‘ஒத்த ஓட்டு முத்தையா’ திரைப்பட விமர்சனம்!

சென்னை:

சினி கிராஃப்ட் புரொடக்ஷன் சார்பில் ரவிராஜா தயாரித்திருக்கும் ‘ஒத்த ஒட்டு முத்தையா’ படத்தின் கதை, திரைக்கதை, வசனத்தை எழுதி இயக்கியிருக்கிறார் சாய் ராஜகோபால். இப்படத்தில் கவுண்டமணி கதாநாயகனாக நடிக்க, யோகி பாபு, மொட்டை ராஜேந்திரன், சிங்கமுத்து, சித்ரா லட்சுமணன், ரவி மரியா, வையாபுரி, ஓ ஏ கே சுந்தர், கூல் சுரேஷ், டாக்டர் காயத்ரி, அனுமோகன், முத்துக்காளை, வாசன் கார்த்திக், அன்பு, மயில்சாமி, கஜேஷ் நாகேஷ், ராஜேஸ்வரி, பிந்து, அபர்ணா, சைதன்யா, டெம்பிள் சிட்டி குமார், தரணி, சென்ராயன், லேகா ஶ்ரீ, டி கே சீனிவாசன் உள்ளிட்ட பலர் நடித்திருக்கின்றனர்.

இப்படத்தின் கதையைப் பொருத்தவரையில்,

இப்படத்தில் கதாநாயகன் கவுண்டமணி ‘சித்தப்பா பெரியப்பா மக்கள் கட்சி’ என்கின்ற ஒரு கட்சியில் மாவட்ட செயலாளராக இருக்கிறார். அவர் ஒரு சட்டமன்றத் தேர்தலில் நின்று ஒரே ஒரு ஓட்டு மட்டுமே வாங்கியதால் அவடைய பெயர் ஒத்த ஒட்டு முத்தையாவாக  அனைவரும் அழைக்கின்றனர். அவருக்கு மூன்று தங்கைகள் இருக்கின்றனர். அந்த மூன்று தங்கைகளுக்கும் திருமணம் செய்து வைக்க வேண்டிய நிலைமை இருப்பதால், யாருடைய வீட்டில் மூன்று சகோதரர்கள் கிடைக்கிறார்களோ அந்த ஒரே வீட்டில் மூன்று தங்கைகளையும் திருமணம் செய்து கொடுத்து விட முடிவு செய்கிறார். இதற்கு ஒத்து வராத எந்த ஒரு வரனையும் ஏற்க மறுக்கிறார் கவுண்டமணி. ஏகப்பட்ட வரன்கள் தங்கைளுக்கு வந்தாலும், தன் கொள்கையில் பிடிவாதமாக இருக்கிறார் கவுண்டமணி. இதனால் திருமணம் தடைபட, தங்கைகள் மூவரும் தங்களுக்கு பிடித்தமானவர்களை தேட ஆரம்பிக்கின்றனர். வெவ்வேறு குடும்பத்தை சேர்ந்த மூவரையும் ஒரே குடும்பத்தைச் சேர்ந்த சகோதர்களாக நடிக்க வைத்து கவுண்டமணியை ஏமாற்றி திருமணம் செய்து கொள்ளலாம் என்று மூன்று தங்கைகளும் திட்டம் தீட்டுகின்றனர். 

