சென்னை:
மெட்ராஸ் மோஷன் பிக்சர்ஸ் புரொடக்ஷன்ஸ் நிறுவனம் சார்பில் கார்த்திகேயன் மணி, தேவ் ஆனந்த், ஆர்ச் தாம்சன், ராபர்ட் மார்டிசென்கோ, கோரின் மார்டிசென்கோ தயாரித்து ட்ரீம் வாரியர் பிக்சர்ஸ் நிறுவனம் வழங்கும் ‘மெட்ராஸ் மேட்னி’ படத்தை எழுதி இயக்கியிருக்கிறார் இயக்குநர் கார்த்திகேயன் மணி.
இப்படத்தில் சத்யராஜ், காளி வெங்கட், ரோஷினி, ஷெல்லி, விஷ்வா, ஜார்ஜ் மரியான், அர்ச்சனா சந்தூக், சுனில்சுகதா, மதுமிதா, சாம்ஸ், கீதா கைலாசம், பானுப்பிரியா மற்றும் பலர் நடித்திருக்கிறார்கள்.
ஒவ்வொருவர் வாழ்க்கையிலும் அவர்கள் தாழ்த்தப்பட்டவர்களாக இருந்தாலும், உயர்ந்த ஜாதியை சேர்ந்தவராக இருந்தாலும் கஷ்டப்பட்டு உழைத்தால் தான் முன்னேற்ற பாதையை நோக்கிச் செல்ல முடியும் என்பதை இந்த ‘மெட்ராஸ் மேட்னி’ என்ற படம் உருவாக்கப்பட்டு இருக்கிறது. இதில் காளி வெங்கட் கதாநாயகனாக நடித்திருக்கிறார்.
ஒரு முதியோர் ஒய்வு இல்லத்தில் வசிக்கும் அறிவியல் சார்ந்த கதைகளை எழுதும் எழுத்தாளர் சத்யராஜ் அங்கே பராமரிப்பு வேலைகளை செய்யும் ஒரு பெண் நடுத்தர குடும்பத்தின் வாழ்க்கையைப்பற்றி ஒரு கதை எழுதும்படி கூறுகிறார். அதன்படி அந்த எழுத்தாளர் சுவாரஸ்யம், சாகசம் இல்லாத நடுத்தர குடும்பத் தலைவன் காளி வெங்கட் பற்றி எழுதும் கதையாக, சத்யராஜ் தன்னுடைய குரலில் படத்தின் காட்சிகளை விளக்கும் விதமாக படம் துவங்குகிறது.
சென்னையில், கதாநாயகன் காளி வெங்கட் மனைவி ஷெல்லி கிஷோர், மகள் ரோஷ்னி மற்றும் மகன் விஷ்வா அனைவரையும் தன்னுடன் இணைத்து மிக எளிமையான முறையில் குடும்ப வாழ்க்கையை நடத்தி வருகிறார். குப்பை அள்ளும் தொழிலாளியான அவர் பிறகு ஒரு ஆட்டோ ஓட்டுனராக பணிபுரிந்து தன் மகன் விஷ்வா மற்றும் மூத்த மகள் ரோஷினி இருவரையும் நன்றாக படிக்க வைக்கிறார். பெங்களூரில் ஒரு ஐடி கம்பெனியில் பணி புரியும் தன் மகள் ரோஷினிக்கு மாப்பிள்ளை தேடும் சமயத்தில் சரியான முறையில் மாப்பிள்ளை யாரும் அமையவில்லை.
இந்த சூழ்நிலையில் தனது மகன் விஷ்வாவை மேற்படிப்பு படிக்க வைக்க வங்கியில் கடன் வாங்கி கல்லூரியில் பணம் செலுத்த முயல்கிறார் காளி வெங்கட். அப்போது வங்கி மானேஜரிடம் தாழ்ந்து போவதையும், பணிவாக பேசுவதையும் கண்டு பிடிக்காத காளி வெங்கடின் மகன் விஷ்வா, தந்தை மீது அதிக கோபத்தில் இருந்து வருகிறான். இதெல்லாம் காளி வெங்கட்டிற்கு ஒரு போராட்டமாகவே மாறுகிறது.இந்த சூழ்நிலையில் தன் மகன் விஷ்வாவை மேற்படிப்பு படிக்க வைத்தாரா? மகள் ரோஷினிக்கு திருமணம் செய்து வைத்தாரா? என்பதுதான் ‘மெட்ராஸ் மேட்னி’ படத்தின் மீதி கதை.
