’ரெட்ட தல’ திரைப்பட விமர்சனம்!

சென்னை:

பிடிஜி யுனிவர்சல் சார்பில் பாபி பாலச்சந்திரன் தயாரித்திருக்கும் ‘ரெட்ட தல’ படத்தை எழுதி இயக்கியிருக்கிறார் கிரிஷ் திருக்குமரன். இப்படத்தில் அருண் விஜய், சித்தி இத்னானி, தன்யா ரவிச்சந்திரன், யோகி சாமி, ஜான் விஜய், ஹரீஷ் பேராடி, பாலாஜி முருகதாஸ் ஆகியோர் நடித்துள்ளனர். இப்படத்தின் தலைப்புக்கேற்ப அருண்விஜய் இரண்டு வேடங்களில் நடித்திருக்கிறார்.

இப்படத்தின் கதையைப் பொருத்தவரையில்,

சிறிய வயதிலேயே பெற்றோரை இழந்த காளி என்ற அருண் விஜய், தனது சிறு வயது தோழியான  சித்தி இத்னானியுடன் வறுமையான வாழ்க்கை வாழ்ந்தாலும் இருவரும் நட்பாக பழகி வருகின்றனர். நம் சமுதாயத்தில் அவர்கள் எதிர்கொள்ளும் கொடிய கசப்பான அனுபவங்கள் அவர்களை வேதனையாக்குகிறது.பெற்றோரின் அரவணைப்பின்றி வளர்வதால் அவர்களுக்குள் அன்புக்கான ஏக்கத்தினால் ஒருவருக்கொருவர் துணை என்று வளர்கிறார்கள். இந்த சூழலில் வேலை காரணமாக வெளியூர் செல்கிறான் காளி என்கிற அருண் விஜய். ஐந்து வருடங்கள் கழித்து தன்னுடைய அன்பு தோழி சித்தி இத்னானியை சந்திக்க பாண்டிசேரிக்கு ஓடி வருகிறான். அங்கு சித்தி இத்னானி கிடைக்கின்ற வேலைகளை செய்து வந்தவர் தற்போது ஒரு ஹோட்டலில் சர்வராக பணி புரிந்து வருகிறார்.

காளி என்ற அருண் விஜய்,  சித்தி இத்னானி தன்னை காதலித்து வருகிறார் என்று நினைத்து அவரை திருமணம் செய்யும் முயற்சியில் ஈடுபடுகிறார். ஆனால் சித்தி இத்னானியோ காளி என்கிற அருண் விஜய்யிடம் “உன்னை திருமணம் செய்து கொண்டு நானும் கஷ்டப்பட விரும்பவில்லை. அதனால் மிகப் பெரிய பணக்காரன் ஒருவனை திருமணம் செய்யப் போகிறேன். அதனால் நான் பிரான்ஸ் நாட்டிற்கு செல்லப் போகிறேன் என்கிறார். இந்த சூழ்நிலையில் திடீர் என்று ஒரு திருப்பம் ஏற்படுகிறது. ஒரு ரோட்டில் நடந்து சென்று கொண்டிருக்கும்போது கார் ஒன்று காளியை மோதி விட, இடித்த காரில் இருந்து ஒருவர் இறங்குகிறார். அவர் பார்ப்பதற்கு அப்படியே காளியை போலவே இருக்கிறார். அவர்தான் உபேந்திரா. அந்த உபேந்திரா ஒரு பணக்காரன் . பல வித குற்றங்கள் செய்து  கோவா சிறையிலிருந்து பரோலில் வந்திருக்கிறான். காளியும் உபேந்திராவும் சற்று நேரத்தில் நண்பர்களாகி விடுகின்றனர். உபேந்திராவை சித்து இதானியிடம் அறிமுகம் செய்து வைக்கிறார் காளி. 

