‘ஒன்ஸ்மோர்’ – திரைப்பட விமர்சனம்!

சென்னை:

அர்ஜுன் தாஸ் ,அதிதி ஷங்கர், ட்ராவிட் செல்வம், தேவதர்ஷினி, சோனா ஒலிக்கல்,அனுஷா பிரபு ,ஜெகபர், மோனிஷ் இளமாறன், வர்ணிகா பரத் ,அருண்குமார் மணி ,சௌந்தர்யா மனோகரன், சித்ரா லக்ஷ்மணன் ,தேவதர்ஷினி, ஜென்சன் திவாகர் ,தயாளன், மகேஸ்வர், குட் நைட் நாகராஜன் ,ரித்திக் கிருஷ்ணா ,ரமா ராஜேந்திரா ,லட்சுமி சரவணன்,சுதர்சன் காந்தி  மற்றும் பலர் நடித்துள்ள படம்தான் “ஒன்ஸ் மோர்” . இப்படத்தை விக்னேஷ் ஸ்ரீகாந்த் எழுதி இயக்கியுள்ளார்.

இப்படதின் கதையைப் பொருத்தவரையில்,

தனது கடந்த காலக் காதல் நினைவுகளை மறக்க முடியாமல் மன அழுத்தத்தில் இருக்கும் அர்ஜுன் தாஸ் தன் உணர்வுகளை யாரிடமும் சொல்ல முடியாமல் தவித்துக் கொண்டிருக்கிறார். இந்த சூழலில் அர்ஜுன் தாஸ் காதலித்த பெண் எந்த ஒரு காரணத்தைச் சொல்லாமலேயே தன் உறவைத் துண்டித்துக் கொண்டு பிரிந்து சென்று விடுகிறாள், அதனால் மனம் உடைந்த காதலன் அர்ஜுன் தாஸ் 8 ஆண்டுகள் எந்தவித பிடிப்பும் இல்லாமல் இறுக்கமான முகத்துடன் கவலை தோய்ந்த கண்களுடன் நடைப்பிணம் போல் வாழ்ந்துக் கொண்டிருக்கிறார்.

ஒரு நாள் மோட்டார் சைக்கிள் பழுதாகி நின்றதால் அதை மெக்கானிக்கிடம் கொடுத்து விட்டு, பேருந்து நிலையத்தில் காத்திருக்கும் சூழலில், அங்கு கல்லூரி ஜூனியர் மாணவி அதிதி சங்கர் தனது காரில் லிஃப்ட் கொடுக்கிறார். முதலில் அந்த காரில் ஏற மறுத்த அர்ஜுன் தாஸ், பிறகு அதிதி சங்கரின்  வற்புறுத்தலுக்கு இணங்கி, வேண்டா வெறுப்பாக அவரது காரில் ஏறிக்கொள்கிறார். காரில் போகும்போது அவரிடம் பேச்சுக் கொடுத்துக்கொண்டே வருகிறார் அதிதி சங்கர் . ஆனால் அர்ஜுன் தாஸுக்கோ  அவருடன் பேசப் பிடிக்காமல் அவர் கேட்ட கேள்விகளுக்கு மட்டும் ஒற்றை வார்த்தையில்  பதில் சொல்லியபடி வருகிறார். இந்த சூழலில் திடீரென்று அதிதி சங்கர், அர்ஜுன் தாஸிடம் “நாம இருவரும் கல்யாணம் பண்ணிக்கலாமா? என்று கேட்கிறார். இதனால் அதிர்ச்சியடைந்த அவர் என்ன சொல்வதென்று புரியாமல் மறுக்கிறார்.

அதிதி சங்கர் மீண்டும் மீண்டும் வற்புறுத்தவே அனைத்தையும் மறந்து அவளுடன் இணையலாம் என்று முடிவு எடுத்து திருமணம் செய்துக் கொள்ள ஒப்புக் கொள்கிறார் அர்ஜுன் தாஸ்.  இரு வீட்டாரின் சம்மதத்துடன் திருமண வரவேற்பு மிக அழகாக நடந்துக் கொண்டிருக்கும்போது மணமகள் அதிதி சங்கருடன் மேடையில் நின்று கொண்டிருக்கும் சூழலில் மணமகனான அர்ஜுன் தாஸுக்கு ஒரு தொலைபேசி அழைப்பு வருகிறது. அந்த ஒரு தொலைபேசி அழைப்பு அனைத்தையும் தலைகீழாக மாற்றுகிறது! அர்ஜுன் தாஸின் பழைய காதலி சோனா ஒலிக்கல் மீண்டும் அவர் வாழ்க்கைக்குள் நுழைகிறார். இதனால் கலக்கமடைந்த அர்ஜுன் தாஸ் என்ன செய்வதென்று புரியாமல் தவிக்கிறார். இறுதியில் அர்ஜுன் தாஸ், அதிதி சங்கரை திருமணம் செய்துக் கொண்டாரா? இல்லையா/ என்பதுதான் “ஒன்ஸ் மோர்’ படத்தின் மீதிக் கதை.

