‘டபுள் ஆக்குபன்ஸி’ (Double Occupancy) திரைப்பட விமர்சனம்!!

சென்னை:

சந்தோஷ், ரேஷ்மா வெங்கடேஷ், சம்யுக்தா விஸ்வநாதன், வினோத் கிஷன், விடிவி கணேஷ், பகவதி பெருமாள் (பக்ஸ்), விச்சு விஸ்வநாத், போஸ் வெங்கட், வினோதினி வைத்தியநாதன் மற்றும் பலர் நடித்துள்ள ‘டபுள் ஆக்குபன்சி’ படத்தை எழுதி இயக்கியிருக்கிறார் அஸ்வின் கந்தசாமி.

இப்படத்தின் கதையைப் பொருத்தவரையில்,

போஸ் வெங்கட் – வினோதினி தம்பதிக்கு திருமணமாகி15 ஆண்டுகளுக்குப் பிறகு குழந்தை பிறக்கிறது. ஆனால் பிறந்ததும் அழுத அந்தக் குழந்தை மூச்சுவிட முடியாமல் திணறி செயல் இழந்து போகிறது. இதனால் அதிர்ச்சியடைந்த போஸ் வெங்கட் அந்தக் குழந்தையை கையில் வைத்துக் கொண்டு கதறும்போது   தெய்வீக தலையீட்டால் அதிசயமாக உயிர் பிழைக்கிறது. ஆனால் அதில் ஒரு பிரச்சினை என்னவென்றால் பிறக்கும்போது ஆணாக இருந்த குழந்தை சற்று நேரத்தில் பெண்ணாக மாறுகிறது. பகல் . நேரத்தில் காலை 6 மணி முதல் மாலை 6 மணி வரை பெண்ணாகவும் பிறகு மாலை 6 மணியில் இருந்து காலை 6 மணி வரை ஆணாகவும் மாறுகிறது. இந்த மாதிரி அதிசய தன்மை வாய்ந்த அந்த குழந்தைக்கு ரஜினி என்று பெயர் சூட்டுகிறார்கள். அந்தக் குழந்தை வளர்ந்து வாலிப வயதை அடையும்போது பெற்றோர் விபத்தில் உயிரிழக்கின்றனர்.

பகல் நேரத்தில் அவர்களது பெற்றோர் இறந்ததால் உடனடியாக மாலை 6:00 மணிக்குள்ளாக அவர்களின் இறுதி சடங்கை செய்து விடுகிறார் பெண்ணாக இருக்கும் ரஜினி (ரேஷ்மா). அன்று மாலையே அந்த உடலுக்கு உயிராக வரும் மகன் ரஜினி (சந்தோஷ்)தன்னுடைய பெற்றோர் இறந்த செய்தியறிந்து அதிர்ச்சியாகிறான். அதன் பிறகு இந்த அதிசய பிறவிகள் சென்னைக்கு வந்து விடுகிறார்கள். ஒரே உருவத்தில் இருக்கும் இவர்கள் ஒருவரை ஒருவர் பார்த்துக் கொள்ள முடியாததால் உணர்வுப் பரிமாற்றத்தில் குழப்பம் ஏற்படுகிறது. தினந்தோறும் பொழுது விடிவது போல் இந்த மாற்றம் நடந்து கொண்டே இருக்கிறது.  பகல் முழுவதும் ரேஷ்மாவாக இருப்பவர், இரவு சந்தோஷாக மாறிவிடுவார்.  பகல் நேரத்தில் ரஜினி (ரேஷ்மா) ஒரு டி.என்.ஏ. ஆராய்ச்சி நிறுவனத்தில் சேர்ந்து விஞ்ஞானி கார்த்திக் (வினோத் கிஷன்) ஏன்பவரிடம் காதல் கொள்கிறாள். அதே நேரம் இரவு நேர ரஜினி ஒரு பார் ஒன்றில் பணியாற்றும்போது (சந்தோஷ்) ஐ சம்யுக்தா விஸ்வநாதன் காதலிக்கிறார்.