தோற்ற ஒற்றுமையைக் கருத்தில் கொண்டு காளி,உபேந்திராவாக மாறி அவனது சொத்துகளை அனுபவிக்கலாம் என்று காதலர்கள் இருவரும் திட்டமிடுகிறார்கள். இருவரும் சேர்ந்து உபேந்திராவை கொன்று அவனது உடலை முதலைக்கு இரையாக்கி விடுகின்றனர். யாரும் இல்லாத தனிமையில் வாழ்ந்து வந்த உபேந்திராவின் வீட்டிற்குள் காளி மற்றும் சித்தி இதானி இருவரும் செல்கின்றனர். மறுநாள் போலீஸ் உபேந்திரா வீட்டிற்கு வருகிறது.. அங்கு இருக்கும் காளியிடம் போலீஸ் தினமும் காவல் நிலையத்திற்கு வந்து கையெழுத்து இடுமாறு சொல்லிவிட்டு செல்கிறது. அதனால் காளியின் பாதை சொகுசாக இல்லாமல், காளிக்குப் பல்வேறு பிரச்சினைகள் உருவாகி  உபேந்திராவின் உண்மை முகம் தெரிய வரும்போது அவரது வாழ்க்கை சிக்கலாகிறது. அந்த சிக்கலிருந்து மீள்வதற்காக முயலும் காளி உண்மையில் உபேந்திரா யார் என்பதை கண்டுபிடித்தாரா?அவர் எதற்காக பாண்டிச்சேரிக்கு வந்தார்?  காளியின் காதல் நிறைவேறியதா? இல்லையா? என்பதுதான் “ரெட்ட தல” படத்தின் மீதிக்கதை.

இரட்டை கதாபாத்திரங்களில் நடித்திருக்கும் அருண் விஜய் அந்த இரண்டிலுமே வெற்றி பெற்று இருக்கிறார். ஸ்டைலான ஒரு நடிப்பினை படம் முழுவதும் கொண்டு வந்திருக்கிறார். ஆக்‌ஷன் காட்சிகள் ஒவ்வொன்றையும் மிரட்டலாக கொடுத்திருக்கிறார். இரண்டு கதாபாத்திரத்திற்கும் நன்றாகவே வேறுபாடு காட்டி அசத்தி இருக்கிறார் அருண் விஜய்.

பணத்தின் மீது பேராசை கொண்ட ஒரு பெண்ணாக வரும் நாயகி சித்தி இத்னானி எதிர்மறை கதாபாத்திரத்தில் வருகிறார் .அவர் நடிப்பில் குறை சொல்ல ஒன்றுமில்லை என்றாலும் தனக்கு கொடுத்த கதாபாத்திரத்தை உணர்ந்து மிக சிறப்பாக நடித்திருக்கிறார்.

தான்யா ரவிச்சந்திரன், ஹரீஷ் பேராடி, யோகேஷ் சாமி, ஜான் விஜய், பாலாஜி முருகதாஸ் ஆகியோர் கதாபாத்திரங்களுக்கு ஏற்றவாறு  நடித்திருக்கிறார்கள்.

டிஜோ டாமியின் ஓளிப்பதிவு படத்தின் தரத்தை உயர்த்தி இருப்பதோடு ஒவ்வொரு காட்சி வடிவமைப்பும் மற்றும் ஒளியமைப்புகள் மிகவும் ஸ்டைலிஷாக அமைத்து கலர்ஃபுல்லாக ரசிக்க வைத்திருக்கின்றன.

சாம்.சி.எஸ் இசையில் தனுஷ் பாடியுள்ள பாடல் உட்பட எல்லாப் பாடல்களும் கேட்கும் ரகம்தான். பின்னணி இசை காட்சிகளின் விறுவிறுப்பை அதிகரிக்கும் வகையில் நேர்த்தியாக பயணித்திருக்கிறது.

இளமையில் வறுமையில் வாடும் ஓர் இளம்பெண்ணின் வேதனையை  மையமாகக் கொண்டு இப்படத்தின் கதையை அமைத்திருக்கிறார் இயக்குநர் கிரிஷ் திருக்குமரன். முதல் பாதி படம் வேகமாகவும், திருப்பங்களுடனும் பயணிப்பது போல் இரண்டாம் பாதி வேகத்தை குறைத்து, பின்னர் கோவா சம்பவங்கள், திருப்பங்கள் மற்றும் மோதல்கள் போன்ற காட்சிகளுடன் அழுத்தமான மையக்கதையை வைத்துக் கொண்டு குறிப்பாக கிளைமாக்ஸ் காட்சியில் சர்ப்ரைஸ் கொடுத்துள்ளார்.

மொத்தத்தில், ‘ரெட்ட தல’  ஆக்‌ஷன் ரசிகர்களுக்கு விருந்து.

ரேட்டிங் 3/5.

RADHAPANDIAN.