’தக் லைஃப்’ திரைப்பட விமர்சனம்!

சென்னை:

ராஜ்கமல் இன்டர்நேஷனல், மெட்ராஸ் டாக்கீஸ் இரு நிறுவனங்களும் இணைந்து தயாரித்திருக்கும் படம் “தக் லைஃப்”. மணிரத்னம் இயக்கி இருக்கும் இப்படத்தில் கமல்ஹாசன், சிலம்பரசன் டிஆர், திரிஷா, ஜோஜு ஜார்ஜ், ஐஸ்வர்யா லெக்ஷ்மி, அசோக் செல்வன், அபிராமி, நாசர், மகேஷ் மஞ்சரேக்கர், சஞ்சனா, நாசர், ரோஹித் சரஃப், பகவதி பெருமாள், வடிவுக்கரசி, வையாபுரி, சேத்தன், பாபுராஜ், பாரத் ஜா, அர்ஜுன் சிதம்பரம், வையாபுரி, இரக்லி சபனாட்ஸே, சின்னிஜெயந்த் மற்றும் பலர் நடித்திருக்கின்றனர்.

இப்படத்தின் கதையைப் பொருத்தவரையில்,

ரங்கநாயக சக்திவேல் என்ற கமல்ஹாசன், டெல்லியில் தன்னுடைய அண்ணன் நாசருடன் இணைந்து தாதாவாக வலம் வந்து கொண்டிருக்கிறார். அவருக்கு எதிராக மற்றொரு தாதா கூட்டம் கமலுக்கு போட்டியாக இருக்கிறது.  இந்த இரண்டு கூட்டத்துக்கும் இடையே நடக்கும் மோதலால், காவல்துறை நடத்திய  துப்பாக்கிச் சண்டையில் பேப்பர் போட வந்தஒருவர் சுட்டு கொல்லப்படுகிறார்.  அவருடைய மகன்தான் சிம்பு. சிறுவயதிலேயே தனது தந்தையை இழந்து விட்ட சிம்புவுக்கு ஆதரவு கொடுத்து தன் மகன் போல ஒரு தாதாவாகவும் வளர்க்கிறார் கமல். அதனால் இளம் வயதிலேயே சிம்பு தனது தொழிலில்  பெரிய ஆளாகி விட்டதை நினைத்து பெருமைப்படுகிறார் கமல். பல ஆண்டுகளுக்குப் பிறகு, தனது அண்ணன் நாசரின் மகள் தற்கொலைக்கு காரணமானவனை கொன்று விட்டு சிறைக்கு செல்கிறார் கமல். இதனால் தன்னுடைய பொறுப்புகளை எல்லாம் சிம்புவிடம் ஒப்படைத்து விட்டு செல்கிறார்.

சிறையில் இருந்து வெளியே வந்த கமலுக்கு, தன்னை விட மற்றவர்கள் சிம்புவுக்கு முக்கியத்துவம் கொடுப்பதை பார்க்கும்போது மிகுந்த எரிச்சலை ஊட்டுகிறது. இந்த சூழ்நிலையில் வளர்ப்பு மகனான சிம்புவிடம் அவனுடைய அப்பாவை கொலை செய்தது கமல்தான் என்று பொய்யாக ஒரு வன்மத்தை அவரது மனதில் விதைக்கிறார் நாசர். மேலும் கமலின் மீது நடத்தப்படும் ஒரு தாக்குதலின் போது சிம்பு தன்னுடன் இல்லாததை கண்டு வெறுப்படைகிறார்,  இந்த தாக்குதலுக்கு காரணமாக சிம்பு துணை போய் இருக்கலாம் என்று சந்தேகப்படுகிறார் கமல். இதனால் இருவருக்குள்ளும் முரண்பாடு ஏற்பட்டு கமலுக்கு எதிரியாகமாறுகிறார் சிம்பு. அதே சமயத்தில்  கமலைக் கொல்ல அவரது எதிரி கூட்டம் முயற்சி செய்கிறது.  அந்த கொலை முயற்சியிலிருந்து கமல் தப்பித்தாரா? தன் தந்தையை கொன்றதற்காக கமலை, சிம்பு பழி வாங்கினாரா/ என்பதுதான் “தக் லைஃப்” படத்தின் மீதிக் கதை.

