‘தி கிராண்ட் மாஸ்டர்’- திரைப்பட விமர்சனம்!

சென்னை:

அபர்ணதி, லிங்கேஷ், வெற்றி செழியன், சுரேஷ் மேனன், அஸ்வின், தமிழரசி, அன்பு, சிறுவன் அஸ்மின் போன்ற பலர் நடித்திருக்கும் படம்தான் “தி கிராண்ட் மாஸ்டர்”. இப்படத்தை வெற்றிச் செழியன் இயக்கியுள்ளார்.

கால்பந்து, கபடி, கிரிக்கெட் போன்ற விளையாட்டுகளில் அரசியல், ஜாதி, அதிகார வர்க்கத்தின் தலையீடு போன்றவற்றை மையப்படுத்தி நிறைய படங்கள் வந்துள்ளன. சதுரங்க விளையாட்டில் ஜாதி பேதத்தை மையப்படுத்தி வெளிவந்துள்ள படம் தான் ‘தி கிராண்ட் மாஸ்டர்’ .

இப்படத்தின் கதையைப் பொருத்தவரையில்,

அபர்ணதி சதுரங்க விளையாட்டின் மீது மிகுந்த ஆர்வம் கொண்டவர். அதற்கான அவர் பல போட்டி களில் கலந்துகொண்டு வெற்றியும் பெறுகிறார். ஆனால் அபர்ணதி நகரத்தில் தெருக்களை சுத்தப்படுத்தும் தூய்மைப் பணியாளராக பணி செய்கிறார். அவரது கணவரும் இதே வேலையைத்தான் செய்து வருகிறார். தாழ்த்தபட்ட சமூகத்தைச் சேர்ந்த அபர்ணதி,ஆடுபுலி ஆட்டம் சிறப்பாக விளையாடத் தெரிந்தவர் என்பதால்  ஊரில் நடக்கும் விளையாட்டுப் போட்டியில் மேல் ஆதிக்க சாதி ஆட்களைத் தோற்கடித்து வெற்றி பெறுகிறார். இது பொறுக்காத மேல் ஆதிக்க சாதிக் கும்பல், அபர்ணதியின் கணவரான லிங்கேஷை கட்டி வைத்து அடித்து, ரத்தக் காயப்படுத்தி, சித்ரவதை செய்கிறார்கள். இந்த சூழ்நிலையில் தன் கணவனை விட்டுவிடும்படி அழுது கெஞ்சும் அபர்ணதியிடம், “நாங்கள் சொல்லும் சதுரங்க விளையாட்டு வீரருடன் நீ  விளையாடி ஜெயித்தால், உன் கணவரை விட்டு விடுவோம்” என்று சவாலுக்கு அழைக்கிறார்கள்.

இதற்கு அபர்ணதியும் மிகுந்த  வைராக்கியத்துடன் சதுரங்க விளையாட்டில் இரண்டு நாட்கள் பயிற்சியை மேற்கொண்டு தனது திறமையை வளர்த்துக்கொண்டு, மேல் ஆதிக்க சாதியினர் முன்நிறுத்திய  சதுரங்க விளையாட்டு  வீரரைத் தோற்கடித்து விட்டு தன் கணவரை மீட்கிறார். இப்படிப்பட்ட சூழலில் சதுரங்க விளையாட்டு அமைப்பு நிர்வாகிகளில் முதன்மையாக இருக்கும் பணக்காரர் சுரேஷ் மேனனின் மகளுடன் ஒரு கட்டத்தில் அபர்ணதி மோத வேண்டிய சூழல் வருகிறது.அப்போது சுரேஷ் மேனன் இவர்கள் எல்லாம் தெரு பெருக்குபவர்கள் என்று அவமானப்படுத்தி, தனது மகள், குப்பை அள்ளும் ஒரு பெண்ணிடம் தோற்பதை விரும்பாத மேல் ஆதிக்க சாதியைச் சேர்ந்த தொழிலதிபருமான சுரேஷ் மேனன், போட்டியிலிருந்து விலகுமாறு மகளுக்கு அறிவுரை கூறுகிறார். அதை ஏற்க மறுத்து, சதுரங்க விளையாட்டு  போட்டியில் கலந்துக் கொள்வேன் என்று பிடிவாதம் செய்கிறார் அவரது மகள். இந்த நிலையில், ஏற்பட்ட ஒரு வாக்குவாதத்தில், அபர்ணதி தோற்றால் அவரது ஆயுள் முழுக்க சுரேஷ் மேனனின் வீட்டுக் கழிவறைகளை தூய்மை செய்ய வேண்டும் என்றும் சுரேஷ் மேனனின் மகள் தோற்றால், அபர்ணதி வசிக்கும் குப்பத்தில் உள்ள சாக்கடையை ஒருநாள் சுரேஷ் மேனன் தூய்மை செய்ய வேண்டும் என்று அபர்ணதி  சவால் விடுகிறார்.

