‘மண்டாடி ‘- திரைப்பட விமர்சனம்!

சென்னை:

சூரி, சுஹாஸ், மகிமா நம்பியார், சத்யராஜ், ரவீந்திர விஜய், பால சரவணன், மிதுன் மற்றும் ஸ்டண்ட் சிவா உள்ளிட்ட பலர் நடித்துள்ள படம்தான் “மண்டாடி’. இப்படத்திற்கு கதை எழுதி இயக்குநர் மதிமாறன் புகழேந்தி இயக்கியுள்ளார்.

இப்படத்தின் கதையைப் பொருத்தவரையில்,

இராமேஸ்வரம் அருகே இருக்கும் முகவை பட்டினம், பாய்மரப் படகுப் போட்டிக்கு பெயர் பெற்ற பகுதியாக விளங்கி வருகிறது. மீன்பிடித் தொழில் மட்டுமே இந்த ஊரின் வாழ்வாதாரமாக இருந்தாலும், . சிறு வயதில் இருந்தே கடலையும், படகுகளையும், மீனையும் பார்த்து வளர்ந்த இந்த ஊர் இளைஞர்கள்… பாய்மரப்  படகுகளை யார் வேகமாக செலுத்துகிறார்கள் என்பதில் அங்கிருக்கும் இரு அணிகள் போட்டி போட்டு வளர்ந்திருக்கிறார்கள். ஒரு நாள், இவருடைய சொந்த ஊரான ராமநாதபுரம் முகவை கடலோரக் கிராமத்தைச் சேர்ந்த  மிதுன் ஜெய் சங்கர் என்ற இளைஞன்,  பாய்மரப்படகு போட்டியில் ஏற்பட்ட தகராறில்  சுஹாஸ் என்பவனையும் அவன் மகனையும் கொலை செய்ய முயன்று, ஆபத்தில் சிக்கிக் கொண்டு அவர்களிடமிருந்து தப்பித்து  சென்னையிலிருக்கும் சூரியிடம் தஞ்சமடைகிறான்.

20 வருடங்களுக்கு முன்பு ஊரை விட்டு வெளியேறி சென்னையில் வேலை செய்துக் கொண்டிருக்கும் சூரி, மிதுன் ஜெய் சங்கரை காப்பாற்றுவதற்காக  தனது சொந்த ஊருக்குத் திரும்பி வருகிறார். ஒரு காலத்தில் தனது வாழ்க்கையின் முக்கிய அங்கமாக இருந்த பாய்மரப் படகுப் போட்டியை இனி வேண்டாம் என்று ஒதுங்கி வாழ்ந்து வந்த அவரை, ஊருக்குத் திரும்பி வந்த சூழலில் அதே போட்டியில் சூரியை மீண்டும் கலந்துக் கொள்ள வைக்கிறது. மீண்டும் பாய்மரப் படகுப் போட்டிக் களத்தில் இறங்கும் சூரிக்கு எதிராக நிற்பவர் வெளியில் இருந்து வந்த ஒருவர் அல்ல… ஒரு காலத்தில் உயிர் நண்பனாக இருந்த சுஹாஸ்தான். அவர் ‘சுனாமி ரைடர்ஸ்’ என்ற பெயரில் அந்த அணியின் தலைவனாக இருக்கிறார்.

சூரிக்கும், சுஹாஸுக்கும் ஏற்கெனவே இருந்த பகையின் காரணமாக எப்படியாவது பாய்மரப் படகுப் போட்டியில் வெற்றி பெற வேண்டும் என்கிற நிலையில் மிதுன் ஜெய் சங்கருடன் பல இளைஞர்களை ஒன்றிணத்து,பழைய ஆசான் சத்யராஜின் வழிகாட்டுதலோடு, திறமைவாய்ந்த இளம் மீன்பிடி வீரர்களுடன் ‘முகவை மைந்தன்ஸ்’  என்ற அணியை மீண்டும் சூரி உருவாக்கி. பாய் மரப் படகு போட்டியில் பங்கேற்க போவதாக சவால் விடுகிறார். சூரியின் சவாலை தடுப்பதோடு, அவரை ஒட்டுமொத்தமாக அழிக்க வேண்டும் என்று சுஹாஸ் திட்டம் தீட்டுகிறார். எதிரிகளின் சதி திட்டங்களை முறியடித்து சூரி பாய்மரப் படகுப் போட்டிக் களத்தில் வெற்றி பெற்றாரா/ இல்லையா? என்பதுதான் “மண்டாடி” படத்தின் மீதிக் கதை.

