‘போகும் இடம் வெகு தூரமில்லை’ திரைப்பட விமர்சனம்!

சென்னை:

ஷார்க் 9 பிக்சர்ஸ் நிறுவனம் சார்பில் சிவா கில்லாரி தயாரித்திருக்கும் போகுமிடம் வெகு தூரமில்லை படத்தை எழுதி இயக்கியிருக்கிறார் அறிமுக இயக்குனர் மைக்கல் கே ராஜா. இதில் விமலுடன் கருணாஸ், மேரி ரிக்கெட்ஸ், ஆடுகளம் நரேன், மனோஜ் குமார், பவன், அருள்தாஸ், தீபா சங்கர், சார்லஸ் வினோத், வேல ராமமூர்த்தி ஆகியோர் இணைந்து நடித்துள்ளனர்.

இப்படத்தின் கதையைப் பொருத்தவரையில்,

நடிகர் விமல் சென்னையில் ஆம்புலன்ஸ் டிரைவராக பணியாற்றி வருகிறார். இந்த சூழ்நிலையில் பிரசவத்துக்காக தன் மனைவியை மருத்துவமனையில் அனுமதித்திருக்கும் விமல், அங்கு பணம் கட்ட இயலாத நிலையில் இருக்கும்போது திருநெல்வேலியில் பிரபலமான ஒரு பெரிய குடும்பத்தின் தலைவர் விபத்து ஒன்றில் இறக்கிறார். அவரது பிணத்தை சென்னையிலிருந்து திருநெல்வேலிக்கு ஆம்புலன்ஸ் மூலம் எடுத்து செல்வதற்காக விமலிடம் கூறுகிறார்கள். மருத்துவமனையில் அனுமதிக்கப்பட்டிருக்கும் தன் மனைவியின் பிரசவத்துக்காக பணம் தேவைப்படும் என்பதால் அந்தப் பெரியவரின் பிணத்தை எடுத்துக் கொண்டு ஆம்புலன்ஸில் திருநெல்வேலிக்கு பவன் வீட்டை நோக்கி  செல்கிறார் விமல். இவர் ஆம்புலன்ஸ் வண்டியில் அந்த பெரிய மனிதரின் பிணத்தை எடுத்து செல்லும்போது வழியில் தெருக்கூத்து கலைஞரான கருணாஸ் அவரது வண்டியில் லிப்ட் கேட்டு ஏறி கொள்கிறார்.

இந்நிலையில் வீட்டை விட்டு ஓடி வந்த ஒரு காதல் ஜோடி இந்த ஆம்புலன்ஸ் வண்டியில் ஏறிக்கொள்ள அவர்களை துரத்திக் கொண்டு வரும் உறவினர்களுடன் விமலுக்கும் அவர்களுக்கும் சண்டை ஏற்படுகிறது. அந்த சண்டையில் உறவினர்களை அடித்து விரட்டி அந்த காதல் ஜோடியை எங்கு அழைத்துச் சென்று விட வேண்டுமோ அந்த ஊரில் விமலும், கருணாஸும் இறக்கி விடுகின்றனர் இந்த நிலையில் ஆம்புலன்ஸ் வண்டியில் இருக்கும் அந்த பெரியவரின் பிணம் காணாமல் போய்விடுகிறது. இதனால் அதிர்ச்சியடைந்த விமல் என்ன செய்வது என்று தெரியாமல் தவிக்கிறார். அந்த பெரிவரின் குடும்பத்தில் உள்ளவர்கள் திருநெல்வேலிக்கு எப்போது பிணத்தை கொண்டு வருவீர்கள் என்று அடிக்கடி விமலுக்கு போன் செய்து கொண்டிருக்கிறார்கள். இதனால் ஒன்றும் தெரியாமல் தவித்துக் கொண்டிருந்த விமலுக்கு, கருணாஸ் உதவி செய்ய முன்வருகிறார்.  இருவரும் சேர்ந்து அனாதை பிணம் கிடைத்தால் எடுத்து செல்ல முடிவு செய்கின்றனர். ஆனால் அதிலும் தோல்வி ஏற்படுகிறது. இந்நிலையில் அந்தப் பெரியவருக்கு இரண்டு மனைவிகள் இருப்பதால் அவருடைய மகன்களுக்குள் பெரிய பிரச்சனை ஏற்படுகிறது. இறுதிச் சடங்கு யார் செய்வது என்பதில் தகராறு உருவாகிறது. இங்கு அந்த பெரியவரின்  பிணம் காணாமல் தவித்துக் கொண்டிருக்கும் விமலுக்கு பிணம் கிடைத்ததா? இல்லையா? என்பதுதான் ‘போகும் இடம் வெகு தூரம் இல்லை’ படத்தின் மீதி கதை.

