‘இங்கு நான் தான் கிங்கு’– திரைப்பட விமர்சனம்!

சென்னை:

சந்தானம், பிரியாலயா, தம்பி ராமையா, முனிஷ்காந்த் , விவேக் பிரசன்னா, பால சரவணன், லொள்ளு சபா மாறன், லொள்ளு சபா சுவாமிநாதன், கூல் சுரேஷ், லொள்ளு சபா சேஷு, மனோபாலா, மற்றும் பலர் நடித்திருக்கும் படம்தான் ‘இங்க நான்தான் கிங்கு’ இப்படத்திற்கு கதை எழுதி, இயக்கி இருப்பவர் ஆனந்த் நாராயண். கோபுரம் ஃபிலிம்ஸ் சார்பாக ஜி.என் அன்புச்செழியன், சுஷ்மிதா அன்புச்செழியன் இருவரும் இணைந்து தயாரித்திருக்கிறார்கள்.

இப்படத்தின் கதையைப் பொருத்தவரையில்,

தமிழ்நாட்டில் தற்போது இருக்கும் சூழ்நிலையில் ஒருவர் திருமணம் செய்து கொள்ள வேண்டும் என்றால் பெண் வீட்டார் சார்பில் சொந்த வீடு இருக்கிறதா? எவ்வளவு சொத்து இருக்கிறது… என்று தான் கேட்கிறார்கள். அதனால் சந்தானம் தான் திருமணம் செய்து கொள்வதற்கு முன்பாக 25 லட்ச ரூபாய் கடன் வாங்கி சொந்த வீடு ஒன்றை வாங்குகிறார்.  சொந்த வீடு இருந்தால்தான்  பெண் கொடுப்பார்கள்… என்று நம்பி பெண் பார்க்கும் தரகர் மனோபாலா மூலம் பல இடங்களில் தனக்கு பிடித்த பெண்களாக பார்க்கிறார் சந்தானம்.  ஆனால் எந்த பெண்ணும் சந்தானத்துக்கு சரியாக அமையவில்லை.  இந்த சூழ்நிலையில் ரத்தினபுரி ஜமீன்தார் வீட்டில் ஒரு அழகான பெண் இருக்கிறது. அவளை திருமணம் செய்து கொண்டால் நீ சந்தோஷமாக, பெரிய  பணக்காரனாக வாழலாம் என்று ஆசை காட்டி அந்த ஜமீன்தார் வீட்டிற்கு சந்தானத்தை அழைத்து செல்கிறார் மனோபாலா.

அங்கு மாப்பிள்ளை சந்தானத்திற்கு தடபுடலாக வரவேற்பு கிடைக்கிறது. அப்போது சந்தானம் பெண் வீட்டார் தம்பி ராமையாவிடம் உங்களது பெண்ணை திருமணம் செய்து கொண்டால் எனக்கு 25 லட்ச ரூபாய் வரதட்சணையாக கொடுக்க வேண்டும் என்று கேட்கிறார்.. அதற்கு தம்பி ராமையா ஒப்புக்கொண்டு திருமணத்தை தடபுடலாக நடத்துகிறார்.  அதன் பிறகு தம்பி ராமையாவிடம் வரதட்சணையாக கேட்ட 25 லட்ச ரூபாய் எப்போது கொடுப்பீர்கள்? என்று சந்தானம் கேட்க,  ஆனால் ஜமீன்தாராக வலம் வரும் தம்பி ராமையா ஏற்கனவே பல கோடி கடனாளியாக இருப்பது தெரிய வருகிறது இதனால் ஒன்றும் புரியாமல் தவித்த சந்தானம் தான் திருமணம் செய்து கொண்ட தம்பி ராமய்யாவின் மகள் பிரியலயாவுடன் தன்னுடைய வீட்டிற்கு வருகிறார்.

