‘யூத்’ திரைப்பட விமர்சனம்!

சென்னை:

பார்வதாஎன்டர்டெய்ன்மெண்ட்ஸ் பிரைவேட் லிமிடெட் சார்பில் கருப்பையா சி. ராம் – சுலோச்சனாகுமார் தயாரித்திருக்கும் ‘யூத்’ படத்தை எழுதி இயக்கியிருக்கிறார் கென் கருணாஸ்.

இப்படத்தில் கென் கருணாஸ், சுராஜ் வெஞ்சாரமூடு, தேவதர்ஷினி , அனிஷ்மா அனில் குமார், மீனாட்சி தினேஷ், பிரியன்யான்ஷி யாதவ், நளினி, சின்னத் தமிழா – தாஜ்மோலா – கெட்டவன் மணிகண்டன் – சுரேன் வின்சென்ட் உள்ளிட்ட பலர் நடித்துள்ளனர்.

இப்படத்தின் கதையைப் பொருத்தவரையில்,

காதல் திருமணம் செய்துகொண்ட தந்தை சுராஜ் வெஞ்சரமூடு மற்றும் அம்மா தேவதர்ஷினியின் மகனாக இருக்கும் கென், பத்தாம் வகுப்பில் குறைந்த மதிப்பெண் எடுத்த காரணத்தால் பதினோராம் வகுப்பில் சேரமுடியாத சூழலில், பள்ளியின் பிரின்ஸ்பல் நளினியிடம் மிகவும் கெஞ்சி கூத்தாடி  11 ஆம் வகுப்பில் சேர்க்கிறார்கள். அந்த பள்ளியில் படிப்பில் கவனம் செலுத்தாமல், தனது நண்பர்களுடன் சேர்ந்துக்  கொண்டு அரட்டை அடிப்பது மற்றும் பள்ளியில் படிக்கும் மாணவிகளை  காதலிப்பதற்காக அவர்களை பின் தொடர்ந்து செல்வது போன்ற செயல்களில் ஈடுபடுகிறார் கென்.இந்த நேரத்தில் அதே பள்ளியில் படிக்கும் மீனாட்சி தினேஷும், கென் போலவே  படிப்பில் அதிக கவனம் செலுத்தாததால் அங்குள்ள ஆசிரியை அவரை வெளியில் நிறுத்தி அவமானபடுத்துகிறார். கென்னும் தண்டனைக்குள்ளாகி வகுப்பறைக்கு வெளியில் நிற்கும்போது இருவரும் தங்களது பார்வையால் காதலை பரிமாறிக் கொள்கிறார்கள்.

தந்தையின் அக்கறை, அம்மாவின் நம்பிக்கை இரண்டையும் நினைத்துப் பார்க்காமல் வயது கோளாறில் எந்த நேரமும் காதல் மயகத்திலேயே இருக்கும் கென் மீனாட்சி தினேஷை காதலிக்கிறார். சில நாட்கள் கடந்த நிலையில் மீனாட்சி தினேஷின் பாட்டிக்கு உடல்நிலை சரி இல்லை என அவர் ஊருக்கு செல்கிறார். ந்த நேரத்தில் அதே பள்ளியில் படிக்கும் இன்னொரு மாணவியான பிரியதர்ஷினி,  கென்னிடம் நெருக்கம் காட்டுகிறார். அவரிடம் நெருங்கி பழகும்போது, இதை நேரில் பார்க்கும் மீனாட்சி தினேஷ் கென் கருணாஸை கன்னத்தில் அறைவதால் இருவரது காதல் முறிந்து போகிறது. இரண்டு காதலும் பொய்த்துப் போனதால், இரண்டும் கெட்டான் நிலையில் சிக்கித் தவிக்கிறார் கென்.

பிறகு கென் கருணாஸிடம் அனிஷ்மா என்ற மூன்றாவதாக ஒரு பெண் அறிமுகமாகிறார். அந்த பெண்ணும் கென்னிடம் நெருக்கமாகப் பழகி, சில விஷயங்களில் உரிமை எடுத்துக் கொண்டு, அரவணைத்து செல்கிறார். இதனல் அனிஷ்மா மீது   கென்னுக்கு காதல் ஏற்படுகிறது.  இந்த சூழலில் கென், அவரைக் காதலிப்பதாகக் கூறும் போது,அனிஷ்மா  மிகுந்த கோபத்துடன் உன்னிடம் நட்பாகத்தான் பழகினேன் அப்படி எல்லாம் நமக்குள் காதல் எதுவும் இல்லை என்று கூறி செல்லும்போது, உடைந்து போன மன நிலையில் இருந்த கென்னிடம் பிளஸ் டூ தேர்வில் தேறிவிட்டால் உன்னை நான் காதலிக்கிறேன் என்ற ஒரு நிபந்தனை விதிக்கிறார். இதனால் கென்னின் வாழ்க்கை எப்படி மாறியது? அதற்கு பிறகு என்ன நடக்கிறது என்பதுதான் “யூத்’ படத்தின் மீதிக் கதை.

