’பிளாஸ்ட்’ திரைப்பட விமர்சனம்!

சென்னை:

ஏஜிஎஸ் என்டர்டெயின்மென்ட் சார்பில் கல்பாத்தி எஸ்.அகோரம், கல்பாத்தி எஸ்.கணேஷ், கல்பாத்தி எஸ்.சுரேஷ் தயாரித்திருக்கும் ‘பிளாஸ்ட்’ படத்தை எழுதி இயக்கியிருக்கிறார் சுபாஷ் கே ராஜ்.

இப்படத்தில் அர்ஜுன், அபிராமி, ப்ரீத்தி  முகுந்தன்,விவேக் பிரசன்னா, ஜான் கொக்கேன், அர்ஜுன் சிதம்பரம் ,பவன், பாலா ஹாசன், வினோத் சாகர் மற்றும் பலர் நடித்துள்ளனர்.

இப்படத்தின் கதையைப் பொருத்தவரையில்,

ஒரு பெண் என்பவள் ஆணுக்கு நிகரான விதத்தில்  எப்படி நம் சமூகத்தை மன உறுதியோடு எதிர் கொள்ள வேண்டும் என்கிற கருத்தை மையமாக வைத்து இந்தப் ‘பிளாஸ்ட்’ படம் உருவாகி இருக்கிறது. கராத்தே பயிற்சியாளரான அர்ஜுன், தன் மனைவி அபிராமி, மகள் ப்ரீத்திமுகுந்தன் ஆகியோருக்கும் அந்தப் பயிற்சியை கொடுத்து வைத்திருக்கிறார். எங்கு தவறுகள்  நடந்தாலும் அதை  கண்டுகொள்ளாமல் இருக்கக் கூடாது,, பொங்கி எழுந்து அந்த தவறினை தட்டிக் கேட்க வேண்டும்  என்று மகள் ப்ரீத்திமுகுந்தனுக்கு  பாடம் சொல்லி கொடுத்து வளர்த்து வருகிறார். அதுமட்டுமில்லாமல் புதிதாக ஐடி கம்பெனியில் சேரும் ப்ரீத்திமுகுந்தன்  தவறாக நடந்து கொள்ளும் டீம் லீடரையும் தனக்கு தெரிந்த கராத்தே கலையால் தக்க பதிலடி கொடுத்து மிரட்டி வைக்கிறார்.

எப்போதும் அடிதடி, சண்டை என்று இருப்பதை விரும்பாத அவரது தாய் அபிராமி மகள் ப்ரீத்திமுகுந்தனுக்கு விரைவாக திருமணம் செய்து வைக்க ஏற்பாடுகள் செய்ய தொடங்குகிறார். இந்த சூழலில் ப்ரீத்திமுகுந்தனுக்கு சிறு சிறு பிரச்சனைகள் ஏற்பட, தாய்  அபிராமியின் அறிவுரையின்படி அமைதியாக இருக்க பழகுகிறார். இந்த நேரத்தில், அவரது தங்க சங்கிலியை பறிக்க ஒருவன் முயற்சிக்க, வழக்கம் போல் தனது கராத்தே அதிரடியால் அவனை அடித்து  உதைத்து போலீஸில் பிடித்து கொடுக்கிறார். அதன் பிறகு தாங்கள் செய்தது சிறிய சாகசம் என்று அவர்கள் நினைத்தாலும் அது பெரிய விபரீதத்தின் தொடக்கமாக அமைகிறது.

அதனால் அர்ஜுன் குடும்பத்தினர் உயிருக்கே பேராபத்து ஏற்படும் சூழலில் அர்ஜுனும், ப்ரீத்தி முகுந்தனும், தாய் அபிராமியும்  அதிரடியில் இறங்க வேண்டிய கட்டாயம் ஏற்படுகிறது. அதன் தொடர்ச்சியாக அர்ஜுன் குடும்பத்தினருக்கு பல அபாய அச்சுறுத்தல்கள் ஏற்படுகின்றன. இது தனி ஒரு குடும்பத்தின் பிரச்சினை அல்ல சமூகத்தின் பிரச்சினை என்பதை உணர்ந்து கொண்டு அந்தக் குடும்பத்தில் உள்ள மூவரும் என்ன முடிவெடுக்கிறார்கள்? எதிரிகளை எப்படி எதிர் கொள்கிறார்கள்?அதற்காக அவர்கள் என்ன செய்தார்கள்? என்பதை அதிரடி காட்சிகள் மூலம் உருவாகி இருப்பது தான் ’பிளாஸ்ட்’

