‘டிராகன்’ திரைப்பட விமர்சனம்!

சென்னை:

பிரதீப் ரங்கநாதன், அனுபமா பரமேஸ்வரன், கயாது லோஹர், வி.ஜே.சித்து, ஹர்ஷத் கான், கே.எஸ் ரவிகுமார், மைஸ்கின், கௌதம் வாசுதேவ் மேனன், மரியம் ஜார்ஜ், இந்துமதி – சித்த்ரா பி.எல்.தேனப்பன், மற்றும் பலர் நடித்திருக்கும் படம்தான் “டிராகன்” இப்படத்தை அஸ்வத் மாரிமுத்து இயக்கி இருக்கிறார். 

இப்படத்தின் கதையைப் பொருத்தவரையில்,

டி.ராகவன் என்ற இயற்பெயர் கொண்ட கதாநாயகன் பிரதீப், பள்ளியில் முதல் மாணவனாக வந்தவர். பிளஸ் டூவில் 96 சதவீதம் மதிப்பெண்கள் பெற்று பள்ளியிலேயே முதல் மாணவராக வந்தவர். பள்ளியில் படிக்கும் போதே அதே பள்ளியில் படிக்கும் சக மாணவியை ஒரு தல பட்சமாக காதலிக்கிறார். ஆனால் அந்த மாணவியோ ஒரு ரவுடியை அடையாளம் காட்டி “எனக்கு அவனைப் போன்றவர்களை மட்டுமே பிடிக்கும். அதனால் அவனைத்தான் காதலிக்கிறேன் என்று சொல்லி, அந்த சக மாணவி கதாநாயகன் பிரதீப் ரங்கநாதனின் காதலை ஏற்க மறுத்து விடுகிறார். அதனால் வெறுப்படைந்த பிரதீப், வேலூரில் இருக்கும் ஏ.சி.எஸ். கல்லூரியில் பி.டெக். மாணவராக சேர்கிறார். இப்பொழுது அவர் தன்  டி.ராகவன் என்றபெயரை மாற்றி டிராகன் என்று கல்லூரியில் அனைவருக்கும்  தெரிந்த ஒரு ரவுடியாக வலம்  இருக்கிறார்.

இந்த சூழ்நிலையில் கல்லூரி இறுதி ஆண்டில் 48 அரியர்ஸ்களை கையில் வைத்துக் கொண்டிருக்கிறார் பிரதீப். அந்த கல்லூரியில் படிக்கும் அனுபமா பரமேஸ்வரனை மனதார காதலித்துக் கொண்டிருக்கிறார் பிரதீப். கல்லூரியில் இவருடைய அழிச்சாட்டியம் தாங்க முடியாமல் கல்லூரி பிரின்சிபாலான மிஷ்கின், இவரை  கண்டித்தாலும் அதைப்பற்றி எல்லாம் கவலைப்படாமல்  கல்லூரியில் கெத்து காட்டிய பிரதீப்பை கல்லூரியில் இருந்து வெளியேற்றுகிறார்.  இந்த நிலையில் அவரது காதலி அனுபமா பரமேஸ்வரன் வேறு ஒரு ஆளோடு திருமணம் நிச்சயமாகிவிட்டது என்று சொல்லி அவரிடம் இருந்து பிரேக்-அப் சொல்லி விடைபெறுகிறார். இதனால் மனம் உடைந்த பிரதீப் வாழ்க்கையில் தன் காதலி முன் எப்படயாவது முன்னேற்ற பாதையை நோக்கி செல்ல வேண்டும் என்று முயற்சி செய்கிறார்.

அப்போது குறுக்கு வழியில் வேலையை வாங்கிக் கொடுக்கும் ஒரு ஏஜென்சியை அணுகி அவர்களுக்கு பணம் கொடுத்து போலியான பி.டெக். சர்டிபிகேட் கொடுத்து போலியான இண்டர்வியூக்கு சென்று அதன் மூலம் ஒரு ஐ.டி.கம்பெனியில் வேலைக்கு செல்கிறார். இந்த விஷயம் கல்லூரி பிரின்ஸ்பால் மிஷ்கினுக்கு தெரிய வர அவர் பிரதீப்பை அழைத்து மிரட்டல் விடுக்கிறார். போலி சான்றிதழ் கொடுத்து வேலையில் சேர்ந்ததை நிறுவன எம்டியிடம் கூறி வேலையை விட்டு தூக்கி விடுவேன் என்றவுடன் பிரதீப் 48 அரியர்ஸ் பாடத்தை படித்து முடித்தாரா? இல்லையா? என்பதுதான் “டிராகன்” படத்தின் மீதிக்கதை.