கதாநாயகனாக நடித்திருக்கும் கென் கருணாஸ் பள்ளி மாணவனாக துள்ளலான நடிப்பால் காதல், காமெடி , ஆட்டம், பாட்டம், சண்டை என அனைத்திலும் சிறப்பான நடிப்பை அழகாக வெளிப்படுத்தியிருக்கிறார். காதல் தோல்வியின் போது காட்டும் அந்த அப்பாவித்தனம் என அனைத்தையும் மிக எதார்த்தமாகப் பிரதிபலித்துள்ளார்.  இவரே இயக்குநர் என்கிற போது பல முதிர்ச்சியான காட்சிகளும் இருப்பது வியப்பூட்டுகிறது. இப்படத்தில்  கதை முழுவதையும் தனக்கே மையப்படுத்திக் கொள்ளாமல், மற்ற கதாபாத்திரங்களுக்கும் சமமான முக்கியத்துவம் கொடுத்து  இயக்கியிருப்பது பாராட்டுக்குரியது.

கதாநாயகனின காதல் பயணத்தில் வரும் மூன்று கதாநாயகிகளில் ஒருவரான மீனாட்சி தினேஷ் வசீகரமான தோற்றத்தில் வந்து அந்தப் பாத்திரத்தில் குறை சொல்லாமல் நடித்திருக்கிறார் .அடுத்து சோனல் கதாபாத்திரத்தில் மிக நெருக்கமாக  நடித்துள்ள பிரியதர்ஷினி யாதவ் தனக்குக் கொடுத்த வேலையைச் செய்துள்ளார். மூன்றாவதாக கனகா பாத்திரத்தில் வரும் அனிஷ்மா அனில் குமார் சிறந்த முறையில் நடிப்பை வெளிப்படுத்தி ரசிகர்கள் ரசிக்கும் விதத்தில், நன்றாகவே தன்னிடம் உள்ள திறமையை  வெளிப்படுத்தி அசத்தியுள்ளார்.

கென் கருணாஸின் அம்மாவாக வரும் தேவதர்ஷினி  ஒரு நடுத்தரவர்க்க அம்மாவாக  வந்து அனைவரையும் ஈர்க்கிறார். அவரது கணவராக வரும் சுராஜ் வெஞ்சர மூடு அந்த பேக்கரி கடை முதலாளியாகவும் காதல் கணவராகவும் நடுத்தர வர்க்கத்துத் தந்தையாகவும் அவரது நடிப்பு அபாரம்.

கதாநாயகனின் நண்பர்களாக நடித்திருக்கும் அனைத்து நடிகர்களும் கதைக்கு ஏற்றவாறு அதை உணர்ந்து நடித்திருக்கிறார்கள். அந்த குண்டு பையனின் உடல் மொழி மற்றும் காமெடி வசனங்கள் படத்தை கலகலப்பாக நகர்த்தி செல்கின்றன. அது மட்டும் அல்லாமல் இவர்கள் காதலுக்கு குறுக்கே வரும் அந்த உடல் பருமன் கொண்ட பெண்ணும், அவரது தோழியும் என்று அனைவருமே அவரவர் இயல்பாகவே நம் மனதில் பதிகிறார்கள்.

இசையமைப்பாளர் ஜி.வி.பிரகாஷ் குமாரின் இசையில் அனைத்து பாடல்களும் ஹிட் ஆகி உள்ளது. பின்னணி இசை படத்திற்கு மிகப்பெரிய பலமாக உள்ளது.

ஒளிப்பதிவாளர் விக்கி, படத்தை வண்ணமயமாகக் காட்டியிருப்பதோடு, பார்த்தவுடன் பரவசம் கொள்ளும் வகையிலும் காட்சிகளை வடிவமைத்துப் படமாக்கி ரசிக்க வைத்திருக்கிறார்.

இளைய தலைமுறையின் காதல் கனவுகளையும், அதற்குள் மறைந்திருக்கும் குடும்ப உணர்வுகளையும் இணைத்து சொல்லும் முயற்சியாக உருவாகியுள்ள இப்படத்தில் கதாநாயகனாக நடித்து இயக்கவும் செய்து இருக்கிறார் கென் கருணாஸ். காதல், செண்டிமெண்ட், பெற்றோர் பாசம் என ஒரு சராசரி குடும்பத்தின் பிரதிபலிப்பை மனதை நெகிழ வைக்கும் வகையில் கண்களை கலங்க வைத்து விட்டார், ஒரு காதல் கதையாக மட்டும் இல்லாமல், தந்தை-மகன் உறவு மற்றும் கல்வியின் முக்கியத்துவம் குறித்து ஒரு அழுத்தமான செய்தியை இப்படத்தின் மூலம் பதிவு செய்து இருப்பதை பாராட்ட வேண்டும்.

மொத்தத்தில், ‘யூத்’  அனைத்து தரப்பினரும் பார்க்க வேண்டிய படம்.

ரேட்டிங் 4/5.

RADHAPANDIAN.