’லீடர்’ திரைப்பட விமர்சனம்!

லெஜண்ட் சரவணன், ஷாம், ஆண்ட்ரியா ஜெர்மையா சந்தோஷ் பிரதாப், பாயல் ராஜ்புட், லால்,பாகுபலி பிரபாகரன், அமிர்தா ஐயர், வீ டிவி கணேஷ், இயல், ஐஸ்வர்யா பாஸ்கரன் ,ஜார்ஜ் மரியான், அறந்தாங்கி நிஷா, படவா கோபி, ஆதித்யா கதிர், ஜெயஸ்மித்ரா, ஷர்மிதா சாம், யோகிராம், ஓஏகே சுந்தர், மகாநதி சங்கர் ,வேல் அருணாச்சலம், நிரஞ்சன் மோசஸ் , ஷோபன் பாபு ,அசோக் பாண்டியன் உள்ளிட்ட பலர் நடித்துள்ள படம்தான் “லீடர்”

இப்படத்தை ஆர் எஸ் துரை செந்தில் குமார் எழுதி இயக்கியுள்ளார். வெங்கடேஷ் எஸ் ஒளிப்பதிவு செய்துள்ளார். பிரதீப் ஈ ராகவ் படத்தொகுப்பு செய்துள்ளார். ஜிப்ரான் இசை அமைத்துள்ளார்.

இப்படத்தின் கதையைப் பொருத்தவரையில்,

தூத்துக்குடி பகுதியில் சக்திவேல் என்கிற லெஜெண்ட் சரவணன் தனது மகளுடன் வாழ்ந்து வருகிறார். அவருடைய ஓனர் விடிவி கணேஷ் நடத்தும் கார் மெக்கானிக் ஷெட்டில் கார் பழுது பார்க்கும் பணியில் இருக்கிறார் லெஜண்ட்  சரவணன். கார் மெக்கானிக்காக வேலை பார்க்கும் அவருக்கு மனைவி இல்லை .மகளே தனது உலகமாக நினைத்து வாழ்ந்து வருகிறார். இந்த சூழலில் அந்த கார் மெக்கானிக்  ஷெட்டில்  தூத்துக்குடி  துறைமுகத்தில் உள்ள பாகுபலி பிரபாகர் என்ற தாதா தன்னுடைய கார்களை எல்லாம் விடிவி கணேஷ் நடத்தும் மெக்கானிக் ஷெட்டில் வைத்து ரிப்பேர் செய்து வருகிறார்.  இந்த சூழலில் சர்வதேச கடத்தல் கும்பல் தலைவனாக இருக்கும் பிரதாப் சந்தோஷ் என்பவருடன் இணைந்து பாகுபலி பிரபாகர் அம்மோனியம் நைட்ரேட்  உள்ள கண்டெய்னர்களை வெடிக்க  செய்து நமது தமிழகத்தில் ஒரு பெரிய அழிவை ஏற்படுத்த நினைக்கிறார்.  இந்த கடத்தல் கும்பலின் நாசவேலையை தடுக்கவும், அவர்களது  திட்டங்களை அழிக்கவும் முயலும் ஆண்ட்ரியா அந்த தாதாவின் குற்ற கும்பலை கண்டுபிடித்து வெளிச்சத்திற்கு கொண்டு வர போராடுகிறார்.

ஆனால் அதற்கு உடந்தையாக இருக்கும் காவல் துறை அதிகாரிகளிடம் ஆண்ட்ரியா  தூத்துக்குடி  துறைமுகத்தில் உள்ள கடத்தல் கும்பல் மிகப்பெரிய அழிவை ஏற்படுத்த இருப்பதை சொன்னாலும் அவர்கள் உதவி செய்ய மறுக்கின்றனர்.  இந்த சூழலில் அடிக்கடி மெக்கானிக் ஷெட்டில் இருந்து காரை எடுத்துக் கொண்டு தூத்துக்குடி துறைமுகத்தில் கொண்டு செல்லும் லெஜெண்ட் சரவணனிடம் தூத்துக்குடி துறைமுகத்தில் நடக்கும் கடத்தல்களை கண்டுபிடிக்க தனக்கு உதவி செய்யுமாறு லெஜெண்ட் சரவணனிடம் கேட்கிறார் ஆண்ட்ரியா.  ஆனால் லெஜெண்ட் சரவணன் அவருக்கு உதவி செய்ய மறுக்கிறார்.  ஆனால் ஆண்ட்ரியா போடும் திட்டத்தால் லெஜண்ட் சரவணன், பிரபாகரனின் கடத்தல் பொருளை போலீஸிடம் சிக்க வைப்பதோடு, அவரது சாம்ராஜ்யத்தையே அழிக்கும் வேலைகளில் ஈடுபடுகிறார்.

