“டங்கி” -திரைப்பட விமர்சனம்!

சென்னை:

இந்தி மொழியில் காமெடி சென்டிமென்ட் கலந்து உருவாகி வெளியாகியுள்ள படம், “டங்கி” ஷாருக்கான் கதாநாயகனாக நடித்திருக்கும் இப்படத்தில், பூமன் இரானி, டாப்ஸி பண்ணு, விக்கி கௌஷல், விக்ரம் கோச்சார், அனில் குரோவர் உள்ளிட்ட நட்சத்திரக் குழு,  நடித்துள்ள, இத்திரைப்படத்தை ஜியோ ஸ்டுடியோஸ், ரெட் சில்லீஸ் என்டர்டெயின்மென்ட் மற்றும் ராஜ்குமார் ஹிரானி பிலிம்ஸ் வழங்குகிறார்கள், ராஜ்குமார் ஹிரானி மற்றும் கௌரி கான் இணைந்து  தயாரித்துள்ளனர். அபிஜத் ஜோஷி, ராஜ்குமார் ஹிரானி மற்றும் கனிகா தில்லான் இணைந்து எழுதியுள்ளனர். இந்த 2023ஆம் ஆண்டு முன்னதாக வெளியான பதான் , ஜவான் வெற்றி திரைப்படத்தைத் தொடர்ந்து இந்த ஆண்டின் பெரிய வெற்றியை கொடுக்கும் படமாக நடிகர் ஷாருக்கான் நடித்த “டங்கி”  அமையும் என்பதில் ஐயமில்லை.

டிசம்பர்  21 ஆம் தேதி இன்று வெளியாகி இருக்கும் இந்த ‘டங்கி’ படத்தின் கதையைப் பொறுத்தவரையில்,

சட்டவிரோதமாக எல்லையை தாண்டிச் நாடு விட்டு நாடு செல்லும் மக்களின் பயணம் ‘டங்கி’ (Dunki) என்று அழைக்கப்படுகிறது. அப்படி தங்களது  உயிரைப் பணயம் வைத்து வேறொரு நாட்டில் தஞ்சம் அடையும் மக்களின் வலியையும், அதற்கு ஏற்படும் வேதனைகளைப்பற்றி எடுத்து சொல்லும் படம்தான் “டங்கி’\”  பஞ்சாபில் உள்ள லால்டு என்ற கிராமத்தில் வாழ்ந்து வரும் டாப்ஸி, விக்ரம் கோச்சார், அனில் குரோவர் ஆகிய மூவரும் வெவ்வேறு விதத்தில்  பணப் பிரச்சினையில் சிக்கி தவிக்கின்றனர். இந்நிலையில் இரண்டாம் உலகப் போருக்குப் பிறகு இங்கிலாந்து நாட்டில் மனித வளம் குறைந்ததால், பிற நாட்டு மக்களை பணிக்கு அமர்த்துகின்றனர். இதை பயன்படுத்தி, பஞ்சாப் மாநிலத்தைச் சேர்ந்த பலர் இங்கிலாந்து நாட்டுக்கு பணிக்காக செல்கின்றனர்.

டாப்ஸியும் அவரது இரண்டு நண்பர்களும், பொருளாதார பிரச்சனையில் இருந்து மீள, பணம் சம்பாதிப்பதற்காக இங்கிலாந்து நாட்டுக்கு செல்ல முயற்சிக்கிறார்கள். இங்கிலாந்து செல்ல வேண்டுமென்றால் ஆங்கிலம் தெரிந்திருக்க வேண்டும். விசா வாங்கும்போது நடக்கும் ஆங்கில தேர்வில் வெற்றி பெற்றால்தான் விசா என்ற நிலையில்  அந்த மூவருக்கும் ஆங்கிலம் தெரியாததால்  விசா மறுக்கப்படுகிறது. அப்போதுதான்  சட்ட விரோதமாக மாற்றுப்பாதையில் இங்கிலாந்து செல்லும்.ஐடியா கிடைக்கிறது. டாப்ஸி மற்றும் அவரது நண்பர்களை முன்னாள் ராணுவ வீரரான ஷாருக்கான், டங்கி வழி என்று சொல்லக்கூடிய சட்டவிரோதமான முறையில் இங்கிலாந்து நாட்டுக்கு அழைத்துச் செல்கிறார்.

