’ஸ்டார்’ திரைப்பட விமர்சனம்!

சென்னை:

கவின், அதிதி போஹங்கர், லால், கீதா கைலாசம், ப்ரீத்தி முகுந்தன், ராஜா ராணி’ பாண்டியன், தீப்ஸ், மாறன், காதல் சுகுமார், நிவேதிதா ராஜப்பன், சஞ்சய் ஸ்வரூப், தீரஜ், மற்றும் பலர் நடித்திருக்கும் படம்தான் ‘ஸ்டார்’ இப்படத்திற்கு கதை எழுதி இயக்கி இருக்கிறார் இளன். பி வி எஸ் என் பிரசாத், ஸ்ரீநிதி சாகர் தயாரித்திருக்கின்றனர்.

இப்படத்தின் கதையைப் பொருத்தவரையில்,

நடிகர் திலகம் சிவாஜியின் நடிப்பை பார்த்து தானும் இந்த திரைப்படத்துறையில் ஒரு நடிகராக சாதிக்க வேண்டும் என்ற எண்ணத்தில் நடிப்பின் மீது உள்ள ஆர்வத்தால் தனது சொந்த ஊரை விட்டு ஓடி வந்த லால்  சினிமாவில் நடிக்க பல இடங்களில் வாய்ப்பு தேடி அலைகிறார். . ஆனால் அவருக்கு திரைப்படத்தில் நடிக்க வாய்ப்பு கிடைக்காமல் போனதால் ஒரு புகைப்பட கலைஞராக உருவாகிறார். இந்நிலையில் திருமணம் செய்து கொண்டதால் தனக்குதான் சினிமாவில் வாய்ப்பு கிடைக்கவில்லை என்றாலும் தன் மகனை சினிமாவில் நடிக்க வைக்க ஆசைப்படுகிறார் லால்.. அவனை பள்ளி நாடகங்களில் சிறப்பாக நடிப்பதற்கு ஆர்வத்தை உண்டு பண்ணி எதிர்காலத்தில் நீ பெரிய நடிகனாக வர வேண்டும் என்று தன் மகனிடம் சொல்லி சொல்லி வளர்க்கிறார்.

பின்னர் லால் தனது மகன் கவின் பெரியவனான பிறகு படங்களில்  நடிப்பதற்காக பல சினிமா கம்பெனிகளில் வாய்ப்பு தேடி அலைகிறார். படிப்பில் அதிக கவனம் செலுத்தாத கவின் நடிப்பின் மீது ஆர்வம் கொண்டு எப்படியாவது படத்தில் நடிக்க வேண்டும் என்று உறுதியுடன் சென்று பல சினிமா கம்பெனிகளில் அலைகிறார்.. இந்நிலையில் ஒரு படத்தில் நடிப்பதற்கான வாய்ப்பு  கவினுக்கு ஹைதராபாத்தில் படப்பிடிப்பில் கலந்து கொள்ள அழைக்கிறார்கள். சினிமாவில் நடிக்கும் கனவுடன் மிகுந்த  ஆர்வத்துடன் ஒரு முக்கிய கதாபாத்திரத்தில் நடிப்பதற்காக ஹைதராபாத் செல்லும்போது  கவின் ஒரு விபத்தில் சிக்கி,  அதிக அளவில் முகத்திலும் உடலிலும்  காயம் ஏற்படுகிறது. அந்த காயம் முகத்தில் தழும்பாக மாறி கவினை வேதனை அடைய  செய்கிறது. இந்த விபத்து காரணமாக கவினுடைய சினிமாவில் நடிகனாகும் கனவு தகர்ந்து போகிறது.

இந்த சூழலில் கவினை காதலித்த காதலி ப்ரீத்தி முகுந்தன் அவரை விட்டு பிரிந்து சென்று விடுகிறார். இதனால் பித்து பிடித்தது போல் ஆகிவிட்ட கவின் தன் குடும்பத்துடன் மிகுந்த வேதனையுடன்  வாழ்க்கையை நடத்தி வருகிறார். இந்நிலையில் கவினுடன் படித்த கல்லூரி மாணவி அதிதி போஹங்கர் அவருக்கு ஆறுதல் கூறி வாழ்க்கையில் முன்னேற்ற பாதையில் எப்படி செல்வது என்பதை தெளிவு படுத்தி காதலிக்க ஆரம்பிக்கிறார். இருவரும் காதலியில் ஈடுபட்ட நிலையில் கவின் நினைத்த மாதிரி அவரது நடிகனாகும் கனவு‌ வெற்றி பெற்றதா? மீண்டும் காதலில் வெற்றி பெற்றாரா? என்பதுதான் இந்த ‘ஸ்டார்’ படத்தின் மீதி கதை.

