‘கோல்ட் கால்’ – (COLD CALL) திரைப்பட விமர்சனம்!

பெங்களூரில் உள்ள ஒரு தனியார் நிறுவனத்தின் மார்க்கெட்டிங் பிரிவு ஒன்றில் விற்பனை பிரதிநிதிகளாக சித்து மூலிமணி, சந்தோஷ், ஸ்ரீ வைஷ்ணவ், கிருஷ்ணா விஜய் ஆகிய நான்கு இளைஞர்கள் இருக்கிறார்கள். அவர்கள் நான்கு பேரும் வெவ்வேறு மாநிலத்தை சேர்ந்தவர்கள் என்றாலும் வெவ்வேறு மொழிகள் பேசுபவர்கள் என்றாலும் அவர்களுக்குள் ஒரு புரிதல் ஏற்பட்டு நண்பர்களாகி மகிழ்ச்சியாக வலம் வருகிறார்கள். இவர்களில் இரண்டு பேருக்கு அதே அலுவலகத்தில் பணிபுரியும் பெண்களுடன் காதல்  ஏற்படுகிறது. இதனால் எந்த கவலையும் இல்லாமல் நான்குநண்பர்களும், காதல், கலாட்டா என்று எந்த பணியும் செய்யாமல் ஊரை சுற்றிக் கொண்டிருக்கி றார்கள். இதனால் இவர்களது நிறுவனம் எதிர்பார்க்கும் முன்னேற்றம் கிடைக்காததால் உயரதிகாரியின் கோபத்திற்கும் ஆளாகிறார்கள்.

இந்த சூழலில் அவர்கள் நான்கு  பேர் வாழ்க்கையில் ஒரு கடத்தல் பழி ஏற்பட்டு பெரிய பிரச்சனைகள் வருகிறது. பெரிய தொழிலதிபர் ஒருவரது மகன் கடத்தப்பட்டு இருப்பதால், அதனால் இவர்கள் மீது போலீஸ் சந்தேகப்பட்டுத் தேடுகிறது. எதிர்பாராத சிக்கலில் சிக்கிக்கொண்ட அவர்கள்,அதிலிருந்து மீள வேண்டுமெனில் கடத்தப்பட்ட சிறுவனை நான்கு பேரும் இணைந்து கண்டுபிடிக்க வேண்டும் என்று முடிவு செய்கிறார்கள். இறுதியில் கடத்தப்பட்ட சிறுவனை அவர்கள் கண்டுபிடித்தார்களா?இல்லையா? நான்கு இளைஞர்கள் இந்த வழக்கில் எப்படி சிக்கினார்கள்? என்பதுதான் “கோல்ட் கால்” படத்தின் மீதிக் கதை.

இப்படத்தின் கதையின் நாயகர்களாக நடித்திருக்கும் சித்து மூலிமணி, சந்தோஷ், ஸ்ரீ வைஷ்ணவ், கிருஷ்ணா விஜய் ஆகியோர் தமிழுக்குப் புதியவர்களாக இருந்தாலும் தங்களது பணியைக் குறையில்லாமல் செய்திருக்கிறார்கள்.  நான்கு பேரும் நான்கு விதமாக மனப்போக்கு கொண்டவர்களாக இருந்தாலும் நட்பில் இணைந்து இந்தக் கதைக்குப் பலம் சேர்த்திருக்கிறார்கள்.

நான்கு நாயகர்கள் இருக்கிறார்கள் என்பதால், கதாநாயகிகளாகவும் நான்குபேர் நடித்திருக்கிறார்கள். தங்களது இளம் தோற்றத்தின் மூலம் அமிதா ரங்கநாதா, நிஷா ஹெக்டே, மேரி லிட்டி, கீர்த்தனா புல்கி ஆகியோர் தங்களுக்கு கொடுக்கப்பட்ட கதாபாத்திரங்களை நிறைவாக செய்திருக்கிறார்கள்.

நிறுவனத்தின் மேலாளர், விற்பனையாளர்களின் பயிற்சியாளர் என்று மற்ற கதாபாத்திரங்களில் நடித்தவர்களும் பொருத்தமான தேர்வு என்றே சொல்லலாம்.

சரவணனின் ஒளிப்பதிவு, பெங்களூரு நகரத்தை வெறும் பின்னணியாக மட்டும் காட்டாமல் கதையின் ஒரு பகுதியாகவே பயன்படுத்தி படத்திற்கு பலம் சேர்த்திருக்கிறார்.

பிரணவ் கிரிதரனின் இசையில் பாடல்கள் கேட்கும் ரகம்தான். இப்படத்தின் காமெடி மற்றும் த்ரில்லர் என இரண்டு விதமான சூழல்களுக்கும் ஏற்றவாறு  தேவையான பின்னணி இசையை கொடுத்து அனைவரையும் ரசிக்க வைத்து இருக்கிறார்.

கதை எழுதி இயக்கியிருக்கும் தம்பிதுரை எத்துராஜ், விற்பனையாளர்கள் பணியின் சிரமங்களையும் சுமைகளையும் கூறாமல் அந்தப் பின்னணியில் நடக்கும் சில முக்கிய சம்பவங்களை மையமாக வைத்து இயக்கி இருக்கிறார். அவர் காமெடியையும், த்ரில்லரையும் கலந்து சொல்லியிருக்கும் விதம் இப்படத்தை சுவாரஸ்யமாக நகர்த்தி செல்ல உதவுகிறது.

மொத்தத்தில் – நான்கு நண்பர்களின் காதல் கலாட்டாவோடு ஒரு கடத்தல் மர்மத்தையும் சேர்த்து கொடுத்திருக்கும் ‘கோல்ட் கால்’ ஒரு பொழுது போக்கு காமெடி த்ரில்லர் படம்.

ரேட்டிங் 3/5.

RADHAPANDIAN.