‘ஹிட் லிஸ்ட்’ திரைப்பட விமர்சனம்!

சென்னை:

சுப்ரீம் ஸ்டார்’ சரத்குமார், விஜய் கனிஷ்கா, சமுத்திரக்கனி, கௌதம் வாசுதேவ் மேனன்,  ஸ்மிருதி வெங்கட், ஐஸ்வர்யா தத்தா, சித்தாரா, அபி நக்ஷத்ரா, அனுபமா குமார், ராமச்சந்திர ராஜு, முனீஷ்காந்த், ராமச்சந்திரன், ரெடின்  கிங்ஸ்லி, பாலசரவணன், மற்றும் பலர் நடித்திருக்கும் படம்தான் ‘ஹிட் லிஸ்ட்’  இப்படத்தை சூர்யகதிர் காக்கல்லர்-கே.கார்த்திகேயன் இருவரும் இணைந்து இயக்கி இருக்கின்றனர்.

இப்படத்தின் கதையைப் பொருத்தவரையில்,

சிறு உயிருக்கு கூட தீங்கு விளைவிக்கக்கூடாது என வாழ்ந்து வரும், வாடிய பயிரைக் கண்டபோதெல்லாம் வாடினேன் என்று சொன்ன வள்ளலார் வழியில் ‘உயிர் கொல்லாமை’ என்ற உன்னதக் கோட்பாட்டை தன் வாழ்க்கையில் கடைப்பிடித்து நடப்பதோடு, அதை மற்றவர்களும் பின்பற்ற வேண்டும் என்பதற்கான செயல்பாடுகளிலும் ஈடுபடுபவர் நாயகன் விஜய் கனிஷ்கா. தனது தந்தையை இழந்த நிலையில் தாய் சித்தாரா, மற்றும் தங்கை அபி நட்சத்திரா என அமைதியாக குடும்பமாக  வாழ்ந்து வருகிறார். விஜய் கனிஷ்காவின் வாழ்க்கையில் திடீரென்று நுழையும் முகமூடி அணிந்த நபர், அவரது அம்மா மற்றும் தங்கையை கடத்தி வைத்துக்கொண்டு, அவரை மிரட்டி இரண்டு கொலைகளை செய்யச் சொல்கிறான்.

அதிர்ச்சி அடைந்த விஜய் கனிஷ்கா அது குறித்து  காவல்துறை அதிகாரி சரத்குமாரிடம் புகார் செய்கிறார். காவல்துறை அதிகாரியான சரத்குமார் நேரடியாக களத்தில் இறங்கி இந்த கடத்தல்காரனைப் பிடித்து  விஜய் கனிஷ்காவின் தாய், தங்கையை காப்பாற்ற  முயல்கிறார். தாய் தங்கையே கடத்திய  முகமூடி அணிந்த  மர்மநபர், எந்த உயிரையும் கொல்ல கூடாது என்ற  கொள்கையுடன் வாழ்ந்து வரும் விஜய் கனிஷ்காவை மிரட்டி எதற்காக இரண்டு கொலைகளைச் செய்யச் சொல்கிறான். அந்த இரண்டு கொலைகளைச் செய்து முகமூடி மனிதரிடம் சிக்கிக்கொண்ட அம்மா, தங்கையை விஜய் கனிஷ்கா காப்பாற்றினாரா?, அந்த முகமூடி மனிதர் யார்.. என்பதை காவல்துறை அதிகாரி சரத்குமார் கண்டுபிடித்தாரா? என்பதுதான் ‘ஹிட் லிஸ்ட்’ படத்தின் மீதிக் கதை.

பல வெற்றிப் படங்களைக் கொடுத்த‌ தமிழ் திரையுலகின் முக்கிய இயக்குநர் விக்ரமனின் மகன் விஜய் கனிஷ்கா அறிமுக நடிகர் என்று சொன்னால் யாரும் நம்ப மாட்டார்கள். ஒரு சிறந்த நடிப்பில் தேர்ச்சி பெற்ற நடிகர் போல், அப்பாவித்தனம் ஆக்ரோசம் ஆகியனவற்றோடு காதல் உணர்வுகள், அம்மா, தங்கை மீதான பாசம் ஆகியனவற்றையும் சரியாக வெளிப்படுத்தி அசத்தியிருக்கிறார். இதனையடுத்து அவர் சாக்லேட் பாயாக காதல் படங்களில் நடித்தால் கண்டிப்பாக தமிழில் ஒரு இளம் கதாநாயகனாக வலம் வருவார் என்பதில் ஐயமில்லை.

காவல்துறை அதிகாரியாக கதாபாத்திரத்தில் நடித்திருக்கும் சரத்குமார் அனுபவ நடிப்பை மிக சிறந்த முறையில் கொடுத்திருக்கிறார்.

விஜய் கனிஷ்காவுக்கு தந்தையாக நடித்திருக்கும் சமுத்திரக்கனிக்கு சிறிய கதாபாத்திரம் என்றாலும், வழக்கம் போல் நல்ல விசயங்களை பேசும், நல்ல மனம் கொண்டராக சிறப்பாக  நடித்திருக்கிறார்.

விஜய் கனிஷ்காவின் அம்மாவாக நடித்திருக்கும் சித்தாரா, தங்கையாக நடித்திருக்கும் அபி நக்‌ஷத்ரா, மருத்துவமனை டீனாக வரும் கௌதம் வாசுதேவ் மேனன், ரவுடி காளியாக வரும் ராமச்சந்திர ராஜு, மற்றும் ஷாஜி சென், ஐஸ்வர்யா தத்தா, அனுபமா குமார், முனிஷ்காந்த், பாலசரவணன், ரெடின் கிங்ஸ்லி உள்ளிட்ட அனைத்து நட்சத்திரங்களும் தங்களுக்கு கொடுத்த பணியை மிக நேர்த்தியாக செய்து அசத்தி இருக்கின்றனர்.

ஒளிப்பதிவாளர் ராம் சரணின் ஒளிப்பதிவு மிகவும் சிறப்பான முறையில் கதையோட்டத்திற்கு தகுந்தவாறு கொடுத்துள்ளார்.

இசையமைப்பாளர் சி.சத்யாவின் பின்னணி இசை படத்திற்கு கூடுதல் பலம் சேர்த்திருக்கிறது.

அறிமுக இயக்குனரான சூர்யகதிர் காக்கல்லர் மற்றும் கார்த்திகேயன் இருவரும் இணைந்து விறுவிறுப்பான  கதைக்களத்தை தேர்வு செய்து மிக சிறப்பாக திரைக்கதையை அமைத்து மிக அருமையாக  இயக்கியுள்ளனர். கதாநாயகனை மிரட்டும் முகமூடி மனிதன் யார்? அவர் ஏன் இப்படிச் செய்கிறார்? என்பதன் மர்ம முடிச்சை இறுதிவரை யாருக்கும் தெரியாமல் கொண்டு சென்று இருப்பதை  பாராட்டலாம். முகமூடி மனிதன் பற்றிய உண்மை தெரியும்போது எதிர்பாராத திருப்பமாக அமைந்து இருப்பதை இந்தப் படத்திற்க்குப் பலம் என்றே சொல்லலாம்..

மொத்தத்தில், இந்த ‘ஹிட் லிஸ்ட்’ கண்டிப்பாக ரசிகர்கள் மனதில் இடம் பிடிக்கும்.

ரேட்டிங் 3.5/5.

RADHAPANDIAN.