‘ஜென்ம நட்சத்திரம்’ – திரைப்பட விமர்சனம்!

சென்னை:

அமோஹம் ஸ்டூடியோஸ் ஒயிட் லாம்ப் பிக்சர்ஸ் தயாரிப்பில் கே.சுபாஷினி தயாரித்து இயக்குநர் பி.மணிவர்மன் இயக்கியுள்ள படம் ‘ஜென்ம நட்சத்திரம்’. இப்படத்தில் தமன் அக்ஷன், மால்வி மல்ஹோத்ரா, மைத்ரேயா, ரக்ஷா செரின், சிவம், அருண் கார்த்தி, காளி வெங்கட், முனிஸ்காந்த், வேல ராமமூர்த்தி, தலைவாசல் விஜய், சந்தான பாரதி, பாய்ஸ் ராஜன், நக்கலைட்ஸ் நிவேதிதா மற்றும் பலர் நடித்து​ள்ளனர்.

இப்படத்தின் கதையைப் பொருத்தவரையில்,

தமிழ் திரையுலகில் ஒரு இயக்குனராக வலம் வர வேண்டும் என்று எண்ணத்தில் நடிகர் தமன் பல சினிமா கம்பெனிகளில் கதை சொல்வதற்காக ஏறி இறங்குகிறார். இந்த நிலையில் அவரது மனைவி தூங்கும் சமயத்தில் பல அமானுஷ்ய சம்பவங்கள், கெட்ட கனவுகள் அடிக்கடி வருகின்றன. இந்த விஷயத்தை தன் கணவர் தமனிடம் சொல்லி பயந்து நடுங்குகிறார் மனைவி மால்வி மல்ஹோத்ரா . இது ஒரு புறம் இருக்க,  மற்றொருபுறம் எம்எல்ஏ வேல ராமமூர்த்தியிடம் பணி புரியும் காளி வெங்கட்டின் மகளுக்கு அறுவை சிகிச்சை செய்வதற்கு 40 லட்சம் தேவைப்படுகிறது.  அந்த 40 லட்சம் பணத்தை வேலராமமூர்த்தியிடம் காளி வெங்கட் கேட்கும்போது, அவரை அடித்து உதைத்து வெளியே அனுப்பி விடுகிறார்.  இந்நிலையில் வேலராமமூர்த்தியின் பல கோடி ரூபாய் பணம் இருக்கும் இடத்தை காளி வெங்கட் தெரிந்து வைத்து இருந்ததால் அங்கு சென்று 57 கோடி ரூபாயை எடுத்துக் கொண்டு ஒரு  பாழடைந்த தொழிற்சாலையில்  வைத்து விட்டு வெளியே வரும்போது வேலராமமூர்த்தியின் அடியாட்களால் கொல்லப்படுகிறார்.

அவர் கொல்லப்படும் முன் உயிருக்கு போராடிக் கொண்டிருந்த நிலையில் கதாநாயகி மால்வி மல்கோத்ராவிடம் தனது பெண் குழந்தையின் மருத்துவ செலவுக்காக 40 லட்ச ரூபாய் தேவைப்படுவதாகவும் அதற்கான ரூபாய் 57 கோடியை பாழடைந்த தொழிற்சாலையில் மறைத்து வைத்திருப்பதாகவும்  கூறிவிட்டு இறந்து விடுகிறார். இந்த விஷயத்தை மால்வி மல்கோத்ரா தன் கணவன் தமனிடம் சொல்ல, அதனால் அந்த பணத்தை எடுப்பதற்காக தன் நண்பர்களுடன் அந்த பாழடைந்த தொழிற்சாலைக்கு செல்கிறார் தமன். அந்தப் பாழடைந்த இடத்துக்குச் சென்ற போது தன் மனைவி மால்வி மல்கோத்ரா கனவில் வந்த பல பயங்கரமான உருவங்கள் மனைவியின் கண்ணில் படுகின்றன.

