‘ராவ் பகதூர்’ (தெலுங்கு) திரைப்பட விமர்சனம்!

சென்னை:

சத்யதேவ்,விகாஸ் முப்பாலா ,தீபா தாமஸ்,பால பராசர், திருடா திருடா ஆனந்த், பிரனய் வகா,குணால் கௌசிக்,மாஸ்டர் கிரண்,வெங்கடேஷ் மஹா நடித்துள்ள படம்தான் “ராவ் பகதூர்” இப்படத்தை இயக்குநர் வெங்கடேஷ் மகா எழுதி இயக்கி படத்தொகுப்பு செய்துள்ளார்.

தெலுங்கு மொழி படமான இப்படத்தின் கதையைப் பொருத்தவரையில்,

புவனம் ராமப்பா ராவ் பகதூர், தனது பாரம்பரியமான சொந்தமான மாளிகையான புவனாலயத்தில், மரணத்தை நோக்கி காத்திருக்கும் நோயாளியாகப் படுக்கையில் இருக்கிறார். அவர் கல்லீரல் புற்றுநோயால் அவதிப்படுகிறார். அவரது மரணத்திற்கு மருத்துவர்கள் நாள் குறித்து விட்டதால் மன வேதனையில் இருக்கும் ராவ் பகதூர்,  இந்த வீடு சுடுகாடாகப் போகிறது என்று பிதற்றுகிறார். மருத்துவர்கள் சொன்ன கெடுவை தாண்டியும் இறக்காமல் இருக்கும் அவர், தன் மனதுக்குள் இருக்கும் ஒரு பெரிய ரகசியம் மனதை போட்டு உறுத்துகிறது. இறந்துபோன தனது இளைய மகன் குசுமப்பா என்ற குசுமா, தனது சொந்தக் குழந்தை அல்ல என்ற ரகசியத்தால் பெரிதும் மன உளைச்சலுக்கு ஆளாகிறார். இந்த ரகசியமான விஷயத்திற்கு  விடை கிடைத்தால்தான் நிம்மதியாக உயிர் விட முடியும் என்று தனது நெருங்கிய நண்பரும் மருத்துவருமான விகாஸிடம் அவர் கூறுகிறார்.

ராமப்பா ராவ் பகதூர் தனது வாழ்க்கையின் இறுதிக்கட்டத்தில், கடந்த காலத்தில் செய்த தவறுகளின் குற்றவுணர்வும், மனசாட்சியின் சுமையும் அவரை ஒவ்வொரு நொடியும் வேதனையில் ஆழ்த்தும்போது  அவரது நினைவுகளின் வழியே விரியும் இந்தக் கதை 60 களுக்கு பயணிக்கிறது.  கடந்த காலமும் நிகழ்காலமும் மாறி மாறி சொல்லப்படும் “ராவ் பகதூர்” படத்தின் கதை பல்வேறு ரகசியங்களை வெளிப்படுத்துகின்றன. அவை பார்வையாளர்களுக்கு அதிர்ச்சி தரும் வகையில் உள்ளன. ராமப்பா ராவ் பகதூரின் காதல், குடும்பம், மகனுடன் ஏற்பட்ட விரிசல் மற்றும் கடந்த காலத்தில் ஏற்பட்ட சம்பவங்களைப்பற்றி சொல்லும் படம்தான் ராவ் பகதூர்’

ராமப்பா என்கிற கதாபாத்திரத்தில் நடித்திருக்கும் சத்யதேவ் இயல்பான நடிப்பை வெளிப்படுத்தியிருக்கிறார். பல்வேறு காலகட்டத்திற்கு ஏற்றவாறு வயது, தோற்றம், கோபம், அழுகை என அனைத்து உணர்வுகளையும் உள்வாங்கி உணர்வு பூர்வமான நடிப்பை வெளிப்படுத்தி இருக்கிறார். அந்த கதாபாத்திரமாகவே யதார்த்தமாக நடித்து வாழ்ந்து இருக்கிறார்.

சத்யதேவ் மனைவியாக நடித்திருக்கும் தீபா தாமஸ்  துணிச்சல் மிக்க கதாபாத்திரத்தில் கவனத்தை ஈர்க்கிறார் . மருத்துவராக நடித்துள்ள விகாஸ் மப்புலா கதையின் நகர்வுக்கு உறுதுணையாக இருக்கிறார்.

பாலா பரசர், ஆனந்த் பாரதி, பிரணய் வேகா, மாஸ்டர் கிரண் உள்ளிட்ட அனைவரும் தங்களுக்கான கதாபாத்திரங்களில் சிறப்பாக பொருந்தியுள்ளனர். யாரும் கதாபாத்திரத்தை மீறி நடிக்காமல், இயல்பான நடிப்பின் மூலம் படத்தின் நம்பகத்தன்மையை உயர்த்துகின்றனர்.

இசையமைப்பாளர் ஸ்மரன் சாய் இசையில் பாடல்கள் கேட்கும் ரகம். பின்னணி இசை படத்திற்கு மிகப் பெரிய பலத்தை சேர்த்து உள்ளது.

இரண்டு தலைமுறைக் கதையை கூறும் போது அதற்கான ஒளி அமைப்பையும் பயன்படுத்தி, மிக சிறந்த முறையில்  ஒளிப்பதிவு செய்துள்ளார் கார்த்திக் பர்மர்.

சாதி ஆதிக்கம், நிறவெறி, பரம்பரை பெருமை, மனித மனத்தின் குற்றவுணர்வு போன்ற சமூகத்தின் ஆழமான உண்மைகளை வெளிப்படுத்தி வர்க்கப் பாகுபாடுகளை பற்றி சிறந்த முறையில் பேசியிருக்கிறார் இயக்குனர்.. தெலுங்கு சினிமாவின் வழக்கமான கமர்ஷியல் பாணியை தவிர்த்து, உலகத் தரத்தில் ஒரு உளவியல் பீரியட் திரைப்படத்தை உருவாக்கியிருக்கும் இயக்குநர் வெங்கடேஷ் மஹா, நவீன தொழில்நுட்பங்கள்,.மாய யதார்த்த வாதக்காட்சிகள் மூலம் படம் பார்ப்பவர்களுக்கு புதிய அனுபவத்தை கொடுத்து இருக்கிறார்.

மொத்தத்தில் “ராவ் பகதூர்”  தரமான திரில் நிறைந்த பீரியட் படம்.

ரேட்டிங் 3/5.

RADHAPANDIAN.