இப்படத்தில் அர்ஜுன் கராத்தே ஆசிரியராக வருகிறார். அவர் எப்போதுமே உடல் நலனில், உடல் வலுவூட்டுவதில் கவனமாக இருப்பவர். அதனால்தான் வயதுக்கு மீறிய உடற்கட்டோடு இருந்து அந்த ராஜா ராமன் என்ற கதாபாத்திரத்தில் பொருந்தி உள்ளார். தனது ஸ்டைலிஷான ஆக்‌ஷன் காட்சிகள் மூலம், தமிழ் சினிமாவில் இவரது இடத்தை பிடிக்க மற்றொருவர் வருவது கடினம் என்பதை அனைவரும் ரசிக்கும்படி நிரூபித்து காட்டி இருக்கிறார்.

கதையின் நாயகியாக நிலா கதாபாத்திரத்தில் வரும் பிரீத்தி முகுந்தன் அதிரடி சண்டைக் காட்சிகளில்  நடித்து ஒரு அசல் கராத்தே வீராங்கனையாகவே வீரியம் குறையாமல் நடித்துள்ளார். சாதாரண கதாநாயகி என்ற வரம்பை உடைத்து, கதையின் மையமாக நின்று முழு படத்தையும் தன்னுடைய ஆற்றலால் தாங்கியுள்ளார்.

அபிராமி நடுத்தரக் குடும்பத்து இல்லத்தரசியாகவும், தையல் வேலை செய்பவராகவும், தனது அமைதியான தோற்றத்திற்குள் மறைந்திருக்கும் வலிமையை வெளிப்படுத்தும் காட்சிகள் ரசிகர்களை வியக்க வைக்கின்றன.

வில்லன்களாக நடித்திருக்கும் ஜான் கொக்கேன், அர்ஜுன் சிதம்பரம், பவன், பாலா ஹாசன், வினோத் சாகர் மற்றும் அர்ஜுன் தம்பியாக நடித்திருக்கும் விவேக் பிரசன்னா ஆகியோரது கதாபாத்திரங்கள் கதையின் தன்மைக்கு ஏற்றவாறு பயணித்து இருக்கிறது. அவர்களது நடிப்பும் நன்று.

இசையமைப்பாளர் ரவி பஸ்ரூரின் பின்னணி இசை படத்தின் வேகத்திற்கு வேகம் கூட்டி உள்ளது. ஒவ்வொரு ஆக்ஷன் காட்சிக்கும் அவர் கொடுத்திருக்கும் இசை திரையரங்கையே அதிர வைக்கும் அளவிற்கு தாக்கத்தை ஏற்படுத்துகிறது.

ஒளிப்பதிவாளர் அருண் ராதாகிருஷ்ணன் சண்டைக் காட்சிகளை விதவிதமான கோணங்களில் படப்பதிவு செய்து பார்வையாளர்களை ஈர்க்கிறார். குறிப்பாக சண்டை காட்சிகளில் பயன் படுத்தப்பட்ட கேமரா அணுகுமுறை பார்வையாளர்களை நேரடியாக சம்பவத்துக்குள் இழுத்துச் செல்கிறது.

இந்தப் படத்தை எழுதி இயக்கியிருக்கிறார் சுபாஷ் கே ராஜ் . தற்போதுள்ள பெண்களுக்கு தன்னம்பிக்கையும், தைரியமும் கொடுக்கும் ஒரு படைப்பாக கொடுத்திருக்கிறார். வெறும் ஆக்ஷன் படம் அல்ல. குடும்ப பாசம், பெண்களின் தைரியம், சமூக பொறுப்பு, நீதிக்கான போராட்டம் ஆகியவற்றை விறுவிறுப்பான திரைக்கதையோடு இணைத்து ரசிகர்களுக்கு முழுமையான ஒரு உன்னதமான உணர்வை கொடுத்திருக்கிறார். தற்காப்பு கலை வாழ்வில் எவ்வளவு பெரிய சவாலையும் எதிர் கொள்ள எப்படி உதவுகிறது என்பதையும் படத்தில்  காட்டி இருப்பதை பாராட்டலாம்.

மொத்தத்தில், “பிளாஸ்ட்” ஒரு அதிரடியான பொழுதுபோக்கு திரைப்படம்.

ரேட்டிங் 4/5.

RADHAPANDIAN.