இந்த சூழலில் லெஜண்ட் சரவணனின் குழந்தையை சர்வதேச கடத்தல் கூட்டம் கடத்தி வைத்துக் கொண்டு  போலீஸ் கஸ்டடியில் இருக்கும் பலகோடி மதிப்புள்ள வெடிபொருள் மருந்தை மீட்டுத் தந்தால் தான் குழந்தையை விடுவிப்போம் என்று மிரட்டல் விடுகிறது .இந்த சூழ்நிலையில் லெஜெண்ட் சரவணன் ஒரு சாதாரண கார் மெக்கானிக் கிடையாது. அவர் பொன்மாறன் என்ற பெயரில் பணியாற்றிய இந்தியாவின் முன்னாள் ரா பிரிவு அண்டர் கவர் ஏஜென்ட் என்பதும் ஏழு பேர் கொண்ட சிறப்பு படைக்கு தலைமை தாங்கியவர் என்பதும் தெரிய வருகிறது.  இந்த சூழலில் லெஜெண்ட் சரவணன் தன் மகளை கடத்திச் சென்ற அந்தக் கடத்தல் கும்பலிடம் இருந்து காப்பாற்றினாரா? இல்லையா? என்பதை பல  திடுக்கிடும் திருப்பங்களுடன் உருவாகி இருக்கும் படம்தான் “லீடர்”.

இப்படத்தில் கதாநாயகனாக நடிக்கும் லெஜெண்ட் சரவணன், தாய் இல்லாமல் வாழும் மகளுக்கு ஒரு தந்தையாக இருக்கும்போது பார்க்க பரம சாதுவாக  அறிமுகமாகி,  தனது ஒவ்வொரு அதிரடியான செயல்கள் மற்றும் சண்டைக்காட்சிகள் மூலம் கதைக்கு பெரும் பலம் சேர்த்திருக்கிறார். தனது மகளுடன் இருக்கும் போது அவரது நடிப்பு கதையின் தேவைக்கேற்ப அமைதியான ஆக்ரோஷமான முகபாவனைகளை வெளிப்படுத்துகின்ற அவரது தோற்றம் மற்றும் உடல் மொழியில் மாறுபட்டு இடைவேளைக்குப் பிறகு ஆக்‌ஷன் காட்சிகளிலும் மற்றும் கிளைமாக்ஸ் காட்சியில் வந்தே பாரத் ரயிலில் அதிரடி சண்டைகள் போடும்போது அனைவரையும் வியக்க வைக்கிறார்.

நாயகனின் மனைவியாக நடித்திருக்கும் பாயல் ராஜ்புத்துக்கு, அதிக வேலை இல்லை என்றாலும், கதையின் திருப்பத்திற்கு ஏற்றவாறு இயல்பான நடிப்பில் அனைவரையும் ஈர்த்துள்ளார்.

நேர்மைக்காகப் போராடும் காவல் அதிகாரியாக வரும் ஆண்ட்ரியா,தனது துறை ரீதியிலான பயணத்தில் மன நெருக்கடிகளை எதிர்கொண்டாலும் அடிதடி காட்சிகளில் நம் மனதில் பதிகிறார் .

காவல்துறை அதிகாரியாக ஷாம் வரும் காட்சிகள் அவருடைய அனுபவ நடிப்பும் படத்தை சுவாரசியமாக்குகிறது.

வில்லனாக நடித்திருக்கும் சந்தோஷ் பிரதாப், தனக்கான அடையாளத்தை பதிவு செய்திருக்கிறார்.

பாகுபலி பிரபாகரன், லால், விடிவி கணேஷ், அமிர்தா ஐயர், சிறுமி இயல், ஜார்ஜ் மரியன், ஐஸ்வர்யா பாஸ்கரன்,  அறந்தாங்கி நிஷா, படவா கோபி, ஆதித்யா கதிர், ஜெயஸ்மித்ரா, ஷர்மிதா சாம், யோகிராம், ஓஏகே சுந்தர், மகாநதி சங்கர் என மற்ற கதாபாத்திரங்களில் நடித்திருக்கும் அனைத்து நட்சத்திரங்களும் தங்களுக்கு கொடுத்த கதாபாத்திரத்தை உணர்ந்து மிக சிறப்பாக நடித்திருக்கிறார்கள்.

ஒளிப்பதிவாளர் எஸ்.வெங்கடேஷ்,பாசமான காட்சிகளையும், ஆக்ஷன் காட்சிகளையும் மிக சிறப்பாக ஒளிப்பதிவு செய்து அசத்தி இருக்கிறார்.

ஜிப்ரான் இசையில் பாடல்கள் அனைத்தும் கேட்கும்படியாக இருக்கிறது. பின்னணி இசை கதையின் வேகத்திற்கு ஈடுகொடுக்கும் விதத்தில் பயணித்திருக்கிறது.

லெஜெண்ட் சரவணனை கதாநாயகனாக வைத்து “லீடர்” என்ற கதையை முழுமையான ஆக்‌ஷன் படமாகவும், அனைத்து தரப்பினரும் பார்க்க கூடிய ஒரு பொழுதுபோக்கு படமாகவும் கொடுத்ததில் இயக்குநர் ஆர்.எஸ்.துரை செந்திலை பாராட்ட வேண்டும். அமைதியாக வாழ்ந்துக் கொண்டிருக்கும் கதாநாயகனின் அதிரடியான மறுபக்கம், என பல படங்கள் வந்திருந்தாலும், அவற்றை சொல்லும் விதத்தில் அந்த படங்களை விட இந்த படத்தை மிக பெரிய வெற்றிப் படமாக்கிய இயக்குனர் ஆர்.எஸ்.துரை செந்திலுகுக்கு பாராட்டுக்கள்.

மொத்தத்தில், ‘லீடர்’ அனைத்து ரசிகர்களுக்கும் பிடிக்கும்.

ரேட்டிங் 4/5.

RADHAPANDIAN.