’நூறு கோடி வானவில் ’ – திரைப்பட விமர்சனம்!

சென்னை:

ஹரிஷ் கல்யாண், சித்தி இத்னானி, கோவை சரளா, தம்பி ராமையா சின்னி ஜெயந்த், சம்பத், எம் ரினில், வி ஜே பார்வதி மற்றும் பலர் நடித்துள்ள படம்தான் ‘நூறு கோடி வானவில்’. இப்படத்தை இயக்குநர் சசி இயக்கி உள்ளார்.

இப்படத்தின் கதையைப் பொருத்தவரையில்,

ஹரிஷ் கல்யாண் இளமைத் துடிப்புள்ள செய்தி சேகரிப்பதில் வல்லவர். இவ்ர் மும்பையில் உள்ள ஒரு தனியார் தொலைக்காட்சியில் பணிபுரிகிறார். அவர் ஒரு நாள் அலுவல் ரீதியாக கோவா கிளைக்கு மாற்றப்படுகிறார். அங்கு புதிய தொலைக்காட்சி நிகழ்ச்சி ஒன்றை உருவாக்கும் பொறுப்பு அவருக்கு வழங்கப்படுகிறது. அந்த முயற்சியின்போது சித்தி இத்னானியைச் சந்திக்கிறார். சித்தியின் காதலன் ரிச்சி விபத்தில் சிக்கி பல நாட்களாக கோமாவில் இருக்கிறார். என்றாவது ஒருநாள் காதலன் மீண்டு வருவார் என்ற நம்பிக்கையில தினமும் தனது வாழ்க்கையில் நடக்கும் சம்பவங்களை வீடியோவாகப் பதிவு செய்து அவருக்குக் காண்பித்து வருகிறார். அவர் மீண்டும் குணமடைந்து வந்தால் அந்தத் தருணங்களைக் காண்பிக்க வேண்டும் என்பதே அவரது விருப்பம்.  பல நாட்களாக கோமாவில் இருக்கும் ரிச்சி மீது சித்தியின் இந்தக் காதல் ஹரிஷை ஆச்சரியப்படுத்துகிறது.

தொடக்கத்தில் ஹரிஷ்- சித்தி இருவருக்குள் முரண்பாடும் மோதலுமாகச் செல்கிறது . இந்த சூழலில் இருவருக்கும் இடையே ஏற்படும் மோதல்கள் மெல்ல நட்பாக மாறுகின்றன.  சித்தியின் காதல் பற்றி தெரிந்தாலும், அவர் மீது ஹரிஷ் கல்யாணுக்கு காதல் மலர்கிறது.ஆனால் ரிச்சியின் நினைவுகளோடு வாழும் சித்தியால் ஹரிஷின் காதலை ஏற்றுக்கொள்ள முடியவில்லை. ஒருபுறம் தன்னை நன்றாகப் புரிந்துகொள்ளும் ஹரிஷ் மீது ஈர்ப்பு இருந்தாலும், மறுபுறம் இத்தனை நாட்களாகத் தான் நேசித்த ரிச்சி மீதான காதலையும் கைவிட முடியாமல் தவிக்கிறார் சித்தி. இப்படிப்பட்ட சூழலில் கோமாவில் இருந்த ரிச்சி குணமடைந்து திரும்புகிறார். அவரையும் தொலைக்காட்சி நிகழ்ச்சியில் இணைத்துக்  கொள்ள விரும்புகிறார் ஹரிஷ் கல்யாண். அதன் பிறகு சித்தியின் வாழ்க்கையில் என்ன நடக்கிறது? ரிச்சியின்பழைய காதலா அல்லது ஹரிஷின் புதிய காதலா என்ற குழப்பத்திற்கு ஆளாகும் சித்தி இறுதியில்  எடுக்கும் முடிவு என்ன? ஹரிஷின் காதல் வெற்றி பெற்றதா? இல்லையா? என்பதே படத்தின் மீதிக்கதை.