‘லவ் டுடே’ படத்தில் நடித்து ஸ்கோர் செய்த பிரதீப் ரங்கநாதனுக்கு இரண்டாவது படமாக அமைந்து இருக்கிறது ‘டிராகன்’. லவ் டுடே படம் போல் இந்த படமும் அவருக்கு கை கொடுக்குமா என்ற கேள்விக்கு கண்டிப்பாக இந்தப் படம் கை கொடுக்கும் என்பதில் சிறிதும் ஐயமில்லை. இவர் தன் கதாபாத்திரத்தின் தன்மையை உணர்ந்து மிக நேர்த்தியாக நடித்து அனைத்து ரசிகர்களையும் ரசிக்க வைத்து இருக்கிறார். சண்டை காட்சிகளிலும் சரி காதல் காட்சிகளும் நிறைவான நடிப்பை கொடுத்து இருக்கிறார். இவர் ஒரு சிறந்த இயக்குனர் என்றாலும் சிறந்த நடிகர் என்பதையும் மிக அற்புதமாக நிரூபித்து இருக்கிறார். இந்தப் படத்தின் மூலம் மீண்டும் தனது மிகப்பெரிய வெற்றியை பதித்து இருக்கிறார்.

கதாநாயகியாக நடித்திருக்கும் அழகு தேவதைஅனுபமா பரமேஸ்வரன், குன்றாத இளமையோடு வலம் வருகிறார். தன்னை காதலித்த பிரதீப்பிடம் என்னை எவ்வளவு வேண்டுமானாலும் அடி, ஆனால் என்னை விட்டுவிடு..,என்று கேட்கும் காட்சியில் நடிப்பில் அசத்தி இருக்கிறார்.

காயாடு லோஹர் இரண்டாவது காதலியாக வரும் இவர் அழகுக்கு அழகு நடிப்புக்கு நடிப்பு கவர்ச்சிக்கு கவர்ச்சி என்று அனைத்திலும் நம் மனதை கவருகிறார். கவர்ச்சி மட்டுமின்றி நடிப்பிலும் மிக அருமையாக நடிப்பை கொடுத்து ரசிகர்களை கவர்கிறார்.

கல்லூரி முதல்வராக நடித்திருக்கும் மிஷ்கின், கண்டிப்பு இல்லை என்றாலும் படிப்பு தான் வாழ்க்கையின் அடித்தளம் என்பதை மாணவர்களிடம் அழுத்தமாக பதிய வைத்து நடிப்பில் கலக்கி இருக்கிறார்.

விஜே சித்து, ஹர்ஷத் கான் இவர்கள் இருவரும் நகைச்சுவை காட்சிகளில் அனைவரையும் சிரிக்க வைக்கிறார்கள்.

இயக்குநர் கெளதம் வாசுதேவ் மேனன், இயக்குநர் கே.எஸ்.ரவிக்குமார், பி.எல். தேனப்பன், மரியம் ஜார்ஜ், இந்துமதி என அனைவரும் தங்களுக்கு கொடுத்த கதாபாத்திரத்தை உணர்ந்து மிக சிறப்பாக நடித்திருக்கிறார்கள்.

லியோன் ஜேம்ஸ் இசையில் பாடல்களும், பின்னணி இசையும் கதைக்கு ஏற்ப மிக நேர்த்தியாக பயணித்திருக்கிறது.

ஒளிப்பதிவாளர் நிகேத் பொம்மி தனது ஒளிப்பதிவில் கல்லூரி காட்சிகள், வெளிப்புற காட்சிகள், பாடல் காட்சிகளில் மிகவும் சிறந்த முறையில் படமாக்கி இருக்கிறார்.

அடிக்கடி சிகரெட் பிடித்தல், போதை சம்பந்தப்பட்ட காட்சிகளைத் தவிர ஒரு அழகான ஒரு கதையைச் சொல்லி இளைய சமுதாயம் புரிந்துக் கொள்ளும் விதத்தில் இயக்கி இருக்கிறார் இயக்குநர் அஸ்வத் மாரிமுத்து. நேர்த்தியான கதைக்கு தகுந்தவாறு அற்புதமான திரைக்கதை அமைத்து ஒவ்வொரு காட்சியிலும் நம்மை ரசிக்க வைக்கிறார். கடைசியாக பிரதீப் திருமணம் செய்து கொள்கின்ற காட்சியில் தான் தவறு செய்து முன்னேறிய அனைத்தையும் வெளிப்படையாக சொல்லிவிட்டு திருமணத்தை முறித்துக் கொண்டு அமைதியாக செல்லும் காட்சியில் இயக்குனர் கைத்த்ட்டல் பெறுகிறார்.

மொத்தத்தில், ‘டிராகன்’  படம் இளைய சமுதாயத்திற்கு ஒரு பாடம்.

ரேட்டிங் 3/5.

RADHAPANDIAN.