இப்படிப்பட்ட சூழ் நிலையில் மீண்டும் தேர்தல் வர இந்த தடவையாவது வெற்றி பெற்று சட்டமன்ற உறுப்பினராகி விட வேண்டும் என்ற முயர்சியில் இறங்கும் கதாநாயகன் கவுண்டமணிக்கு சித்தப்பா பெரியப்பா கட்சி சீட் கொடுக்காமல் ஏமாற்றி விடுகிறார்கள். இந்த முறை எப்படியாவது வெற்றி பெற்று சட்டமன்ற உறுப்பினராகி விட வேண்டும் என்ற முயற்சியில் இறங்கும் கவுண்டமணிக்கு சீட் கொடுக்காமல்  அவரிடம் கார் ஓட்டுநராக பணியாற்றிய யோகி பாபுக்கு கட்சி  சீட் கொடுத்து விடுகிறது. இதனால் கோபமடைந்து கட்சியில் இருந்து வெளியேறி சுயேச்சையாகப் போட்டியிடுகிறார் கவுண்டமணி. அந்த தொகுதியில் சுயேட்சையாக போட்டியிட்ட  கவுண்டமணி தேர்தலில் வெற்றி பெற்றாரா? அவரது தங்கைகளுக்கு திருமணம் செய்து வைத்தாரா? இல்லையா? என்பதுதான் ‘ஒத்த ஒட்டு முத்தையா’ படத்தின் மீதிக் கதை.

இப்படத்தில் காமெடி கிங் கவுண்டமணி கதாநாயகனாக நடித்திருக்கிறார். அவரது மிகப் பெரிய பலமே காமெடியான வசனம் பேசி அசத்துவதுதான். இந்த படத்தில் முத்தையா என்ற கதாபாத்திரத்தில் தன்னுடைய 80ஆவது வயதில் நடித்திருக்கிறார். வயதாகி விட்டதால் பழைய வேகம், உற்சாகம் இல்லாவிட்டாலும் பஞ்ச் டயலாக் பேசி ரசிகர்களை சிரிக்க வைக்கிறார். கவுண்டமணியிடம் ரசிகர்கள் எதிர்பார்க்கும் விசயங்கள் எல்லாம் இடம் பெற்றிருந்தாலும் சில காட்சிகளில் பேசும் வசனத்தை ரசிக்க முடியவில்லை. 

கவுண்டமணியுடன் இணைந்து நடித்திருக்கும் யோகி பாபுவின் காமெடி காட்சிகளும் எதிர்பார்த்த அளவு இல்லாததால் ரசிகர்கள் மத்தியில்  ஏமாற்றம்தான். .

வாசன் கார்த்திக்,  அன்பு மயில்சாமி, கஜேஸ் நாகேஷ், ரவிமரியா, ஓ.ஏ.கே.சுந்தர், மொட்ட ராஜேந்திரன், சிங்கமுத்து, சித்ரா லஷ்மண், வையாபுரி, முத்துக்காளை, டி.ஆர்.சீனிவாசன், கூல் சுரேஷ், சதீஸ் மோகன், செண்ட்ராயன், இயக்குனர் சாய் ராஜகோபால்,  டெம்பிள் சிட்டி குமார், மணவை பொன் மாணிக்கம் என படத்தில் நடித்த அனைவரும் தங்களுக்கு கொடுத்த பணியை குறையில்லாமல் மிகவும் சிறப்பாக செய்திருக்கிறார்கள்.

சித்தார்த் விபின் இசையமைத்திருக்கிறார். பாடல்களும், பின்னணி இசையும் அளவாக அதிக சத்தம் இல்லாமல் அமைந்திருக்கின்றது…

எஸ்.ஏ.காத்தவராயனின் ஒளிப்பதிவு கதைக்களத்துக்கு ஏற்பப் பயணித்திருக்கிறது.

கதை எழுதி இயக்கியிருக்கிறார் சாய் ராஜகோபால்.கவுண்டமணிக்கான காட்சிகள் எப்படி இருக்க வேண்டும்? வசனங்கள் எப்படி அமைய வேண்டும்? என்பதையெல்லாம் நன்கு உணர்ந்தவர் என்பதால் அதற்கேற்ற மாதிரி செயல்பட்டு அரசியல் சம்பந்தப்பட்ட விஷயங்களை வெளிப்படையாக காட்சிபடுத்தி காதல், காமெடி கலந்து  செயல்பட்டிருப்பதை பாராட்டலாம்.

மொத்தத்தில், ‘ஒத்த ஓட்டு முத்தையா’  படத்தை ரசிக்கலாம்.

ரேட்டிங் 2.5/5.

RADHAPANDIAN.