இருவருக்கும் பொதுவான நண்பனாக வி.டி.வி. கணேஷ் நடுவில் இருக்கிறார். இந்த இரு அதிசய பிறவிகளும் காதலன் காதலியிடம் தங்களுடைய பிரச்சனையை சொல்ல முடியாமல் தவிக்கிறார்கள்.  இது போன்ற வித்தியாசமான மரபணு மாற்றம் நடக்கும் ஒரு உடலை உலகம் முழுவதும் தேடி வரும் பக்ஸ், ரேஷ்மாவின் கதையைத் தெரிந்து கொண்டு இவர்களை வைத்து ஆராய்ச்சி செய்து பெரும் கோடீஸ்வரராக நினைக்கிறார். இந்த சூழலில்  ஓரு உடலுக்குள் இருக்கும் இரண்டு உயிர்களில் யாருடன் யார் கடைசியில் ஒன்று சேர்ந்தார்கள்? பக்ஸ், ரேஷ்மாவின் உடலை ஆராய்ச்சி செய்வதற்கு ஒரு கார்ப்பரேட் நிறுவனத்திற்கு விற்று பணம் சம்பாதித்தாரா? இறுதியில் இவர்களது இந்த அதிசய வாழ்க்கை என்ன ஆனது? என்பதை முகுந்த கலகலப்புடன் வித்தியாசமாக உருவாகி இருக்கும் படம்தான்  ‘டபுள் ஆக்குபன்சி’ 

ரஜினி என்ற பெயரில் பகலில் பெண்ணாக ரேஷ்மா வெங்கடேஷ் நடித்திருக்கிறார்.அதேபெயரில் இரவு நேரத்தில் ஆணாக நடித்திருக்கிறார் அறிமுக நடிகர் சந்தோஷ். இருவரும் கதையின் முதுகெலும்பாக திகழ்ந்து ஒரே உயிரின் இரண்டு பரிமாணங்களை தனித்தனியாக வெளிப்படுத்தி ரசிகர்களை நம்ப வைக்கிறார்கள்.  காதல், நகைச்சுவை, குழப்பம், வேதனை போன்ற உணர்வுகளை இருவரும் சிறப்பாக வெளிப்படுத்தி அசத்தி உள்ளனர்.

ரேஷ்மாவின் காதலராக வினோத்கிஷனும்,  சந்தோஷின் காதலியாக சம்யுக்தா விஸ்வநாதனும் நடித்திருக்கிறார்கள். இருவருமே தங்களது கதாபாத்திரத்தின் தன்மையை உணர்ந்து மிக அருமையாக நடித்திருக்கின்றனர்.

பக்ஸ் என்ற பகவதி பெருமாளும், விச்சு விஸ்வநாதனும் கதையின் முக்கிய திருப்பங்களுக்கு காரணமாக இருக்கும் கதாபாத்திரத்தில் மிரட்டலாக நடித்திருக்கிறார்கள். விடிவி கணேஷின் நகைச்சுவை காட்சிகள் லேசான சிரிப்பை வர வைக்கின்றன.

போஸ் வெங்கட், வினோதினி பிரதான பாத்திரத்தில் பெற்றோராக வந்து சில காட்சிகளிலேயே மறைந்து போனாலும் அழுத்தமான பாத்திரம் ஏற்று நடித்திருக்கின்றனர்.

சாம்.சி.எஸ் இசையமைத்திருக்கிறார்.பாடல்கள் கேட்டு ரசிக்கும் வகையில் அமைந்திருக்கின்றன. பின்னணி இசையில் கதையின் உணர்வுகளுக்கு ஏற்ப உயிரூட்டியிருக்கிறார்.

சந்தகுமார் சக்ரவர்த்தியின் ஒளிப்பதிவு படத்தை வண்ணமயமாகவும் பிரம்மாண்டமாகவும்  கொண்டு செல்ல உதவியிருக்கிறது.

எழுதி இயக்கியிருக்கிறார் அஸ்வின் கந்தசாமி. வழக்கமான காதல் மற்றும் காமெடி படங்களிலிருந்து விலகி, ஒரு புதிய கற்பனையை தமிழ் சினிமாவிற்கு அறிமுகப்படுத்தியிருக்கும் முயற்சியாக இதுவரையில்  வெளி வராத கதையை இயக்கி இருக்கிறார். ஒரு மனித உணர்வுகளை பகிர்ந்துக் கொள்ள முடியாத வித்தியாசமான இரட்டையர்களின் உணர்வுகள் மூலம் அந்த பலவீனத்தையும் பலமாக்கி விடுகிறார். பேண்டஸி கதையை அறிவியல் பார்வையில் காட்டி அதற்கு ஒரு நம்பகத்தன்மையை கொடுக்க முயன்று வெற்றி பெற்றுள்ளார்.

மொத்தத்தில், ‘டபுள் ஆக்குபன்ஸி’ கலகலப்பான ஒரு காமெடி படம்.

ரேட்டிங் 3/5.

RADHAPANDIAN.