அந்த சவாலை ஏற்றுக் கொண்ட. சுரேஷ் மேனன் தன் மகளை அபர்ணதியுடன் சதுரங்க விளையாட்டில் கலந்துக் கொள்ள ஏற்பாடு செய்கிறார். அந்த சதுரங்க விளையாட்டு போட்டியில் அபர்ணதி வென்று விடுகிறார். தன் மகள் தோல்வி அடைந்ததால் சுரேஷ் மேனன் வேறு வழியில்லாமல் அபர்ணதியின் பகுதிக்கு வந்து சாக்கடையில் இறங்கி சுத்தம் செய்கிறார்.ஆனாலும் அவரது ஆணவம் தலை விரித்து ஆடியதால் அவமானம் தாங்காமல் சுரேஷ் மேனன் அபர்ணதியின் கணவரைக் கொன்று விடுகிறார்.   கணவனை இழந்து விதவையாகும் அபர்ணதி ஐந்து மாத ஆண் குழந்தையுடன் அந்த ஏரியாவை விட்டு வெளியேறுகிறாள். வேறு ஒரு இடத்திற்கு சென்ற அபர்ணதியின்  குழந்தை வளர்ந்து, அஸ்வினாக அரசுப் பள்ளியில் படிக்கும்போது, அவனை வழக்கறிஞர் ஆக்க வேண்டும் என்று ஆசைப்படுகிறார். ஆனால், பள்ளியில் உடற்பயிற்சி ஆசிரியரால் சாதிக்கொடுமைக்கு ஆளாகும் பத்து வயதுச் சிறுவன் அஸ்வினோ, சதுரங்க  விளையாட்டு மீது ஆர்வம் உள்ளவனாக இருக்கிறான்.

அதனால் மேல் ஆதிக்க சாதியினர் செய்த கடந்தகால கசப்பான அனுபவங்கள் காரணமாக, மகனின் சதுரங்க  விளையாட்டு மீது உள்ள ஆர்வத்துக்கு தடை போடுகிறார் அபர்ணதி. ஒரு கட்டத்தில் ‘சதுரங்க விளையாட்டில் கிராண்ட் மாஸ்டர் ஆக வேண்டும்’ என்ற மகனின் கனவைப் புரிந்துகொள்ளும் அபர்ணதி, மகனோடு இணைந்து, அவனது கனவை நோக்கிப் பயணப்படுகிறார். மேல் ஆதிக்க சாதியினர் ஏற்படுத்தும் முட்டுக் கட்டைகளை உடைத்தெறிந்து, தன் மகனை அபர்ணதி சதுரங்க  விளையாட்டு போட்டியில் வெற்றி பெற வைத்தாரா? இல்லையா/ என்பதுதான் ‘தி கிராண்ட் மாஸ்டர்’ படத்தின் மீதிக் கதை.

இப்படத்தின் வெள்ளையம்மாள் கதாபாத்திரத்தில் நடித்திருக்கும் அபர்ணதி முழுப் படத்தினையும் தனது தோளில் சுமந்து இருக்கிறார். கணவனை இழந்த  வேதனை, ஏக்கம்,துக்கம்,கோபம்,வேகம் ஆகிய எல்லாவற்றையும்செவ்வனே செய்து கதாபாத்திரத்திற்கு உயிர் கொடுத்திருக்கிறார். அவரது சிறந்த நடிப்பிற்காக அபர்ணதிக்கு அரசு விருதுகள் உட்பட பல விருதுகளும் கண்டிப்பாக வழங்கப்பட வேண்டும்.

அபர்ணதியின் மகனாக மாஸ்டர் அஸ்வின் நடித்திருக்கிறார். கொடுக்கப்பட்ட கதாபாத்திரத்தை நன்றாக உள்வாங்கி, மிக சிறப்பாக நடித்திருப்பது பாராட்டத்தக்கது.

அபர்ணதியின் கணவராக நடித்திருக்கும் லிங்கேஷ்,பொறுப்பாக நடித்திருக்கிறார்.வில்லனாக நடித்திருக்கும் சுரேஷ்மேனன்,மேல் ஆதிக்க வர்க்கத்தினரை அப்படியே பிரதிபலித்திருக்கிறார்.

இவர்களுடன்  வெற்றி செழியன், தமிழரசி, அன்பு போன்றவர்களும் நடித்திருக்கிறார்கள்.

ஒளிப்பதிவாளர்கள் அர்ஜுன் ரவி மற்றும் ஞானசேகரன்.ஆர்.எஸ் ஆகியோர் காட்சிகளை மட்டுமின்றி கதாபாத்திரங்களின் உணர்வுகளையும் காட்சிகளில் வெளிப்படுத்தியிருக்கிறார்கள்.

தினேஷ் ஆண்டனியின் இசையில் பாடல்கள் கேட்கும் ரகம்தான்..பின்னணி இசை திரைக்கதை ஓட்டத்துக்குப் பெரிய அளவில் பலம் சேர்த்திருக்கிறது.

இப்படத்தை எழுதி இயக்கியிருக்கிறார் இயக்குநர் வெற்றிச்செழியன். சதுரங்க விளையாட்டை மையமாக வைத்து வெளியாகி இருக்கும் இப்படத்தை அதற்குரிய படங்களுக்கு உரிய வேகத்துடனும் விறுவிறுப்புடனும் கொண்டு செல்ல முயற்சி செய்து இருக்கிறார். தாய் – மகன் பாசத்தையும், மகனின் கனவு நிறைவேற தாய் காட்டும் ஒத்துழைப்பையும், உறுதியையும் பார்வையாளர்கள் ரசிக்கும்படி பதிவு செய்துள்ளார். தூய்மை பணியாளரின் வலியையும் சமூகப் புறக்கணிப்பையும் மக்கள் நம்பும்படி மிக தத்ரூபமாக இயக்கி இருப்பதை கண்டிப்பாக பாராட்ட வேண்டும்.

மொத்தத்தில், ‘தி கிராண்ட் மாஸ்டர்’ ஜாதி வெறியர்கள் மத்தியில் கொண்டாடும் படம்.

ரேட்டிங் 3.5/5.

RADHAPANDIAN.