‘ஒன் மேன்’ – திரைப்பட விமர்சனம்!

சென்னை:

‘ஒன் மேன்’ (One Man) என்ற இப்படத்திற்கு எழுத்து, இயக்கம், ஒளிப்பதிவு, படத்தொகுப்பு, இசை உட்பட அனைத்து துறைகளையும் சங்ககிரி ராஜ்குமார்  தனி ஒருவனாக திரைப்படக்கலையின் 24 துறைகளையும் ஒரே மனிதர் ஏற்றுக்கொண்டு அனைத்து விதமான கதாபாத்திரங்களிலும் தானே நடித்து ஒரு முழுநீளப் படமாக உருவாக்கியிருக்கிறார்.

இப்படத்தின் கதையைப் பொருத்தவரையில்,

ராஜா,பூமா,ஜாக்கி,ரூபி உள்ளிட்ட நண்பர்களுடன் கார் ஓட்டுநர் ஒருவரும் இணைந்து ஓர் அறிவியல் மாநாட்டில் கலந்துகொள்ளச் செல்கிறார்கள். அவர்கள் சென்ற வழியில் ஐந்து பேர் செல்லும் இவர்களது வாகனம் பழுதாகி விடுகிறது. அதைச் சரி செய்ய சிலமணி நேரம் ஆகும் என்ற நிலையில் காட்டுக்குள் அனைவரும் போகிறார்கள்.அங்கு ஒரு பழைய அறிவியல் ஆய்வகம் இருக்கின்ற சூழலில் மர்மமான ஒரு சோதனைக் கூடத்தைக் கண்டுபிடிக்கிறார்கள். அங்கே ஒரு செல்போன் கிடைத்ததால் அதன் மூலம் அவர்களுக்கு கிடைத்த தகவல் அதிர்ச்சியளிக்கிறது.அதில் ஒரு வீடியோ இருக்கிறது. அதை பார்த்த போது மனிதனின் பேராசையால் ஒரு உயிரினம் கூட இல்லாமல் இந்த உலகம் அழிந்துவிடும் என்று ஒரு கண்டுபிடிப்பின் ரகசியம் தெரிய வருகிறது.

அதாவது அங்கிருக்கும் ஒரு சிவப்பு நிற திரவத்தை ஊசி மூலம் ஏற்றிக்கொண்டு,சிவப்பு நிறக் காற்றை விடுவித்தால் அந்தக்காற்று சில நொடிகளில் உலகம் முழுவதும் பரவி எல்லா மனிதர்களும் மறைந்து விடுவார்கள்.அந்த ஊசியைப் போட்டுக் கொண்டவர்கள் மட்டும் உலகத்தில் இருப்பார்கள். மறைந்த உலகமக்கள் எல்லாம் மீண்டும் வர பத்துநாட்கள் ஆகும்.அந்த பத்து நாட்களும்,ஊசிபோட்டுக் கொண்டவர்கள் மட்டுமே இருப்பார்கள் என்பதை அறிந்த,நான்கு நண்பர்களும் சிவப்புநிற ஊசி போட்டுக்கொண்டு உலகில் அவர்கள் மட்டுமே இருக்கும் சூழலை உண்டாக்குகிறார்கள். அதைச்செயல் படுத்தி அதற்குள் அவர்கள் தாங்கள் விரும்பிய அனைத்தையும் சாதித்துக் கொள்ளத் துடிக்கிறார்கள். அவர்கள் செய்யும் ஒரு செயல் மிகப்பெரிய விபரீதமாக மாறுகிறது. அதன் விளைவாக மனித இனம் அழியும் நிலை ஏற்படுகிறது. இறுதியில் இந்த விபரீத விளையாட்டின் முடிவு என்ன ஆயிற்று?  என்பதை விவரிப்பதுதான் ” ‘ஒன் மேன்’ (One Man)  படத்தின்கதை.

ஒரு திரைப்படத்தில் இயக்குநர், நடிகர், ஒளிப்பதிவாளர், இசையமைப்பாளர், எடிட்டர் என ஒவ்வொரு துறைக்கும் தனித்தனி கலைஞர்கள் பணியாற்றுவது வழக்கம். ஆனால் இங்கு சங்ககிரி ராஜ்குமார்  தனி ஒருவனாக அந்த எல்லைகளை கடந்து, பல்வேறு பொறுப்புகளை ஏற்று பணியாற்றி இருப்பதை கண்டிப்பாக பாராட்டியே தீர வேண்டும்.

கிராபிக்ஸ் மற்றும் தொழில்நுட்பத்தின் உதவியுடன் உருவாக்கப்பட்ட பல காட்சிகள்,  இந்தப் படத்தின் மாறுபட்ட  முயற்சிக்கு பெரிய அளவில் பலம் சேர்த்து இருக்கின்றன. மேலும், வெளிநாட்டில் பிரம்மாண்டமாக படமாக்கப்பட்ட திரைப்படத்தைப் போன்ற காட்சியமைப்பும், தொழில்நுட்ப நேர்த்தியும், வனப்பகுதியில் படமாக்கப்பட்ட கூட்டம் நிறைந்த காட்சிகள் என்று அனைத்தையும் பிரமிக்க வைக்கும் விதத்தில்  உருவாக்கி அனைவரையும் வியக்க வைத்திருக்கிறார் இயக்குனர். கார், ரயில் பயணம், ஹெலிகாப்டர் ,விமானம் பயணங்கள் அதில் நிகழும் சாகசங்கள் சண்டைக் காட்சிகள் போன்றவைகள் இப்படத்தின் மீதான ஆர்வத்தை அதிகமாக தூண்டச் செய்கின்றன.

மொத்தத்தில், ‘ஒன் மேன்’  கண்டிப்பாக அனைவரையும் ரசிக்க வைக்கும் படம்.

ரேட்டிங் 3.5/5.

RADHAPANDIAN.