கதாநாயகனாக நடித்திருக்கும் சூரி, இதற்கு முன்பு நகைச்சுவுக் கதாபாத்திரங்களை ஏற்று நடித்தவர் என்றாலும், ஒவ்வொரு காட்சியிலும்  ஆக்‌ஷன் ஹீரோக்களுக்கு இணையாக தன்னை நிரூபித்து காட்டியிருக்கிறார்.  மீன்பிடி வீரருக்குரிய கரடுமுரடான தோற்றம், வெயிலில் காய்ந்த உடலமைப்பு மற்றும் கட்டுமரப் கயிற்றைப் பிடித்துச் சுழலும் வீரம் எனத் தன் உடலமைப்பை முழுமையாக மாற்றி மிக சிறப்பாக நடித்து அனைவரையும் வியக்க வைக்கிறார். பாய்மரப் படகுப் போட்டிக் காட்சிகளில் அவர் எடுத்திருக்கும் பெரிய ரிஸ்க்கும், அந்த கதாபாத்திரத்தில் வெளிப்படுத்தியிருக்கும் உணர்வுகளும் கைத்தட்டல் பெறுகின்றன. இனி சூரி ஆக்ஷன் ஹீரோவாக வலம் வரலாம் என்பதில் சிறிது கூட ஐயமில்லை.

சூரிக்கு இணையான கதாபாத்திரத்தில் வில்லனாக நடித்திருக்கும் சுஹாஸ், சாட்டப்புலி என்ற கதாபாத்திரத்திற்கு பொருத்தமாக இருக்கிறார். தன்னிடம் உள்ள பகை உணர்ச்சியை முகத்தில் தேக்கி வைத்துக் கொண்டு அவர் காட்டியுள்ள வில்லத்தனம் ரசிக்க வைக்கிறது.

சத்யராஜ் தனது அனுபவ நடிப்பு மூலம் மச்சமுனி கதாபாத்திரத்திற்கு உயிர் கொடுத்து இருக்கிறார்.

மாரி கதாபாத்திரத்தில் நடித்திருக்கும் மிதுன் ஜெய்சங்கர், சூரியின் நண்பராக நடித்திருக்கும் பாலசரவணன், மகிமா நம்பியாரின் கணவராக நடித்திருக்கும் ரவீந்திர விஜய், சுஹாஸின் தந்தையாக நடித்திருக்கும் சண்டைப்பயிற்சி இயக்குநர் ஸ்டண்ட் சிவா,சூரியின் நண்பராக நடித்திருக்கும் ராம்ஸ்,சுஹாஸின் மச்சானாக நடித்திருக்கும் பத்மன்,ஆடுகளம் முருகதாஸ், சுஹாஸின் மகனாக நடித்திருக்கும் கிரிஷ் ஹாசன் ஆகியோர் தங்களது கதாபாத்திரத்தை உணர்ந்து நடித்திருக்கிறார்கள்.

ஒளிப்பதிவாளர் எஸ்.ஆர்.கதிர், பாய்மரப் படகுப் போட்டிக் காட்சிகளை மிக துல்லியமாக கடலின் கொடூரமான சீற்றத்தையும் ஒரே நேரத்தில் தத்ரூபமாகக் காட்டி அசத்தி இருக்கிறார்.

ஜி.வி.பிரகாஷ் குமாரின் இசையில் பாடல்கள் கேட்டு ரசிக்கின்ற விதத்தில் இருக்கிறது. பின்னணி இசை படகுப் போட்டிக் காட்சிகளில் படத்தின் வேகத்தையும் பதற்றத்தையும் அதிகரிக்கிறது.

கதை எழுதி இயக்கியிருக்கிறார் மதிமாறன் புகழேந்தி. காதல், நட்பு, துரோகம் ,பொறாமை,சூழ்ச்சி, வன்மம், குற்ற உணர்ச்சி, பகைமை உணர்ச்சி இவை அனைத்தும் கலந்து கொடுத்து, நெய்தல் நிலத்து மீன்பிடி சமூதாயத்தின் வாழ்வியலை அடிப்படையாகக் கொண்டு, ஒரு பாய்மரப் படகுப் போட்டியை மையமாக வைத்து ஒரு முழுமையான சினிமா அனுபவத்தை நம் கண் முன் நிறுத்தி வெற்றி பெற்று இருக்கிறார் இயக்குனர்.

மொத்தத்தில் ‘மண்டாடி” அனைத்து ரசிகர்களுக்கும் நிச்சயமாக திருப்தியை  கொடுக்கும்.படம்.

ரேட்டிங் 3.5/5.

RADHAPANDIAN.