இந்த 25 லட்ச ரூபாயை எப்படி கொடுப்பது என்ற குழப்பத்தில் இருக்கும் சந்தானம் தன்னுடனேயே வீட்டுக்கு வந்திருக்கும் மனைவி பிரியலயாவின் தந்தை தம்பி ராமையா, மச்சான் பால சரவணன் இருவராலும் பல விதத்தில் பாதிப்பு ஏற்படுகிறது.  இதனால் வெறுப்படைந்த சந்தானத்திற்கு அவர்களை பராமரிக்கும் சூழ்நிலை ஏற்படுகிறது. தனது மனைவி பிரியலயாவுடன் வேண்டா வெறுப்புடன் வாழ்ந்து கொண்டிருக்கும் இந்த சூழ்நிலையில் சென்னையில் வெடிகுண்டு வைப்பதற்காக தீவிரவாத கும்பல் ஒன்று செயல்படுகிறது. அந்த தீவிரவாத கும்பலைச் சேர்ந்த ஒருவனை பிடித்துக் கொடுத்தால் 50 லட்சம் பரிசு தருவதாக காவல்துறை அறிவிக்கிறது. அந்த தீவிரவாதியை தெரியாத்தனமாக சந்தானம் மற்றும் மாமனார் தம்பி ராமையா, மச்சான் பால சரவணன் ஆகியோர் கொன்றுவிட,  அந்த 50 லட்சம் ரூபாய் பணம் சந்தானத்திற்குபரிசாக கிடைத்ததா? இல்லையா/ என்பது தான் ‘இங்கு நான் தான் கிங்கு’ என்ற படத்தில் மீதி கதை.

இப்படத்தில் கதாநாயகனாக நடித்திருக்கும் சந்தானம், தனது ரசிகர்களை கண்டிப்பாக சிரிக்க வைப்பார் என்ற நம்பிக்கையில் வருபவர்களை ஏமாற்றாமல் ஒவ்வொரு காட்சியிலும் அனைவரையும் சிரிக்க வைக்கிறார். ஒவ்வொருவர் பேசும்போதும் அவர் திருப்பி அடிக்கும் ஜோக்குகள் சிரிக்க வைக்கின்றன. காமெடி படம் என்றாலும் அவர் அணியும் கலர்புல்லான ஆடைகள், வித்தியாசமான நடனம், காதல் பாடல் காட்சியில் கதாநாயகியுடன் நெருக்கம் என்று கமர்ஷியல் நாயகனாக அனைவரது கவனத்தையும்  ஈர்க்கிறார் சந்தானம்.

அறிமுக கதாநாயகியாக நடித்திருக்கும் பிரியலயா அழகான நடிப்பை அளவாகவே கொடுத்து ஒவ்வொரு காட்சிக்கும், கதாபாத்திரத்திற்க்கு ஏற்றவாறு அதை நிறைவாக செய்திருக்கிறார், தன் நகைச்சுவைக் காட்சிகளில் சிறந்த முறையில் நடித்து முத்திரை பதித்திருக்கிறார்.

ஜமீனாக நடித்திருக்கும் தம்பி ராமையா, அவருடைய அனுபவ மிக அருமையான நடிப்பின் மூலம் காமெடியில்  கலக்கியிருக்கிறார்.

பாலசரவணன், விவேக் பிரசன்னா, முனிஷ்காந்த் ஆகியோருடன் சந்தானத்துடன் எப்பொதும் கூடவே இருக்கும் நடிகர்களான மாறன், சேசு, சுவாமிநாதன், கூல் சுரேஷ் ஆகியோர் ஒன்றாக இணைந்து மிக சிறப்பான நடிப்பைக் கொடுத்திருந்தனர்.

இசையமைப்பாளர் இமானின் இசை மற்றும் பாடல்கள் கேட்கும் ரகம்தான். பின்னணி இசை திரைப்படத்திற்கு மிகப்பெரிய பலமாக அமைந்திருக்கிறது.

ஒளிப்பதிவாளர் ஓம் நாராயண் ஒளிப்பதிவில் பாடல் காட்சிகள் கண்களுக்கு இதமளிக்கும் விதத்தில் அமைந்துள்ளன.

எழிச்சூர் அரவிந்தன் கதை எழுதியிருக்கிறார். ஆனந்த் நாராயணன் இயக்கியிருக்கிறார். வெகுமக்களைக் கவர்ந்த சமகால நிகழ்வுகள் மற்றும் திரைப்படக்காட்சிகளைக் கிண்டல் செய்வதை மக்கள் ரசிப்பார்கள் என்பதை உணர்ந்து எடுத்திருக்கிறார்கள். சந்தானம் கதாநாயகன் என்பதற்காக காட்சிகளை சிறந்த முறையில் அமைத்து அதை பார்த்து ரசிகர்கள் வயிறு வலிக்க சிரிக்க வேண்டும் என்று படத்தை இயக்கியிருக்கும் ஆனந்த் நாராயண் முயற்சி வீண் போகவில்லை.

மொத்தத்தில், ‘இங்க நான் தான் கிங்கு’ படம்  ரசிகர்களை கண்டிப்பாக சிரிக்க வைக்கும்.

ரேட்டிங் 2.5/5.

RADHAPANDIAN.