அவர்கள் ஒவ்வொரு நாட்டு எல்லையை கடப்பதற்குள் பலவித தாக்குதல்களை எதிர்கொள்ள நேரிடுகிறது.. சிலரை இழக்க வேண்டிய சூழலும்  ஏற்படுகிறது. இறுதியில்  பல போராட்டங்களை கடந்து  இங்கிலாந்து செல்கின்றனர். அங்கு  காவல்துறையினரிடம் சிக்கி கொள்கின்றனர். அதன்பிறகு நடப்பது என்ன?  இங்கிலாந்து காவல்துறையினரிடம் சிக்கி கொண்ட அவர்கள் தப்பித்தார்களா? இல்லையா? என்பதுதான் ‘டங்கி‘ படத்தின் மீதிக் கதை.

இளம் வாலிபர் மற்றும் வயதானவர் ஆகிய இரண்டு தோற்றங்களில் நடித்திருக்கிறார் ஷாருக்கான். நகைச்சுவை, காதல், கோபம், சோகம் ஆகிய எல்லா உணர்வுகளையும் வெளிப்படுத்தக் கூடிய ஒரு உன்னதமான கதாபாத்திரத்தில் நடித்திருக்கிறார். எந்த கதாபாத்திரம் கொடுத்தாலும் அதில் நான் சிறப்பாக நடிக்க முடியும் என்பதை இந்தப்படத்திலும் நிரூபித்திருக்கிறார். மீசை மற்றும் தாடி இல்லாமல் இளைஞராகவும்  நரைத்த முடியும் மற்றும் நரைத்த தாடியுடன் வயதான கதாபாத்திரங்களில் மிகவும் அருமையாக நடித்திருக்கிறார்.டாப்சியிடம் காதல் சொல்லும் காட்சி,நீதிமன்றக் காட்சி ஆகியன அவருடைய நடிப்புக்குப் பலம் சேர்க்கின்றன..

கதாநாயகியாக நடித்திருக்கும் டாப்சி தன் கதாபாத்திரத்தை உணர்ந்து மிக சிறப்பாக நடித்திருக்கிறார்.  கதையின் தொடக்கமும் முடிவும் அவரைச் சுற்றியே வலம் வந்தாலும் அவர் எடுத்துக் கொண்ட கதாபாத்திரம் ரசிகர்கள் ரசிக்கின்ற அளவிற்கு சிறப்பாக அமைந்திருக்கிறது. ஒவ்வொரு காட்சியிலும் ஷாருக்கானுக்கு ஈடுகொடுத்து நடித்திருக்கிறார். அவருடைய மெல்லிய புன்சிரிப்பு பல காட்சிகளுக்கு உயிர் கொடுத்திருக்கிறது.

பொம்மன் இரானி, விக்ரம் கோச்சார், அனில்குரோவர் மற்றும் சிறப்புத் தோற்றத்தில் வரும் விக்கிகவுசல் ஆகியோரும் தங்கள் பங்களிப்பை நிறைவாகச் செய்திருக்கிறார்கள்.

மனுஷ்நந்தன், சி.கே.முரளிதரன், அமித்ராய் ஆகியோர் ஒளிப்பதிவு செய்திருக்கிறார்கள். இயற்கை எழில் மிகுந்த பகுதிகளை அனைவரும் ரசிக்கும் விதத்தில் படமாக்கி இருக்கிறார்கள்.

இசையமைப்பாளர் ப்ரீதமின் இசையில் பாடல்கள் அனைத்தும் கேட்கும் ரகம்தான். அமன்  பந்தின் பின்னணி இசை கதைக்கு ஏற்ப பயணித்து படத்திற்கு பலம் சேர்த்திருக்கிறது.

வெளிநாட்டு மோகத்தால் சொந்த நாட்டில் இருந்து சட்டவிரோதமாக நாடு விட்டு நாடு செல்பவர்களின் வலியை மிக தெளிவாக சொல்லியுள்ளார் இயக்குனர் ராஜ்குமார் ஹிரானி.. லண்டன் நீதிமன்றத்தில் நடக்கும் விவாதங்களில் ஒவ்வொரு நாடும் தங்கள் நாட்டுக்குள் பிற நாட்டினரை வர வைத்திருக்கும் நிபந்தனைகளை மாற்றியமைக்க வேண்டும் என்கிற உலகந் தழுவிய ஆழமான கருத்தை நகைச்சுவையாகவும், அதே நேரத்தில் அது பேசிய அரசியலும் பார்வையாளர்களை கவர்ந்து. பேசப்படுகின்ற மாதிரி இப்படத்தை  இயக்கி இருக்கும் ராஜ்குமார் ஹிரானிக்கு பாராட்டுக்கள்.

மொத்தத்தில், இந்த ‘டங்கி’ படம்  ஷாருக்கானின் வெற்றிக்கு ஏற்றதாக உள்ளது.

ரேட்டிங் 3/5.

RADHAPANDIAN.

.