தொழில்நுட்பம் மூலம் இளம் வயதுத் தோற்றம், அதன்பின் இப்போதைய தோற்றம் அவற்றிற்கடுத்து தற்காப்புக்கலைஞர் தோற்றம் என வெவ்வேறு தோற்றங்களில் வருகிறார் கமல். தன்னுடைய அறிமுக காட்சியில் தனது டிரேட் மார்க்கான நடிப்பை பதிவு செய்திருக்கும் கமல் இறுதி வரையிலும் தன்னுடைய ‘சக்திவேல்’ என்கின்ற அந்தக் கதாபாத்திரத்திற்கு ஏற்ப தனது நடிப்பை சிறந்த முறையில் காண்பித்து அசத்தி இருக்கிறார். தன்னுடைய மனைவியின் மீது வைத்து இருக்கும் காதலும், நேசமும், பாசமும், பரிவையும் வெளிப்படும்போது கமல் தன்னுடைய வேலையைச் சிறப்பாகச் செய்திருக்கிறார்.

கமலின் வளர்ப்பு மகனாக நடித்திருக்கும் சிம்பு, இளமை துள்ளலும் துடிப்புமாக ஆக்சன் காட்சிகளிலும் மிக அருமையாக நடித்து இருக்கிறார்.கமலுக்கு இணையாக நடிப்பில் மிரட்டி இருக்கிறார். சில காட்சிகளில் அவரை மிஞ்சும் அளவுக்கு நடித்து நல்ல பெயர் எடுத்து இருக்கிகிறார்.

கமலின் மனைவியாக நடித்திருக்கும் அபிராமியின் பாத்திரப்படைப்பும் அதில் அவர் நடிப்பும் ரசிகர்கள் மத்தியில் வரவேற்பையும் மிகுந்த பரிதாபத்தையும் கொடுத்து இருக்கிறது.

த்ரிஷாவின் கதாபாத்திரம் இளைஞர்களை ஈர்ப்பதற்கென்றே படைக்கப்பட்டது போல் இருக்கிறது.அவரும் அதை உணர்ந்து அதற்கேற்றவாறு தனது திறமையை  வெளிப்படுத்தி இருக்கிறார்.

நாசர், ஐஸ்வர்யா லக்‌ஷ்மி, அசோக் செல்வன், ஜோஜு ஜார்ஜ், பகவதி பெருமாள் உள்ளிட்ட படத்தில் நடித்திருக்கும் அனைவருக்கும் சிறிய வேலை என்றாலும் அதை நிறைவாக செய்திருக்கிறார்கள்.

ஏ.ஆர்.ரஹ்மான் இசையில் “ஜிங்குஜா ஜிங்குஜா…” பாடல் மட்டுமே ஆட்டம் போட வைப்பதோடு முணுமுணுக்க வைக்கிறது. மற்ற பாடல்கள் சுமார் ரகம்தான்.  பின்னணி இசையில் தன் இருப்பைக் காட்டியிருக்கிறார்.

ரவி கே சந்திரன் ஒளிப்பதிவில் ஹாலிவுட் படங்களை தூக்கி சாப்பிடும் அளவிற்கு காட்சிகளை சிறப்பான முறையில் பதிவு செய்திருப்பதை பாராட்டலாம். குறிப்பாக கார் சேசிங் காட்சிகள் மிரட்டலாக இருக்கிறது.

மாபெரும் வெற்றிப் பெற்ற ‘நாயகன்’ படத்திற்கு பிறகு மீண்டும் இணைந்துள்ள உலகநாயகன் கமல்ஹாசனும், இயக்குனர் மணிரத்தினமும் “தக் லைஃப்” திரைப்படத்தில் மூலம் இணைந்து இருப்பது மகிழ்ச்சியாக இருக்கிறது. இப்படத்திற்கு மணிரத்னம்- கமல்ஹாசன் இருவரும் இணைந்து கதை எழுதியிருக்கிறார்கள். இப்படி ஒரு கதையை எழுதிய இருவரும், வெறும் தாதா கதையாக மட்டுமல்லாமல் அண்ணன் ,-தங்கை பாசம், கணவன் -மனைவி அன்பு என்று ஒரு குடும்ப உறவையும் இணைத்திருப்பது இயக்குனர் மணிரத்தினத்தின் அறிவு கூர்மை என்றுதான் சொல்ல வேண்டும்.

மொத்தத்தில், ‘தக் லைஃப்’ படம் கமல் ரசிகர்களுக்கு ஏமாற்றம்தான்.

ரேட்டிங் 3/5.

RADHAPANDIAN.