ஆம்புலன்ஸ் டிரைவர் குமார் கதாபாத்திரத்தில் விமல் நடித்திருக்கிறார். இதுவரை அவர் ஏற்று நடிக்காத ஒரு கதாபாத்திரம்.  ஒரு வித்தியாசமான, அழுத்தமான அந்த கதாபாத்திரத்தின் தன்மையை சரியாக உள்வாங்கி, மாறுபட்ட முறையில்,  எந்தவித அலட்டல் இல்லாமல் மிகவும் யதார்த்தமாக, தேவையான அளவு மட்டும் சிறப்பான நடிப்பை வெளிப்படுத்தியிருக்கிறார். அதிக வசனம் பேசாமல் தன் முக பாவனைகளிலேயே நடிப்பு திறனை இயல்பாக வெளிப்படுத்தி விமல் நடித்திருப்பது பாராட்டத்தக்கது.

தெருக்கூத்து கலைஞராக நளினமூர்த்தி கதாபாத்திரத்தில் கருணாஸ் நடித்திருக்கிறார்.  அவர் தன்தாய் மீது இருக்கும் பாசத்தால் திருமணம் செய்து கொள்ளாமல் வாழ்ந்து வரும் கருணாஸ் , தெருக்கூத்தின் அழிவால் வேலை இல்லாமல், தன்னுடைய மனதில் ஏற்பட்ட மனஅழுத்தத்தை சொல்லி புலம்பும் நேரத்தில், அவரது உணர்ச்சிகளை  மனதளவில் பாதிப்பை ஏற்படுத்தி கிளைமாக்ஸ் காட்சி அவரால்தான் முடியப் போகிறது என்று தெரியும்போது  நம் கண்களிலிருந்து கண்ணீரை வர வைத்து விடுகிறார் கருணாஸ்.

இவர்களுடன் விமலின் மனைவியாக மேரி ரிக்கெட்ஸ், ஆடுகளம் நரேன், மனோஜ் குமார், பவன், அருள்தாஸ், தீபா சங்கர், சார்லஸ் வினோத், வேல ராமமூர்த்தி என்று அவரவர்கள் தங்களது கதாபாத்திரத்தை உணர்ந்து நடிப்பில் அசத்தி இருக்கின்றனர்.

டெமில் சேவியர் எட்வர்ட்ஸின் ஒளிப்பதிவு ஆம்புலன்ஸ் செல்லும் பாதையை மிக தெளிவாக படமாக்கி இருக்கிறார். என்.ஆர்.ரகுநந்தனின் இசையில் பாடல்கள் ஓ.கே ரகம்தான்.

இப்படத்தின் கதையை எழுதி இயக்கியிருக்கிறார் அறிமுக இயக்குனர் மைக்கல் கே ராஜா. படம் ஆரம்பிக்கும்போது அமைதியாக படத்தை நகர்த்திச் செல்லும் இயக்குநர், பிணத்தைக் காணவில்லை என்றவுடன் திடுக்கிட்டுப் போகும் ரசிகர்கள் மத்தியில்,  இனி என்ன நடக்கப் போகிறது என்பதை யாரும் யோசிக்க முடியாத சூழ் நிலையில்  இருக்கும்போது மசாலா கலப்பில்லாமல் எதார்த்தமாக காட்சிகளை படமாக்கி நம்மை தடுமாற வைக்கிறார். எந்த இடத்திலும் தோய்வு ஏற்படாத வண்ணம் விறுவிறுப்பாக கொடுத்து இருக்கும் இயக்குனர் மைக்கேல் கே ராஜாவை பாராட்டாமல் இருக்க முடியாது. இந்தப் படத்திற்க்குப் பிறகு பல தயாரிப்பாளர்கள் அவரை தேடி வருவார்கள் என்பதில் ஐயமில்லை.

மொத்தத்தில் ‘போகும் இடம் வெகு தூரமில்லை’ படம் அனைத்து ரசிகர்களும்  கண்டு களிக்க வேண்டிய படம்.

ரேட்டிங்-3/5.

RADHAPANDIAN.