இப்படத்தில் கதாநாயகனாக நடித்திருக்கும் காளி வெங்கட் தனது இயல்பான நடிப்பு மூலம் கண்ணன் என்ற கதாபாத்திரமாகவே மாறி வாழ்ந்து இருக்கிறார். அவருடைய உடல்மொழியும், தமிழ் வசன உச்சரிப்பும் மிக சிறப்பாக கைகொடுத்திருக்கிறது. தன் குழந்தைகளின் எதிர்காலத்திற்காக நேரம், காலம் பார்க்காமல் உழைப்பதும், மனைவியை இழிவுபடுத்தும் போது கோபமடைந்து மின்சாரத்துறை அதிகாரியை கன்னத்தில் அறைவதும், அதன் பின் மகளிடமும், மகனிடமும் பாசத்தை கொட்டுவது போன்ற காட்சிகளில் ஒரு இயல்பான நடுத்தர குடும்பத் தலைவனாக நடிப்பை வெளிப்படுத்தி படம் பார்க்கும் அனைவரையும் உருக வைத்து விடுகிறார்.
கதை ஆசிரியர் ஜோதி ராமையா கதாபாத்திரத்தில் உட்கார்ந்த இடத்தில் இருந்தே முழுப்படத்தையும் நகர்த்திச் செல்லும் கதாபாத்திரம் சத்யராஜுக்கு என்றாலும் அதை உணர்ந்து நிறைவாகவே நடித்திருக்கிறார்.
காளி வெங்கட்டின் மனைவியாகவும் இரண்டு குழந்தைகளுக்கு தாயாகவும் ஒரு உன்னதமான கதாபாத்திரத்தில் நடித்திருக்கும் ஷெல்லியும் தனக்கு கிடைத்த கதாபாத்திரத்தை உணர்ந்து மிகவும் சிறப்பாகவே செய்து முடித்திருக்கிறார்.
காளி வெங்கட்டின் மகளாக நடித்திருக்கும் ரோஷினி, மகன் கதாபாத்திரத்தில் நடித்திருக்கும் விஷ்வா இருவரும் யதார்த்தமாக நடித்து கைத்தட்டல் பெறுகிறனர்.
கீதா கைலாசம் என்றாலே நினைவுக்கு வரும் கதாபாத்திரத்துக்கு நேர்மாறாக நடித்து வரவேற்புப் பெறுகிறார். அர்ச்சனா, சுனில்சுதா, சாம்ஸ், மதுமிதா ஆகிய நடிகர்களும் தங்களுக்கு கொடுத்த கதாபாத்திரமுணர்ந்து நடித்திருக்கிறார்கள்.
ஒளிப்பதிவாளர் ஆனந்த் ஜி. கே.வின் ஒளிப்பதிவு நம்மை கதையின் உலகத்திற்குள் கூட்டிச் சென்று கண்ணெதிரில் நடப்பது போல் தத்ரூபமாக உள்ளது.
கே.சி. பாலசாரங்கன் இசையில் பாடல்கள் மற்றும் பின்னணி இசை இப்படத்திற்கு மிகப்பெரிய அளவில் பலம் சேர்த்து இருக்கிறது.
கதை, எழுதி இயக்கியிருக்கிறார் கார்த்திகேயன் மணி. ஒரு எளியவனின் குடும்ப வாழ்க்கை மற்றும் அவருடைய குடும்பத்தை இயல்பு மாறாமல் எடுத்து படம் பார்க்கும் அனைவர் மனதையும் கவரும்படி அன்றாட வாழ்க்கையில் நடக்கும் கஷ்டங்கள், அவமானங்கள் போன்ற நிகழ்வுளை பலவிதத்தில் எடுத்துக் காட்டுகளுடன் சுவாரசியமாகச் சொல்லி இருக்கிறார். இன்றைய நடுத்தர மக்களின் எண்ணங்களை பிரதிபலிக்கும் விதமாக இப்படத்தை கொடுத்துள்ள இயக்குனர் கார்த்திகேயன் மணியை பாராட்டலாம்.
மொத்தத்தில் – ‘மெட்ராஸ் மேட்னி‘ படம் ஒரு குடும்ப கஷ்டங்களை சொல்லும் படம்.
ரேட்டிங் 3/5.
RADHAPANDIAN.