்லும் போது வழியில் ஒரு இடத்தில் பெட்ரோல் நிரப்ப முயலும்போது தமிழ் பெண்ணாக இருக்கும் ரெஜினா கசாண்ட்ராவை திரிஷா சந்திக்க, அவர் தன் கணவனான அர்ஜுனை அவருக்கு அறிமுகபடுத்துகிறார்.
அதன் பிறகு நீண்ட சாலையில் கார் சென்று கொண்டிருக்கும் போது திடீரென்று பிரேக் டவுன் ஆகிறது. அப்போது அங்கு வில்லன் ஆரவ் தனது அடியாட்களுடன் வந்து அஜித்குமாரிடம் வம்பிழுக்கின்றனர். ஆனால் அதைப்ப்ற்றி கவலை படாமல் அமைதியாகி விடுகிறார் அஜீத். இந்நிலையில் அந்த சாலையில் அர்ஜுன், ரெஜினா கசன்றா 40 அடி கண்டெய்னரை ஓட்டி வரும்போது, கார் பழுதாகி இருப்பதை பார்க்கின்றனர். காரை சரி செய்ய நீண்ட நேரம் ஆகும் என்பதால், அஜித் தன் மனைவி திரிஷாவை அர்ஜுனுடன் பாதுகாப்பாக அனுப்பி அப்பகுதியில் உள்ள ஹோட்டலில் தங்க வைக்கும்படி சொல்கிறார். இதற்கிடையில் காரை சரி செய்து திரிஷாவை அழைத்துச் செல்ல குறிப்பிட்ட ஓட்டலுக்கு அஜித் வருகிறார்.
ஆனால் அங்கு திரிஷா வரவில்லை என்று ஹோட்டலில் இருப்பவர்கள் சொல்கிறார்கள். இதனால் பதட்டமடைந்த அஜீத் என்ன செய்வதென்று புரியாமல் தவிக்கிறார். அந்த சமயத்தில் அந்த ஹோட்டலுக்கு அருகே கார் டயரை துடைத்து கொண்டிருந்த ஒருவன் ‘உங்கள் மனைவி திரிஷாவை அர்ஜுன் கடத்தி சென்றதை சொல்கிறான். திரிஷாவை கடத்தி சென்ற அர்ஜுன் எந்த இடத்தில் மறைத்து வைத்து இருக்கிறார் என்பதை அஜீத் கண்டுபிடித்து காப்பாற்றினாரா? இல்லையா? என்பதுதான் ‘விடாமுயற்சி’ படத்தின் மீதிக் கதை.
இப்படத்தில் கதாநாயகனாக நடித்திருக்கும் அஜித் அவரது வழக்கமான பாணியிலிருந்து மாறுபட்டு மென்மையானவராக காதல், பதற்றம், உணர்ச்சி, மற்றும் உணர்வை உடல் மொழி மூலம் அழுத்தமான நடிப்பை வெளிப்படுத்தி தனது ரசிகர்களை திருப்திபடுத்தி இருக்கிறார். தன் மனைவியின் மனதை புரிந்துக்கொண்டு அவரது உணர்வுகளுக்கு மரியாதை அளிப்பது, அதே மனைவி கடத்தப்பட்டவுடன் காப்பாற்றுவதற்காக துடிப்பது, என அனைத்து இடங்களிலும் உணர்வுப்பூர்வமாக நடித்து அசத்தியிருக்கிறார். அர்ஜுனுடன் மோதும் சண்டைக் காட்சியில் ஆக்ரோஷமாக நடித்து மிரட்டி இருக்கிறார்.
கதாநாயகியாக நடித்திருக்கும் திரிஷா அழகுப்பதுமையாகத் தோற்றமளிக்கிறார். கணவனைப் பிரிந்து செல்லும் காட்சிகளிலும் மிக நிதானமாக நடித்து வரவேற்புப் பெறுகிறார்.
ஆக்ஷன் கிங் அர்ஜுன் வில்லனாகவும், ரெஜினா கசாண்ட்ரா வில்லியாகவும் முக்கிய கதாபாத்திரங்களாக கச்சிதமான நடிப்பை வெளிப்படுத்தி த்ரில்லிங்கான கதை களத்தை பரபரப்புடன் நகர்த்தி ரசிகர்களின் கவனத்தை ஈர்க்கிறார்கள்.
இன்னொரு வில்லனாக ஆரவ், ரம்யா சுப்பிரமணியன் , ரவி ராகவேந்திரா, நிகில் சஜித், சஞ்சய் கணேஷ் சரவணன் என மற்ற கதபாத்திரங்களில் நடித்திருப்பவர்களும் திரைக்கதைக்கு ஏற்றவாறு தங்களது பணியை சிறப்பாக செய்து இருக்கின்றனர் .
இப்படத்தின் ஒளிப்பதிவு இயக்குனர் ஓம் பிரசாத் அற்புதமான ஒளிப்பதிவு மூலம் இது தமிழ் படமாக இல்லாமல் ஒரு ஹாலிவுட் படத்திற்கு நிகராக அதிக சிரத்தை எடுத்து ஒரு தரமான ஒரு படத்தை தமிழ் சினிமாக்கு கொடுத்திருக்கிறார். அவருக்கு பாராட்டுக்கள்.
அனிருத்தின் இசையில் பாடல்கள் ஆட்டம் போட வைக்கிறது. பின்னணி இசையை அதிக சத்தம் இல்லாமல் மிக சிறப்பாக பயணித்திருக்கிறது.
‘பிரேக் டவுன்’ என்ற ஹாலிவுட் படத்தின் கதையை எடுத்துக் கொண்டாலும் அந்தப் படத்தை அப்படியே காப்பி அடிக்காமல் தமிழுக்கு ஏற்றவாறு மிக அற்புதமான திரைக்கதை அமைத்து இருக்கிறார் இயக்குனர் மகிழ் திருமேனி. ஹாலிவுட் படத்திற்கும் இந்த ”விடாமுயற்சி’ தமிழ் படத்திற்கும் முற்றிலும் திரைக்கதையில் வேறு படுத்தி இயக்கி இருக்கிறார். கடத்தப்பட்ட மனைவியை கண்டுபிடிக்க போராடும் கதாநாயகனின் கதையை மையமாக வைத்து விறுவிறுப்பான திருப்பங்களுடன் அனைவரும் ரசிக்கும்படி இயக்கி இருக்கிறார் மகிழ்திருமேனி.
மொத்தத்தில் ‘விடாமுயற்சி’ படம் ஹாலிவுட் ஸ்டைல் படம்.
ரேட்டிங் 3.5/5.
RADHAPANDIAN.