‘பிபி 180’ – திரைப்பட விமர்சனம்!

சென்னை:

மறைந்த பிரபல நடிகர் டேனியல் பாலாஜி நடித்த இறுதி படங்களில் ஒன்றாக வெளி வந்து இருக்கும் ‘பி பி180’  படத்தில் கே.பாக்யராஜ்,,அருள் தாஸ், தன்யா ரவிச்சந்திரன், தமிழ், ஜாக் அருணாச்சலம், ஸ்வேதா டோரத்தி, ரங்கா, நயனா போன்ற பலர் நடித்திருக்கின்றனர்.  இப்படத்தை இயக்குநர் மிஷ்கினிடம் உதவி இயக்குநராக இருந்த இயக்குனர் ஜெபி எழுதி இயக்கி இருக்கிறார்.

இப்படத்தின் கதையைப் பொருத்தவரையில்,

வட சென்னையில் உள்ள மீனவர்கள் அதிகமாக வாழும் காசிமேடு பகுதியில் பிரபல ரவுடியாக விளங்கி வருகிறார் டேனியல் பாலாஜி. அவர் எவ்வளவு பெரிய ரவுடியாக இருந்தாலும் எம்எல்ஏ ஆக இருக்கும் பாக்யராஜிடம் மிகுந்த மரியாதை வைத்திருக்கிறார்.  இந்த சூழ்நிலையில் பாக்யராஜின் மகள் ஒரு விபத்தில் இறந்து விடுகிறார். அவரது மகளை பிரேத பரிசோதனை செய்யாமல் தன்னிடம் கொடுக்கும்படி அரசு மருத்துவமனையில் பணிபுரியும் நேர்மையான மருத்துவரான  தன்யா ரவிச்சந்திரனிடம் கேட்கிறார் பாக்யராஜ்.  பிரபல ரவுடியான டேனியல் பாலாஜியும் தன்யா ரவிச்சந்திரனிடம் பாக்யராஜ் மகள் உடலை உடல் கூறு செய்யாமல் கொடுக்கும்படி மிரட்டுகிறார்.

ஆனால் அவரது மிரட்டலுக்கு எல்லாம் பணியாமல்,  பாக்யராஜ் மகளை தன் கடமையிலிருந்து பின்வாங்காமல் பிரேத பரிசோதனை செய்து உடலை கொடுக்கிறார். ஒரு கட்டத்தில் காவல்துறை உள்ளிட்ட அரசு ஊழியர்கள் எதிர்ப்பையும் மீறி அவர் செய்யும் செயல் அனைவரையும் கோபப்படுத்துகிறது.அவரைத் தீர்த்துக் கட்ட ரவுடி டேனியல் பாலாஜியின் அடியாட்கள் துணிகிறார்கள்.இந்த விவகாரத்தில் தலையிடும் சென்னை காவல்துறை ஆணையர் தமிழ், டேனியல் பாலாஜியை அழைத்து மிரட்டி அசிங்கப்படுத்தி விடுகிறார். காவல்துறையின் எச்சரிக்கையையும் மீறி தன்யா ரவிச்சந்திரனை பழிவாங்க துடிக்கிறார் ரவுடி டேனியல் பாலாஜி.  இறுதியில் என்ன நடக்கிறது என்பதுதான் ‘பிபி 180’  படத்தின் மீதி கதை.

இப்படத்தில் வில்லனாக நடித்திருக்கும் டேனியல் பாலாஜி, வழக்கம்போல் தனது கதாபாத்திரத்தை உணர்ந்து மிக சிறப்பாக நடித்திருக்கிறார். இதன் கதையே இவரை சுற்றித்தான் எழுதப்பட்டுள்ளது.  அர்னால்டு எனும் கொடூரமான கதாபாத்திரத்தை அசத்தலாக வெளிப்படுத்தி அனைவரையும் மிரள வைத்துள்ளார்.  ஒரு பெண்ணிடம் அவமானப்படும் நேரத்தில் அவர் வெளிப்படுத்தும் நடிப்பு பாராட்டத்தக்கது.

கதையின் நாயகியாக மருத்துவர் தங்கம் என்ற கதாபாத்திரத்தில், தைரியமான பெண்ணாக நடித்திருக்கும் தன்யா ரவிச்சந்திரன், வில்லனின் மிரட்டல்களுக்கு அஞ்சாமல் எதிர்கொள்ளும் காட்சிகளில் தனது அளவான அற்புதமான நடிப்பு மூலம் மிரட்டி இருக்கிறார்.

இயக்குநர் கே.பாக்யராஜ் அழுத்தமான கதாபாத்திரத்தில் பெரும் எதிர்பார்ப்பை ஏற்படுத்தினாலும், இரண்டாம் பாதிக்கு மேல் அவரது கதாபாத்திரத்தை பலமில்லாமல் செய்து விட்டார்கள்.

முன்னாள் எம்.எல்.ஏ-வாக நடித்திருக்கும் அருள்தாஸ், காவல்துறை ஆணையராக நடித்திருக்கும் தமிழ், சமூக ஆர்வலராக நடித்திருக்கும் ஜாக் அருணாச்சலம், நாயகியின் தங்கையாக நடித்திருக்கும் ஸ்வேதா டோரத்தி, சகோதரராக நடித்திருக்கும் ரங்கா, தோழியாக நடித்திருக்கும் நயனா ஆகியோர் தங்களுக்கு கொடுத்த பணியை குறையின்றி செய்திருக்கிறார்கள்.

ஒளிப்பதிவாளர் இராமலிங்கம், வடசென்னைப் பகுதி, அங்கு வாழும் மக்கள் ஆகியோரின் வாழ்வியலையும்,  ஒளி, இருள் இரண்டையும் சரிவிகிதத்தில் கலந்த காட்சிகளாக  வியக்க தக்க விதத்தில் கொடுத்திருப்பதை பாராட்ட வேண்டும்.

ஜிப்ரானின் பின்னணி இசை படத்தின் வேகத்தை அதிகரித்து, சத்தம் காதை கிழிக்கிறது,

எழுதி இயக்கியிருக்கும் ஜெ.பி, அரசு மருத்துவமனை பெண் மருத்துவர் மற்றும் ரவுடி இடையிலான மோதல், அதனால் ஏற்படும் விளைவுகளை மையமாக வைத்துக் கொண்டு, பிணவறையில் நடக்கும் சம்பவங்களை காட்டும்போது தலைப்பில் இருக்கும் இரத்தக் கொதிப்பை படம் பார்ப்பவர்களுக்கு ஏற்படுத்தியிருக்கிறார்.

மொத்தத்தில், ‘பிபி 180’ படம் மிரட்டல்.

ரேட்டிங் 3/5.

RADHAPANDIAN.