இதனால் பயந்து போன தமனின் மனைவி மால்வி மல்கோத்ரா  நாம் இங்கு இருக்க வேண்டாம்… நாம் சென்று விடலாம் என்று பயத்துடன் தமனிடம் கூறுகிறார்.  அவர் தன் மனைவிக்கு தைரியம் சொல்ல அந்த பணம் எங்கே இருக்கிறது என்பதை பங்களாவிற்கு உள்ளே சென்ற அனைவரும் 57 கோடி பணம் எங்கிருக்கிறது என்று அலசி ஆராய்கின்றனர்.  அப்போது தமனின் நண்பர்கள் ஒவ்வொருவராக கொல்லப்படுகின்றனர். இதனால் பயத்தில் நடுங்கிய தமனின் மனைவி மால்வி மல்கோத்ரா பயந்து வெளியே ஓடி விடுகிறார்.  இறுதியில் தன் நண்பர்களைகொன்றது யார் என்பதை தமன் கண்டுபிடித்தாரா? மருத்துவமனையில் அனுமதிக்கப்பட்ட காளி வெங்கட்டின் பெண் குழந்தையை காப்பாற்றினாரா? என்பது தான் ‘ஜென்ம நட்சத்திரம்’ படத்தின் மீதி கதை.

இப்படத்தில் கதாநாயகனாக நடித்திருக்கும் தமன் இயல்பாக நடித்து கதை களத்திற்கு ஏற்றவாறு தன் கதாபாத்திரத்தின் தன்மையை உணர்ந்து சிறப்பான நடிப்பை வெளிப்படுத்தியுள்ளார்.  மர்மமான  நிகழ்வுகளையும், பயங்கர உருவங்களையும் கண்டு பயப்படாமல் துணிவுடன் நிதானமாக எதிர்கொள்ளும் காட்சிகளில் அதற்குத் தகுந்தவாறு நடித்து வரவேற்புப் பெறுகிறார்.

தமன் மனைவியாக நடித்திருக்கும் மால்வி மல்ஹோத்ராவுக்கு எப்போதும் பயந்து நடுங்கும் கதாபாத்திரம். அந்த கதாபாத்திரத்திற்கேற்ப அமானுஷ்ய சம்பவங்கள், கெட்ட கனவுகளைக் கண்டு பயப்படும்போது நடிப்பில் கலக்கி இருக்கிறார். படத்தில் அவரும் பயந்து நம்மையும் பயப்பட வைக்கிறார்..

தமனின் நண்பர்களாக நடித்திருக்கும் மைத்ரேயா, சிவம், அருண் கார்த்தி ஆகியோர் மற்றும் மைத்ரேயாவின் காதலியாக நடித்திருக்கும் ரக்‌ஷா ஷெரின் ஆகியோர் தங்களுக்கு கொடுத்த கதாபாத்திரத்தில் சிறப்பாக நடித்து இந்த கதைக்கு பலம் சேர்க்கும் வகையில் பயணித்தி ருக்கிறார்கள்.

காளி வெங்கட், வேல ராமமூர்த்தி, முனீஷ்காந்த், தலைவாசல் விஜய், சந்தான பாரதி, நக்கலைட்ஸ் நிவேதிதா, யாசர் ஆகியோரும் அவரவர் கதாபாத்திரத்தை உணர்ந்து நன்றாகச் நடித்திருக்கிறார்கள்.

ஒளிப்பதிவாளர் கே.ஜி பாழடைந்த தொழிற்சாலையையும் பார்வையாளர்களைப் பயமுறுத்தும் வகையில் அங்கு நடக்கும் நிகழ்வுகளையும் மிக திறமையாக படமாக்கியுள்ளார்.

இசையமைப்பாளர் சஞ்சய் மாணிக்கம் பாடல்கள் மற்றும் பின்னணி இசை இரண்டையும் கதைக்கு ஏற்றவாறு அனைவரும் பயப்படும் விதத்தில் கொடுத்திருக்கிறார்.

கடவுள் நம்பிக்கை சார்ந்து பல படங்கள் வந்து இருக்கின்றன, ஆனால் அதற்கு எதிரான சாத்தான் நம்பிக்கை அதன் மூலம் நடக்கும் நிகழ்வுகள் ஆகியனவற்றை மையமாகக் கொண்டு ஒரு திகில், திரில் நிறைந்த படத்தைக் கொடுக்க வேண்டும் என்ற எண்ணத்தில் தமிழ் ரசிகர்களுக்கு  இந்த படத்தை கொடுத்திருக்கிறார் இயக்குநர் பி.மணிவர்மன். ஆனால் இந்தக் கதையை விறுவிறுப்பாக்கி ரசிகர்களிடம்  கொண்டு செல்வதற்கு இன்னும் கொஞ்சம் யோசித்து செயல்பட்டிருக்கலாம்.

மொத்தத்தில், ‘ஜென்ம நட்சத்திரம்’  படம் ரசிக்கலாம்.

ரேட்டிங் 2.5/5.

RADHAPANDIAN.