வினோத் என்ற கதாபாத்திரத்தில் தோன்றும் ஹரிஷ் கல்யாண், வழக்கமான துள்ளலான கதாநாயகன் என்ற பிம்பத்தைத் தாண்டி, உணர்ச்சிகரமான தளத்தில் தனது முதிர்ச்சியான நடிப்பை மிக சிறப்பாக வெளிப்படுத்தியுள்ளார். காதல், நகைச்சுவை, உணர்ச்சிப் போராட்டம் எனப் பல்வேறு தருணங்களிலும் தனது நடிப்பின் மூலம் கதைக்கு பலம் சேர்க்கிறார்.

கன்னக்குழி  அழகி நாயகி சித்தி இத்னானி தனது அழகான தோற்றத்தாலும், இயல்பான நடிப்பாலும் ரசிகர்களைக் கவர்கிறார். குறிப்பாக காதலுக்கும் கடமைக்கும் இடையில் சிக்கித் தவிக்கும் பெண்ணின் மனநிலையைத் தனது முகபாவனைகள் மற்றும் நடிப்பின் மூலம் சிறப்பாக வெளிப்படுத்தியிருக்கிறார்.

ரிச்சியாக நடித்திருக்கும் ரினிலும் தனது இயல்பான நடிப்பால் கவனம் பெறுகிறார்.தனது காதலி இன்னொருவருடன் பழகுவதைப் பொறுக்காமல் முகத்தில் காட்டும் அந்த உணர்ச்சிகள் ரசிக்க வைக்கிறது.

விஜே பார்வதியின் சுரு சுருப்பன பேச்சும், துறு துறு செயலும் நகைச்சுவை காட்சிகளுக்கு கைகொடுத்திருப்பதோடு, ரசிகர்களை சிரிக்கவும் வைக்கிறது.

கோவை சரளா, தம்பி ராமையா, சின்னி ஜெயந்த், சம்பத் ராஜ் உள்ளிட்ட நடிகர்களும் தங்களுக்குக் கொடுக்கப்பட்ட கதாபாத்திரங்களுக்கு ஏற்ப சிறப்பாக நடித்து நிறைவு செய்து இருக்கிறார்கள்.

ஒளிப்பதிவாளர் பிரசன்னா கே.குமார், மும்பை, கோவா ஆகிய ஊர்களின் அழகையும் இயற்கை எழில் மிகுந்த இடங்களையும், காதலர்களின் உணர்வுகளையும் பார்வையாளர்கள் மனதில் நேர்த்தியாகவும் ரசிக்கும்படியும் கலர்ஃபுல்லாக காட்டியிருக்கிறார்.

சித்துகுமாரின் இசை படத்தில் கதாபாத்திரங்களின் காதல் உணர்வுகளை நம்மை ஒன்ற வைக்கிறது. பாடல்கள் அனைத்தும் கவனம் பெறுகின்றன.

இயக்குநர் சசி மனித காதல் உணர்வுகள் மற்றும் காதலர்களின் மனப் போராட்டங்கள் பற்றியும் மிக சிறப்பாக அன்றாட வாழ்க்கையின் சிக்கல்களை ஆழமாகப் பேசும் கதைகளை உருவாக்குவதில் வல்லவர் என்பதால் இதிலும் அதே பாதையில் சென்றுள்ளார். ஒரு முக்கோணக் காதல் கதையில் பெரிய அளவில் புதுமை இல்லை என்றாலும் ஆரம்பத்தில் சுவாரஸ்யமாக நகரும் காட்சிகள், ஒரு கட்டத்திற்குப் பிறகு வழக்கமான காதல் படங்களின் பாதையில் பயணிக்கின்றன.

மொத்தத்தில் ‘நூறு கோடி வானவில்’ படத்தில் மனித உறவுகளின் பல்வேறு உணர்வுகளைச் சொல்ல முயற்சித்திருக்கிறார் இயக்குநர் சசி.

ரேட்டிங் 3/5.

RADHAPANDIAN.