ரகுவரன் எனும் கதாபாத்திரம் ஏற்றிருக்கும் அர்ஜுன் தாஸுக்கு இப்படத்தில் கடந்த கால காயங்கள் மற்றும் மன அழுத்த உணர்ச்சிகள்  காதல் தோல்வியின் தாக்கத்திலிருந்து முழுமையாக வெளியே வராத இளைஞராக மிக பொருத்தமாக நடித்திருக்கிறார்.  காதல் குழப்பத்தில் அவர் தவிக்கும் காட்சிகள் அனைவரையும் கவரும் வகையில் அமைந்துள்ளன.

காதலியாக நடித்திருக்கும் அதிதி சங்கரும் தனது கதாபாத்திரத்திற்கு தேவையான துறுதுறுப்பான நடிப்பை கொடுத்திருக்கிறார். ஜெனிலியா நடித்த ’சந்தோஷ் சுப்பிரமணியம்’ படத்தின் நாயகி ஹாசினி கதாபாத்திரத்தைக் கொஞ்சம் நினைவூட்டக் கூடிய துடிப்பான கதாபாத்திரத்தில் யதார்த்தமான எதையும் இலகுவாக எடுத்துக் கொள்ளும் மனப்போக்கு கொண்டவராக மிக சிறப்பாக நடித்திருக்கிறார்.

இன்னொரு நாயகியாக நடித்திருக்கும் சோனா ஒலிக்கல் கதாபாத்திரம் காதலின் பரிமாணங்களைச் சொல்வதற்காக படைக்கப்பட்டிருக்கிறது.அதற்கு ஏற்றவாறு தன் கதாபாத்திரத்தை உணர்ந்து தனது அழகாலும் இயல்பான தோற்றத்தாலும் பொருத்தமாக நடித்திருக்கிறார்.

இதில் நடித்திருக்கும் அனுஷா பிரபு ,ஜெகபர், மோனிஷ் இளமாறன், வர்ணிகா பரத் ,அருண்குமார் மணி , சௌந்தர்யா மனோகரன், சித்ரா லக்ஷ்மணன் ,தேவதர்ஷினி, ஜென்சன் திவாகர் ,தயாளன், மகேஸ்வர், குட் நைட் நாகராஜன் ,ரித்திக் கிருஷ்ணா ,ரமா ராஜேந்திரா ,லட்சுமி சரவணன்,சுதர்சன் காந்தி  போன்ற பலரும் அந்தக் கதை ஓட்டத்திற்கு ஏற்றவாறு நடித்து இருக்கிறார்கள்.

அரவிந்த் விஸ்வநாதன் ஒளிப்பதிவில் இனிமையான இந்த அழகான காதல் கதைக்கு உண்டான காட்சிகளை  நம் கண்முன் கொண்டு வந்திருக்கிறார்.

இப்பபடத்தில்  ஹேஷம் அப்துல் வஹாப் அமைத்துள்ள இசை பெரும் பலமாக மாறி உள்ளது.சமீப காலப் படங்களில் பாடல்கள் கூச்சல்களாக வரும் சூழலில் இந்த படத்தில் ஏராளமான பாடல்கள் இருந்தாலும் நமக்கு போரட்டிக்கவில்லை.

இப்படத்தை எழுதி இயக்கியிருக்கிறார் விக்னேஷ் ஸ்ரீகாந்த். கதைக்கரு பழையது தான் என்றாலும், மனதில் நிற்கக் கூடிய புதிய காட்சிகளைக் கொண்டு, பார்வையாளர்களை ரசிக்க வைக்க முயற்சி செய்து இருக்கிறார். அர்ஜுன் தாஸின் முன்னாள் காதலியாக உறவாடிச் செல்கிற  சோனா ஒலிக்கல் பிரிவதற்கான  காரணத்தைத் தெளிவாகச் சொல்லாதது ஏன்? காதலின் சில நுட்பமான விஷயங்களைப்பற்றி  சொல்லி இருந்தாலும் அவற்றைக் கோர்வையாக காட்சி அமைத்து செல்வதில் தடுமாறியிருக்கிறார் இயக்குனர்.

மொத்தத்தில், ‘ஒன்ஸ்மோர்’ வித்தியாசமான காதல் கதையை சொல்ல முயற்சி செய்தாலும் படம் ஓகே.

ரேட்டிங் 3/5.

RADHAPANDIAN.