‘வேதா’ – திரைப்பட விமர்சனம்!

சென்னை:

அசீம் அரோரா எழுதிய கதையை, நிகில் அத்வானி இயக்க, ஷர்வாரி, ஜான் ஆபிரகாம், தமன்னா உள்ளிட்டோர் மற்றும் அபிஷேக் பானர்ஜி நடித்துள்ள திரைப்படம், வேதா. ஜீ ஸ்டுடியோஸ், எம்மே எண்டர்டெயின்மெண்ட் மற்றும் ஜேஏ எண்டர்டெயின்மெண்ட் ஆகிய நிறுவனங்கள் இணைந்து வெளியிட்டு உள்ளன.

வடமாநில கிராமங்களில் அதிகமாக இருக்கும் சாதிக் கொடுமைகள் பற்றிய கதைக்களத்தை மிகவும் மாறுபட்ட முறையில் ரத்தமும் சதையுமாக, நம் கண்முன் நிறுத்தி இருக்கிறார் இயக்குநர் நிகில் அத்வானி.

ராணுவத்தில் பணி புரிந்துக் கொண்டிருந்த ஜான் ஆபிரகாம் மேலதிகாரியின் சொல்லை மீறியதற்காக, அவரை ராணுவத்தில் இருந்து டிஸ்மிஸ் செய்கின்றனர். வெளியில் வரும் அவர் குத்துச் சண்டை பயிற்சி பள்ளியில் உதவியாளராக சேர்கிறார். வட இந்திய கிராமப்பகுதியை சுற்றிலும் நூற்றி ஐம்பது கிராமங்களை ‘ஆளும்’ ஜமீன் குடும்பம், தான் வைத்ததே சட்டம் என்று மக்களை அடக்கி ஆண்டுக் கொண்டிருக்கிறது. அப்படி ராஜஸ்தான் கிராமம் ஒன்றில் தாழ்த்தப்பட்ட பெண்ணாகப் பிறந்த ஷர்வாரி குத்துச்சண்டை வீராங்கனையாக வர ஆசைப்படுகிறாள்.

தாழ்த்தப்பட்ட சாதியைச் சேர்ந்த பெண்ணான ஷர்வாரி, குத்துச்சண்டை கற்க விரும்புவதை கண்ட மேல்சாதியினர் அந்த பெண்ணை அடித்து உதைத்து  அவமானப்படுத்துகின்றனர். இதற்கிடையே அவளது சகோதரன், மேல் சாதியைச் சேர்ந்த பெண்ணை காதலிக்க.. காதலர்கள் கொடூரமாகக் கொல்லப்படுகிறார்கள்.  ஒரு கட்டத்தில் மேல்சாதியினர் குத்துச்சண்டை கற்க விரும்பும்  அந்த பெண் ஷர்வாரியையும், அவளது சகோதரியையும்  குடும்பத்தோடு   தீர்த்துக் கட்ட முடிவு செய்கின்றனர். அப்போது முன்னாள் ராணுவ வீரர் ஜான் ஆபிரகாம் அந்தப் பெண் ஷர்வாரியை காப்பாற்ற முன் வருகிறார். மேல்சாதியினரிடமிருந்து ஷர்வாரியை ராணுவ வீரர் ஜான் ஆபிரகாம் காப்பாற்றினாரா? இல்லையா? என்பதுதான் “வேதா” படத்தின் மீதிக் கதை.

கதாநாயகனாக நடித்திருக்கும் ஜான் ஆபிரகாம் தனது கதாபாத்திரத்தை எந்தவித அலட்டல் இல்லாமல் இயல்பாக நடித்து சிறப்பாக செயல்பட்டு இருக்கிறார். அவரது முறுக்கேறிய உடலுக்கு ஏற்றவாறு இராணுவ வீரரின் கதாபாத்திரம் வடிவமைக்கப்பட்டுள்ளதால் அதற்கேற்றவாறு அதிக சிரமம் எடுத்துக் கொள்ளாமல் நடித்து இருக்கிறார்.  கம்பீரமும் கனிவும் கலந்த முகபாவனையும், உடல் மொழியும் மிகப் பொருத்தமாக இருந்தாலும் அதிரடி சண்டைக் காட்சிகளில் அசத்தி இருக்கிறார்.

தாழ்த்தப்பட்ட இனத்தைச் சேர்ந்த பெண்ணாக வருகிறார் ஷர்வாரி. அவர் தனது கதாபாத்திரத்தை நன்கு உணர்ந்து மிக அற்புதமான நடிப்பை கொடுத்துள்ளார். சாதியைச் சொல்லி நம்மை அடக்குகிறார்களே என்கிற ஆதங்கம், குத்து சண்டை கற்கும் ஆர்வம், தன் கண் முன்னே அண்ணனும் அவனது காதல் மனைவியும் கொல்லப்படுவதைக் கண்டு அதிர்ச்சி, கதாநாயகனுடன் இணைந்து தப்பிக்க நடத்தும் போராட்டம் போன்றவற்றில் தன் நடிப்பில் அசத்தி இருக்கிறார் ஷர்வாரி.

ஜான் ஆபிரகாமின் காதலியாக நடித்திருக்கும்  தமன்னா, டூயட் பாடலில் ரசிக்கவைக்கிறார்.

வில்லனாக நடித்திருக்கும் அபிஷேக் பானர்ஜி. அமைதியான முறையில்  மேல்சாதியினர் தாழ்த்தப்பட்ட இனத்தைச் சேர்ந்தவர்களை இழிவுபடுத்தி அடக்கி ஆளும் சக்தி படைத்தவராக  நடிப்பில் மிரட்டி இருக்கிறார். அதேபோல் ஆஷிஷ் வித்யார்த்தியும் தனக்கு கொடுத்த கதாபாத்திரத்தை உணர்ந்து மிக சிறப்பாக நடித்திருக்கிறார்.

வறண்ட கிராமங்களையும், இயற்கை எழில் மிகுந்த குளிர்ச்சியான காஷ்மீர் என்று இரு மாறுபட்ட இடங்களையும் கண்களுக்கு மிக இயல்பாக படம் பிடித்து காட்டி இருக்கிறார் ஒளிப்பதிவாளர்.

அமல் மாலிக் இசையில் பாடல்கள் அனைவரையும் கவனிக்க வைக்கின்றன. கார்த்திக் ஷாவின் பின்னணி இசை கதைக்களத்துடன் சேர்ந்து பயணித்து இருக்கிறது.

தாழ்த்தப்பட்ட இனத்திலிருந்து ஒரு  இளம் பெண், குத்துச்சண்டை வீராங்கனையாவதற்கு எப்படியெல்லாம் போராட வேண்டி இருக்கிறது என்பதை ரத்தமும் சதையுமாகச் சொல்லி இருக்கிறார் இயக்குனர் நிகில் அத்வானி. அவர் இந்தி சினிமாவில் அரிதாக தொடக்கூடிய சாதிப் பிரச்சனையைக் கையில் எடுத்து கதைக் களத்தை கண்முன் காட்டியிருக்கும் அவரை கண்டிப்பாக பாராட்டலாம்.

மொத்தத்தில் “வேதா” படத்தை அனைத்து சாதியினரும் பார்க்க வேண்டிய படம்.

ரேட்டிங்-3/5.

RADHAPANDIAN.