சினிமாவில் நடிகராக வேண்டும் என்ற ஆசையில் வாய்ப்பு தேடி அலையும்  கலையரசன் என்ற கதாபாத்திரத்திற்கு கச்சிதமாக பொருந்தியிருக்கும் கவின், அதில் உணர்வுப்பூர்வமாக சிறந்த முறையில் நடித்து அனைவரையும் கவர்கிறார். முதல் பாதியில் சாக்லேட் பாயாகவும், இரண்டாம் பாதியில் சாதிக்க துடிக்கும் இளைஞராகவும் நடித்து, படம் பார்க்கும் ரசிகர்கள் மனதில் பதிந்து விடுகிறார். கல்லூரியில் படிக்கும் காலங்களில் நடனம், காதல் என்று அசத்துபவர், வாய்ப்புகளுக்காக காத்திருந்து ஏமாந்து போகும் காட்சிகளில் நடிப்பில் அசத்துகிறார். மும்பை வீதிகளில் , கையில் பணம் இல்லாமல் தனது வாழ்க்கையோடு போராடும் காட்சிகளிலும், இளைஞர்களுக்கு பாடம் புகட்டும் விதத்தில் அபாரமாக நடித்து ரசிகர்களை கவர்கிறார்.

கதாநாயகிகளாக நடித்திருக்கும் ப்ரீத்தி முகுந்தன் மற்றும் அதிதி போஹங்கர் இருவருக்கும் இப்படத்தின் கதையில் சமமான வாய்ப்பு கொடுக்கப்பட்டிருக்கிறது. இருவரும் கொடுக்கப்பட்ட வாய்ப்பை சரியாக பயன்படுத்தி தங்களது நடிப்பு திறனை சிறப்பாக வெளிப்படுத்தி இருக்கிறார்கள்.

கதாநாயகன் கவினின் தந்தை கதாபாத்திரத்தில் நடித்திருக்கும் லால், எதார்த்தமான நடிப்பை ஒரு தந்தைக்கு உண்டான நடிப்பை சிறப்பாக வெளிப்படுத்தி அசத்தி இருக்கிறார். கவின் அம்மா கதாபாத்திரத்தில் நடித்திருக்கும் கீதா கைலாசம், தன் மகனை நினைத்து வருந்துவது, மற்றும் கண்டிப்பது என்று நடிப்பில் பளிச்சிடுகிறார்.

மாறன், காதல் சுகுமார், நிவேதிதா ராஜப்பன், தீப்ஸ், ராஜா ராணி பாண்டியன், சஞ்சய் ஸ்வரூப், தீரஜ் என மற்ற கதாபாத்திரங்களில் நடித்திருப்பவர்கள் கதைக்கு தகுந்தவாறு பயன்படுத்தப்பட்டிருக்கிறார்கள்.

இசையமைப்பாளர் யுவன் சங்கர் ராஜாவின் இசையில் பாடல்கள் மற்றும் பின்னணி இசை திரைப்படத்திற்கு பெரிய பலமாக அமைந்திருக்கிறது.

ஒளிப்பதிவாளர் K.எழில் அரசு ஒளிப்பதிவு படத்தின் கதைக்கு ஏற்றவாறு பயணித்து இருக்கிறது.

இயக்குனர் இளன் கதைக்களத்தை இளைஞர்களை கவரும் விதத்தில் காதல் ஆக்சன் சென்டிமென்ட் என்று  ஒவ்வொரு இளம் வாலிபர்கள் மனதில் இருக்கும் கனவுகளை தெளிவாக படமாக்கி அனைத்து தரப்பையும் கவரும் விதத்தில் அமைத்திருக்கிறார்.முதல்பாதி படத்தை நகர்த்தியிருப்பவர் எந்தவித விறுவிறுப்பும் இல்லாத திரைக்கதையால் ரசிகர்களுக்கு புரியாமல்  செய்துவிடுகிறார். இருந்தாலும், இடைவேளையின் போது வரும் திருப்புமுனை படத்தின் சுவாரஸ்யத்தைக் கூட்டுவதால் இரண்டாம் பாதி கதையை விறுவிறுப்பாக நகர்த்த உதவுகிறது. கிளைமாக்ஸ் காட்சியில் அவர் வைத்திருக்கும் திருப்பம் சிறு குழப்பத்தை ஏற்படுத்தினாலும் அரங்கை விட்டு வெளி வரும்போது அது ரசிகர்களிடையே கேள்விக்குறியாக மாறி பேச வைக்கிறது.

மொத்தத்தில் இந்த ‘ஸ்டார்’ படம் இளைஞர்கள் ரசிக்கும் ஸ்டார்.

ரேட்டிங் 3/5.

RADHAPANDIAN.