‘ஹிட் தி தேர்ட் கேஸ்’ – திரைப்பட விமர்சனம்!

சென்னை:

நானி, ஶ்ரீ நிதி ஷெட்டி, சமுத்திரக்கனி, சூர்யா ஶ்ரீநிவாஸ், அதில் பாலா, ராவ் ரமேஷ், கோம்லே பிரசாத், ரவீந்திர விஜய், பிரதிக் பாபர், அமித் ஷர்மா இவர்களுடன் கெஸ்ட் ரோலில் கார்த்தி நடித்திருக்கும் படம்தான் ‘ஹிட் – தி தேர்ட் கேஸ்’.

இப்படத்தின் கதையைப் பொருத்தவரையில்,

விசாகப்பட்டினத்தில் காவல்துறை உயர் அதிகாரி நானி, குற்றவாளிகளுக்கு சிம்மசொப்னமாக இருப்பதும், அவர்களுக்கு எதிரான கடுமையான மற்றும் வன்முறை நடவடிக்கைகளுக்கு பெயர் பெற்றவர். இவர் HIT (Homicide Intervention Team) என்கிற குற்றவாளிகளைத் தண்டிக்கும் சிறப்பு புலனாய்வுப் படையிலும் இருக்கிறார். நேர்மையான காவல்துறை அதிகாரியான  நானிக்கு ஆட்கள் நடமாட்டம் இல்லாத காட்டு பகுதியில் சிறு ஆற்றின் நடுவே தலைகிழாக தொங்க விடப்பட்டு ஒரே பாணியில் நாட்டின் பல்வேறு பகுதிகளில் பலர் கொடூரமாக கொலை செய்யப்படும்  தகவல் கிடைக்கிறது. பலர் கொடூரமாக முறையில் கொலை செய்யப்படுவதாக உள்ள அந்த வழக்குகள் பற்றி விசாரிக்க தொடங்கியதும், அதன் பின்னணியில் கொடூரமான கருப்பு உலகம் ஒன்று இருப்பது காவல்துறை உயர் அதிகாரி நானிக்கு தெரிய வருகிறது.

கொலை செய்யப்பட்டவர்களின் கழுத்தை அறுத்து, உடலில் உள்ள சில பாகங்களை எடுத்து தடயங்கள் இல்லாதவாறு நடந்திருப்பதை காவல்துறை அதிகாரி நானி கண்டுபிடிக்கிறார். இதே போல் நாடு முழுவதும் 13 கொலைகள் ஒரே மாதிரியாக இதே பாணியில் நடக்கிறது. இதற்கான காரணம் என்ன? அந்த கொலைகளை செய்யும் கொலைகாரர்கள் யார் என்பதில் பெரிய மர்மம் நீடிக்கிறது. ஒரே மாதிரியான பாணியில் கொலைகள் செய்யும் அந்த கொலையாளிகளை நானி கண்டுபிடித்தாரா?அந்த ’கருப்பு உலகம்’ எங்கே இருக்கிறது என்பதையும், அதனை இயக்கும் மர்ம கும்பலையும் கண்டுபிடித்து சிறையில் அடைத்தாரா? என்பதுதான் ‘ஹிட் – தி தேர்ட் கேஸ்’. படத்தின் மீதிக் கதை.

அர்ஜுன் சர்க்கார் என்ற கதாபாத்திரத்தில் கம்பீரமான  காக்கி சாட்டை போடாத காவல்துறை அதிகாரியாக நடித்திருக்கும் நானி அதிரடி நாயகனாக சண்டைக்காட்சிகளில்  தெறிக்க விடுகிறார். அவரது நடிப்பிலும் எந்த குறையும் வைக்கவில்லை.ஒரு கதாநாயகனின் வலிமையை உயர்த்தும் விதமாக இப்படத்தின்  கதைக்களம் அமைந்திருக்கிறது.அதை மிகச் சரியாகப் பயன்படுத்தி ரசிகர்களிடம் வரவேற்புப் பெறுகிறார்.

கதாநாயகியாக, மிருதுளா என்ற கதாபாத்திரத்தில் ஸ்ரீநிதி ஷெட்டி நடித்திருக்கிறார். அழகாலும் நடிப்பாலும் கவர்கிறார். கதைகேற்றபடி இயல்பாக நடித்து ரசிகர்கள் மனதில் நிற்கிறார்.

சமுத்திரக்கனி கவனம் ஈர்க்கும் கதாபாத்திரம் ஏற்று அதை நிறைவாகச் செய்திருக்கிறார்.

சூர்யா ஸ்ரீநிவாஸ், அதில் பாலா, ராவ் ரமேஷ், கோமளி பிரசாத், மகந்தி ஸ்ரீநாத், ரவீந்திர விஜய், பிரதீக் பாபர், அமித் சர்மா என மற்ற வேடங்களில் நடித்திருப்பவர்கள் கதாபாத்திரத்திற்கு ஏற்றவாறு தங்களது நடிப்பை  வெளிப்படுத்திருக்கிறார்கள்.

ஒளிப்பதிவாளர் சானு ஜான் வர்கீஸ் தனது ஒளிபதிவு மூலம் சண்டைக்காட்சிகளையும், வன்முறை காட்சிகளையும் மிகவும் சிறப்பாக படமாக்கி இருக்கிறார்.

மிக்கி ஜே மேயரின் இசையில் பாடல்கள் சுமார் ரகம்தான் என்றாலும் பின்னணி இசையில் திரைக்கதையின் தன்மையை உணர்ந்து விறுவிறுப்பான முறையில் பயணித்து இருப்பதை பாராட்டலாம்.

கதை, எழுதி இயக்கியிருக்கிறார் சைலேஷ் கோலானு. ஏற்கெனவே பார்த்துப் பழகிய கதைதானே என்று எந்த இடத்திலும் உணராத விதத்தில்  ஒவ்வொரு நிமிடமும் அடுத்து என்ன என்ற கேள்வியோடு பார்வையாளர்களை இருக்கையில் கட்டிப்போட்டு, சலிப்பு வந்துவிடாதபடி காட்சிகளை மிக சிறப்பாக இயக்கி இருப்பதை பாராட்டலாம்.

மொத்தத்தில், ‘ஹிட் – த தேர்ட் கேஸ்’  படம் ரசிகர்கள் மத்தியில் ஹிட்டாகும்.

ரேட்டிங் 3/5.

RADHAPANDIAN.