“2 கே லவ் ஸ்டோரி” – திரைப்பட விமர்சனம்!

சென்னை:

புதுமுகம் ஜெகவீர், மீனாட்சி கோவிந்தராஜ், லத்திகா பாலமுருகன், பால சரவணன், சிங்கம்புலி, ஜெயபிரகாஷ், ஆண்டனி பாக்யராஜ், ஜி பி முத்து, வினோதினி ம்ற்றும் பலர் நடித்திருக்கும் படம்தான் ‘2கே லவ் ஸ்டோரி’ இப்படத்தை  இயக்குனர் சுசீந்திரன் இயக்கி இருக்கிறார்.

இப்படத்தின் கதையைப் பொருத்தவரையில்,

புதுமுகம் ஜெகவீர் மற்றும் மீனாட்சி இருவருமே சிறு வயதில் இருந்தே இணை பிரியாத நண்பர்களாக பழகி வருகிறார்கள். இவர்கள் கல்லூரி படிப்பை முடித்தவுடன் வாலிப வயதிலும் இருவரும் தங்களது நட்பை ஒரு புனிதமாக கருதி அன்புடன் பழகி வருகின்றனர். ஆனால் ஒரு சிலர் இவர்களைப் பற்றி தவறாக பேசும் போது தங்களது நட்பை யாராலும் பிரிக்க முடியாது. யார் என்ன சொன்னாலும்  எங்களுக்குள் எந்தவித காதலும் இல்லை காமமும் இல்லை. எங்களது உண்மையான நட்பை கொச்சைப்படுத்தாதீர்கள் என்று அனைவருக்கும் புரிய வைக்கிறார்கள்.  இவர்கள் இருவரும் இணைந்து சில குறும்படங்களுக்கும் திருமண வைபவங்களுக்கும் புகைப்படம், வீடியோ எடுக்கும் ஒரு நிறுவனத்தை நடத்தி வருகின்றனர்.

இந்த சூழ்நிலையில் கல்லூரியில் படிக்கும்போது ஜெகவீர் ஒரு பெண்ணை காதலிக்கிறார். அந்தப் பெண்ணுடன் மோட்டார் சைக்கிளில் செல்லும்போது ஒரு விபத்தில் சிக்கி ஜெகவீரின் காதலி இறந்து விடுகிறார். இதனால் மனமுடைந்து இருந்த சூழ்நிலையில் மீனாட்சி ஆறுதல் கூறினாலும்,  ஜெகவீரால் அவரது காதலியை மறக்க முடியாமல் தவிக்கிறார். இந்த சூழ்நிலையில் ஜெகவீர்  தன் காதலை மறந்து வேறு ஒரு பெண்ணை திருமணம் செய்து கொள்வதற்காக அவரது குடும்பத்தினர் ஏற்பாடு செய்கின்றனர். ஜெகவீரும்,  மீனாட்சியும் ஒரே வீட்டில் இருக்கும் அண்ணன் தங்கையை மணந்து வாழ்க்கை நடத்த முற்படுகின்றனர். அதாவது அண்னனை மீனாட்சியும், தங்கையை ஜெகவீரும் திருமணம் செய்துக் கொண்டு ஒரே வீட்டில் இருவரும் குடும்பம் நடத்த ஆசைப்படுகின்றனர்.

ஒரு கட்டத்தில் அவர்கள் பல இடங்களில் தேடியும் அந்த மாதிரியான வரன்கள் எதுவும் கிடைக்கவில்லை. ஆனால் ஜெகவீர்,  மீனாட்சி குடும்பத்தினர் நினைத்த மாதிரி ஒரு வீட்டில் அண்ணனும் தங்கையும் இருக்க இருவருக்கும் திருமணம் செய்ய ஏற்பாடு செய்கின்றனர். இவர்கள் இருவரும் நினைத்த மாதிரி திருமணம் நடந்ததா? இல்லையா? என்பது தான் ‘2k லவ் ஸ்டோரி’ படத்தின் மீதி கதை.

அறிமுக நாயகன் ஜெகவீர்,புதுமுகங்களுக்குரிய எவ்வித பயமுமின்றி மிக இயல்பாக  நடித்து அசத்திருக்கிறார். அனைத்துவிதமான உணர்வுகளையும் அளவாக கையாண்டு கதாபாத்திரத்திற்கு நியாயம் சேர்க்கும் வகையில் உன்னதமாக நடித்திருக்கிறார். இப்படத்தை தொடர்ந்து ஜெகவீருக்கு பல படங்களில் வாய்ப்பு கிடைக்க தயாரிப்பாளர்கள் தேடி வருவார்கள் என்பதில் ஐயமில்லை.

மீனாட்சி கோவிந்தராஜனுக்கு சிறப்பான கதாபாத்திரம் தன்னுடைய கதாபாத்திரத்தை உணர்ந்து அதை மிக அநாயசமாகக் கையாண்டு நல்ல பெயர் பெறுகிறார். ஒரு அழகு பதுமையாக வந்து, இளமைத்துள்ளலோடு  ரசிகர்களை கவர்ந்து இழுக்க அவரது சிறந்த நடிப்பு இந்த படத்திற்கு நன்றாகக் கைகொடுத்திருக்கிறது.

நண்பராக வரும் பாலசரவணன் இப்படத்தில் காமெடியில் அனைவரையும் நன்றாகச் சிரிக்க வைக்கிறார்.

லத்திகா,விநோதினி,ஜெயப்பிரகாஷ்,சிங்கம்புலி, ஜிபி முத்து உள்ளிட்ட படத்தில் நடித்திருக்கும் அனைவரும் தங்களது கதாபாத்திரத்தை உணர்ந்து அதற்கேற்றவாறு நடித்திருக்கிறார்கள்.

டி.இமானின் இசையில் பாடல்கள் அனைத்தும் கேட்கும் ரகம்தான். கதைக்கு தகுந்தவாறு பிண்ணனி இசை சிறப்பாக பயணித்திருக்கிறது.

ஆனந்த கிருஷ்ணாவின் ஒளிப்பதிவு  கண்களுக்கு குளிச்சியாக கலர்ஃபுல்லாக ஒவ்வொரு காட்சியையும் படமாக்கி இருப்பது பாராட்டத்தக்கது.

இயக்குனர் சுசீந்திரன் கதை, எழுதி இயக்கியிருக்கிறார். இப்போதுள்ள இளைஞர்கள் மத்தியில் ஒரு ஆணும், பெண்ணும் எந்தவித ஈகோ இல்லாமல் நட்பாக பழகுவதை யாரும் தவறாக நினைக்காத அளவிற்க்கு கதையை சிறப்பாக கொண்டு சென்று இருக்கிறார். ஒரு ஆண் ஒரு பெண்ணுடன் பழகினால் காதல் என்று சொல்லும் இந்த கால கட்டத்தில் ‘2கே லவ் ஸ்டோரி’ படம் அனைத்து ரசிகர்களையும் ரசிக்க வைக்கும் என்பதில் ஐயமில்லை. அதே சமயத்தில் இப்படத்தில் இளவட்ட ரசிகர்களுக்கேற்றவாறு பல அம்சங்களைக் கலந்து கொடுத்து ரசிக்க வைத்திருக்கிறார் இயக்குனர் சுசீந்திரன்.

மொத்தத்தில், ‘’2கே லவ் ஸ்டோரி’ இளவட்டங்களை ரசிக்க வைக்கும்.

ரேட்டிங் 2.5/5.

RADHAPANDIAN.