’மார்க்’ திரைப்பட விமர்சனம்!

சென்னை:

சத்ய ஜோதி ஃபிலிம்ஸ் மற்றும் கிச்சா கிரியேஷன்ஸ் தயாரிப்பில், விஜய் கார்த்திகேயன் இயக்கத்தில் உருவாகியுள்ள திரைப்படம் தான் ‘மார்க்’. இப்படத்தில்  நடிகர் கிச்சா சுதீப், நவீன் சந்திரா, குரு சோமசுந்தரம், விக்ராந்த், யோகி பாபு, ரோஷினி பிரகாஷ், அர்ச்சனா கொட்டிகே, தீப்ஷிகா, அஷ்வின் ரமாபா நேசன், பிரத்பல் ஹாசன், கோட்பால் ஹாசன்  மற்றும் பலர் நடித்திருக்கின்றனர்.

இப்படத்தின் கதையைப் பொருத்தவரையில்,

ஒரு மிகப்பெரும் ரௌடி சாம்ராஜ்யத்தை நடத்தி வருகிறார் நவீன் சந்திரா. இவரின் தம்பியான விக்ராந்த் தனது காதலியுடன் யாருக்கும் தெரியாமல் ஓட்டம் பிடிக்கிறார். இதனால் கோபம் அடைந்த நவீன் சந்திரா, தனது தம்பி விக்ராந்தை கொல்ல வேண்டும் என்று துடிக்கிறார். நவீன் சந்திராவின் பிடியிலிருந்து தப்பிக்கவும் பணத் தேவைக்காகவும் 16 குழந்தைகளை கடத்தி வைத்திருக்கிறார் விக்ராந்த். இந்த சூழலில் ஒரே நாளில் 16 சிறு குழந்தைகள் கூட்டமாகக் கடத்தப்பட்டதைக் கண்டு அந்தக் குழந்தைகளை மீட்பதற்கு காவல்துறையில் இடைநீக்கம் செய்யப்பட்ட கிச்சா சுதீப், தன்னுடன் தேவைக்கேற்ப போலீஸ் அதிகாரிகளுடன் சேர்ந்து இந்த வழக்கை கையாளப் புறப்படுகிறார்.

இந்த நேரத்தில்  அவரிடம் முதலமைச்சரின் கொலைக்கு ஆதாரமான வீடியோவைத் தேடிக் கண்டுபிடிக்கும் பணியும் கொடுக்கப்படுகிறது. ஒரு பக்கம் கடத்தப்பட்ட குழந்தைகளையும் மறுபக்கம் முக்கியமான ஆதாரமான வீடியோவையும் தேடி சாகச பயணம் மேற்கொள்கிறார் கிச்சா சுதீப்.  கடத்தப்பட்ட சிறுவர்களை தேடும் சுதீப்புக்கு, மறுபக்கம் முதலமைச்சர் கொலை செய்யப்பட்டதற்கான வீடியோ ஆதாரத்தையும் தேடி கண்டுபிடிக்கும்போது, இந்த இரண்டு சம்பவங்களுக்கும் முக்கிய தொடர்பு இருப்பதையும் கண்டுபிடிக்கிறார். இறுதியில் 16 குழந்தைகளையும் கிச்சா சுதீப் காப்பாற்றினாரா? முதலமைச்சரை கொலை செய்த வீடியோ ஆதாரம் கிடைத்ததா? இல்லையா? என்பதுதான் ‘மார்க்” படத்தின் மீதி கதை.

தமிழில் சில படங்களில் வில்லனாக தோன்றினாலும் இப்படத்தில் கதை முழுவதையும் தனது தோளில் சுமந்து தாங்கிச் சென்றிருக்கிறார் கிச்சா சுதீப். ஆரம்பக் காட்சியிலேயே போலீஸ் நிலையத்தில் ரவுடி கூட்டத்தை தெறிக்க விடும் காட்சியில் ரசிகர்களை விசில் அடிக்க வைக்கிறார் கிச்சா சுதீப். இடை நீக்கம் செய்யப்பட்ட காவல்துறை அதிகாரியாக இருந்தாலும்,  கடைசி வரை காக்கிச்சட்டை அணிந்தவராக சுதீப் காணப்படவே இல்லை. மப்டி உடையிலேயே மாஸ் காட்டி அதிரடி சண்டைக் காட்சிகளில் வெளுத்து  வாங்குகிறார்.

