‘நிர்வாகம் பொறுப்பல்ல’ திரைப்பட விமர்சனம்!

CHENNAI:

ஆர்.கே. ட்ரீம் ஃப்பேக்டரி சார்பில் டி.ராதாகிருஷ்ணன் தயாரிப்பில், கே எம் பி புரொடக்ஷன்ஸ் சார்பில் எம்.புவனேஸ்வரன், ஜோதிலட்சுமி மற்றும் எஸ் பி எம் ஸ்டுடியோஸ் சார்பில் ஷாஜு சி இணைந்து தயாரித்த திரைப்படம்தான் “நிர்வாகம் பொறுப்பல்ல”. இப்படத்தில் எஸ்.கார்த்தீஸ்வரன் இயக்கி கதையின் நாயகனாக நடித்துள்ளார். இவருடன் முக்கிய கதாபாத்திரத்தில் லிவிங்ஸ்டன், இமான் அண்ணாச்சி, பிளாக் பாண்டி, ஆதவன், அகல்யா வெங்கடேசன், ஸ்ரீநிதி, கோதை சந்தானம், அம்மன்புரம் சரவணன், ராதாகிருஷ்ணன், ஆசு அர்ஜுன், மிருதுளா, ஜெயஸ்ரீ சசிதரன், தீட்சண்யா, மஞ்சு மற்றும் பலர் நடித்துள்ளனர்.

இப்படத்தின் கதையைப் பொருத்தவரையில்,

தற்போது நமது நாட்டில் ஆன் லைன் மோசடிகள் பல வித ரூபத்தில் நடைபெற்று வருகின்றன.  மக்களிடம் ஆசை வார்த்தைகள் கூறி குறைந்த முதலீட்டிற்கு அதிக வட்டி, வரவு, செலவு,வர்த்தகம் என பலவித கவர்ச்சிகரமான விளம்பரங்கள் மூலமாகவும், மக்கள் மத்தியில் பல மோசடிகளை அரங்கேற்றி கோடிக்கணக்கில் சம்பாதிக்கிறார்கள். இப்படி மக்களிடம் பல ஆசைகளைக் காட்டி மக்களை ஏமாற்றி செய்த  மோசடிகளால் கோடிக்கணக்கில் பணம் குவிப்பவர் கார்த்தீஸ்வரன். ரூ.5 ஆயிரம் கோடி சம்பாதித்த பின் வெளிநாட்டுக்கு தப்பிச் செல்ல முற்படும் தருணத்தில் அவர் போலீஸ் இன்ஸ்பெக்டர் ஸ்ரீநிதியின் கண்ணில் மாட்டிக் கொள்கிறார். ஆனால் இன்ஸ்பெக்டர் ஸ்ரீநிதி இந்த வழக்கை விசாரிக்க  முயற்சிக்கும்போது இந்த மோசடி கும்பலை பற்றி ஒரு துப்பும் கிடைக்காமல் தவிக்கிறார். இறுதியில் போலீஸிடம் சிக்கிக் கொண்ட கார்த்தீஸ்வரன் தப்பித்தாரா? அவர் செய்த மோசடிகள் என்ன? என்பதுதான்   ‘நிர்வாகம் பொறுப்பல்ல’ படத்தின் மீதிக் கதை.

இப்படத்தில் நாயகன் கே பாத்திரத்தில் நடித்து இயக்கி இருக்கிறார் எஸ் கார்த்தீஸ்வரன்.மோசடி நாயகனுக்கு ஏற்ற எளிமையான தோற்றத்துடன் அவர் நல்லவரா கெட்டவரா என்று தீர்மானிக்க முடியாத எளிமையான முகத்தோற்றத்தை வைத்துக் கொண்டு சாதுவான உடல்மொழியுடன் அவர் செய்யும் மோசடிகள் அனைத்தும் அதிர  வைக்கின்றன. ஒரு நடிகராக நடிப்பு, நடனம், காமெடி, ஆக்‌ஷன் என அனைத்தையும் மிக சரியாக செய்திருக்கிறார்.

காவல்துறை ஆய்வாளராக நடித்திருக்கும் ஸ்ரீநிதி, அதற்கேற்ற கம்பீரத்துடன் மிக தைரியம் மிக்கவராக வருகிறார். அவரது நடிப்பிலும் குறைவில்லை.

கார்த்தீஸ்வரனின் குழுவினராக நடித்திருக்கும் ஆதவன், லிவிங்ஸ்டன்,இமான் அண்ணாச்சி, பிளாக் பாண்டி, மிருதுலா சுரேஷ், அகல்யா வெங்கடேசன் ஆகியோர் அவரவர்க்குக் கொடுக்கப்பட்ட கதாபாத்திரங்களுக்கு ஏற்ப மிக சிறப்பாக நடித்திருக்கிறார்கள்.அது அவர்களுக்கு மட்டுமின்றி படத்துக்கும் பலமாக அமைந்திருக்கிறது.

என் எஸ் ராஜேஷின் ஒளிப்பதிவில் காட்சிகள் வண்ணமயமாகவும் வணிக ரீதியாகவும் உள்ளன.

ஸ்ரீகாந்த் தேவாவின் இசையில் பாடல்கள் துள்ளல் ரகமாக அமைந்து ஆட்டம் போட வைக்கிறது. பின்னணி இசை அதிக ஒலியுடன் காதை பிளக்கிறது.

கதை எழுதி இயக்கியிருக்கும் எஸ்.கார்த்தீஸ்வரன், மிக குறைந்த விலையில் ஸ்மார்ட் போன் தருவதாக கூறி கார்ப்பரேட் நிறுவனம் மூலம் நடத்திய மோசடி முதல் தற்போது நடக்கும் ஆன்லைன் மோசடிகள் வரை எல்லோருக்கும் வெளிச்சம் போட்டுக் காட்டுவதோடு நில்லாமல் அவற்றிலிருந்து சாமானியர்கள் எவ்வாறு தப்புவது? என்கிற பாடத்தையும் நடத்தியிருக்கிறார்.  கதாநாயகனாகவும் இயக்குநராகவும் இரட்டை பொறுப்பை ஏற்று அனைவரும் ரசிக்கும்படி படத்தை இயக்கி இருக்கிறார்.

மொத்தத்தில், ‘நிர்வாகம் பொறுப்பல்ல’ ஆன்லைன் வர்க்கத்தினருக்கு பாடம்.

ரேட்டிங் 3/5.

RADHAPANDIAN.