கதாநாயகனாக சில படங்களில் நடித்து வந்த நவீன் சந்திரா இந்தப் படத்தில் முழுக்க முழுக்க வில்லனாக ஆக்ரோஷமாக நடித்து மிரட்டி இருக்கிறார். இறுதிக் கட்ட காட்சியில் கிச்சா சுதிப்பிற்கும் நவீன் சந்திராவிற்கும் இடையில் நடக்கும் சண்டைக் காட்சிகள் முழுக்க முழுக்க அதிரடி மட்டுமே நிறைந்திருக்கிறது.

விக்ராந்த் இப்படத்தில் வில்லன் வேடத்தில் நடித்திருக்கிறார். இனி இவர் வில்லன் வாய்ப்பை தொடர்ந்து தயங்காமல் ஏற்றால் நல்லதொரு இடத்தை பிடிக்க கண்டிப்பாக வாய்ப்பிருக்கிறது.

மற்றொரு வில்லனாக நடித்திருக்கும் குரு சோமசுந்தரத்திற்கு பெரிய அளவிலான கதாபாத்திரம் இல்லை என்றாலும் கொடுத்த வேலையை குறையின்றி செய்திருக்கிறார்.

யோகி பாபுவுக்கு இப்படத்தில் வழக்கமான காமெடி பெரிதாக எடுபடவில்லை என்றாலும் படத்திற்கு அடையாளமாக நடித்திருக்கிறார்.

ரோஷ்னி பிரகாஷ், தீபிக்‌ஷா, ட்ராகன் மஞ்சு, கோபால்கிருஷ்ணன் தேஷ்பாண்டே, அபிஷேக் ஜோசப் ஜார்ஜ், அர்ச்சனா கோட்டி உள்ளிட்ட மற்ற கதாபாத்திரங்களில் நடித்திருப்பவர்கள் தங்களுக்கு கொடுத்த கதாபாத்திரத்திற்கு ஏற்ப நடித்திருக்கிறார்கள்.

இசையமைப்பாளர் பி.அஜனீஸ் லோக்நாத், பாடல்கள் மற்றும் பின்னணி இசையில் கதாபாத்திரங்களுக்கு  ஏற்ப படத்திற்கு மிகப்பெரும் பலத்தை சேர்த்து இருக்கிறார்.

இப்படத்தில் பெரும்பாலான காட்சிகள் இரவில் படமாக்கப்பட்டாலும், பார்வையாளர்களுக்கு அந்த உணர்வே ஏற்படாத வகையில் மிக சிறப்பாக ஒளிப்பதிவு செய்து இருக்கிறார் ஒளிப்பதிவாளர் சேகர் சந்துரு.

இப்படத்தின் கதையை எழுதி விஜய் கார்த்திகேயா  இயக்கி இருக்கிறார். முக்கால்வாசி படத்தை சண்டை இயக்குநர்கள் கையில் ஒப்படைத்து விட்டு மீதி இருக்கும் உச்சகட்ட காட்சி குழந்தைகள் சார்ந்த சென்டிமென்ட் காட்சிகளில் மட்டும்தான் இயக்குநர் தன் பணியை செய்து இருக்கிறார் என்பது தெளிவாக தெரிகிறது. ஒரு சாதாரண கதையை எடுத்துக்கொண்டு பிரம்மாண்டமான காட்சிகளின் மூலம் தன்னை மாஸ் பட இயக்குநர் என்று வெளிப்படுத்த முயற்சி செய்து அதில் வெற்றியும் பெற்றுள்ளார் இயக்குநர்.

மொத்தத்தில், ‘மார்க்’ படம் சண்டைப் பிரியர்களுக்கு விருந்து.

ரேட்டிங் 3/5.

RADHAPANDIAN.