‘டோரதி’ – திரைப்பட விமர்சனம்

சென்னை:

கீர்த்தி சுரேஷ், ரிஷிகாந்த், சனந்த், ராமச்சந்திரன் துரைராஜ், கஜராஜ்,ஜீவா சுப்பிரமணியன், முத்துக்குமார் மற்றும் பல்ர் நடித்துள்ள படம்தான் “டோரதி”. இப்படத்தை எழுதி கார்த்திக் சுப்பராஜ் இயக்கி உள்ளார். இசைஞானி இளையராஜா இசையமைத்துள்ளார்.

இப்படத்தின் கதையைப் பொருத்தவரையில்,

சிறுவயதில் பள்ளியில் படிக்கும் காலத்திலிருந்து சனந்த்தும் ரிஷிகாந்தும் இணை பிரியா நண்பர்களாக பழகி வருகிறார்கள். அவர்கள் இருவரும் வயதுக்கு வந்த பிறகு அடிதடி, சண்டை என்று இணைந்து செயல்படுகிறார்கள். இந்த சூழலில் சனந்த்தின் தந்தை முத்துக்குமார் தனது குடும்பத்தை ஜாதி வெறியுடன் ஒரு மோசமான கட்டுப்பாட்டில் வைத்திருக்கிறார். ரிஷிகாந்த் தனது நண்பனுடன் இணைந்து முரட்டுத்தனமான வன்முறைக்கு பழக்கப்பட்டவனாக வலம் வந்து கொண்டிருக்கிறார். ஆனால் சனந்த் அமைதியான ஒரு எளிமையானவனாக எந்த சண்டைக்கும் செல்லாமல் இருக்கிறார். இந்த சூழ்நிலையில் சனந்த்தின் அண்ணன் சௌந்தர்ராஜன் வெளியூரிலிருந்து யாருடைய ஒப்புதலும் இல்லாமல் கீர்த்தி சுரேஷை திருமணம் செய்து கொண்டு வீட்டிற்கு வருகிறார்.

சாதி ஆதிக்க குணம் கொண்ட முத்துக்குமார் குடும்பத்தில் மருமகளாக வரும் கீர்த்தி சுரேஷிடம் சனந்த் தன் உடலுக்குள்ளும் உள்ளத்துக்குள்ளும் பெண்மைக்குரிய ஒரு மாற்றம் ஏற்படும் சில விஷயங்களை கூறி வேதனைப்படுகிறார்.  அண்ணியாக வரும் கீர்த்தி சுரேஷ் சனந்த்துக்கு ஆறுதல் சொல்லி பரிவுடன் அன்பும் ஆதரவும் செலுத்துகிறார். இந்த சூழலில் அந்த குடும்பத்தில் உள்ள முத்துக்குமாரின் ஆணாதிக்கத்தால் என்ன செய்வது என்று புரியாமல் கீர்த்தி சுரேஷ் தற்கொலை செய்து கொள்கிறார்.  தன்னை அன்புடன் பாசத்துடனும் ஒரு தாயைப் போல பழகி வந்த கீர்த்தி சுரேஷ் தற்கொலை செய்து கொண்ட பிறகு சனந்த்தின் மனநிலை மாறி தாங்க முடியாத அளவுக்கு வேதனைப்படுகிறார்.  கீர்த்தி சுரேஷ் இறந்த பிறகு தன் தந்தையின் கொடூரத்தை உணரும் சனந்த் யாருக்கும் தெரியாமல் வீட்டை விட்டு ஓடி விடுகிறார்.

இந்த சூழ்நிலையில் பெண்மைத்தனமாக இருக்கும் சனந்த்தை தேடி கண்டுபிடித்து கொன்று விடுமாறு அவரது தந்தை ரிஷிகாந்திடம் கூறுகிறார்.  முதலில் சனந்த்தை நான் கொலை செய்ய மாட்டேன் என்று சொன்ன ரிஷிகாந்த் பிறகு முத்துக்குமார் சொல்லுக்கு கட்டுப்பட்டு கொலை செய்வதற்காக லாரியை எடுத்துக்கொண்டு செல்கிறார்.  இறுதியில் சனந்த்தை அவரது நண்பன் ரிஷிகாந்த் கொலை செய்தாரா? அல்லது அவரை வாழ வைத்தாரா?  என்பது தான் “டோரதி” படத்தின் மீதி கதை.

இப்படத்தில் கதாநாயகர்களாக நடித்திருக்கும் ரிஷிகாந்த் – சனந்த் இருவரின் நட்புதான் இக்கதைக்கு பெரிய பலமாக அமைந்து இருக்கிறது. சனந்த் தனக்குள் ஏற்படும் பெண்மைத்தனமான மாற்றங்களை வெளிப்படுத்தும் விதத்தில் நடிப்பில் அனைவரையும் கவர்கிறார். சண்டைக் காட்சிகளில் கோபம்,வேகம்,ஆக்ரோசம் என எல்லாவற்றையும் நன்றாக வெளிப்படுத்தியிருக்கிறார் ரிஷிகாந்த்.

இப்படத்தின் தலைப்பில் இருக்கும் டோரதியாக நடித்திருக்கும் கீர்த்திசுரேஷ், கதாநாயகன் சனந்த்துக்கு அண்ணியாக அந்தக் குடும்பத்துக்குள் வரும்போது அவருக்கு காட்சிகள் அதிகமாக இருக்கும் என்று நினைக்கும்போது குறைவான காட்சிகளில் வந்தாலும்  நடிப்பில் அசத்தி இருக்கிறார்.

சனந்த்தின் தந்தையாக நடித்திருக்கும் முத்துக்குமாரின் கதாபாத்திரமும் அவர் நடிப்பும் மிக இயல்பாக இருக்கிறது. சாதி ஆணவம் பேசும் பலர் மிக கொடூரமாக இருக்கிறார்களே என்கிற எண்ணம் நம்மை பயமுறுத்துகிறது.

ஜீவா சுப்பிரமணியம் தைரியமிக்க திருநங்கையாக இப்படத்தின் முக்கிய பங்காற்றி இருக்கிறார்.

மற்றும் ராமச்சந்திரன் துரைராஜ்,கஜராஜ்,ராம்ஸ்,ஜீவா,செளந்தரராஜா ஆகியோரும் தங்கள் பங்கை நிறைவாகச் செய்திருக்கிறார்கள்.

இப்படத்திற்கு இசைஞானி இளையராஜா இசையில், பாடல்களும் பின்னணி இசையும் அனைவரும் ரசிக்கின்ற விதத்தில்  உயர்த்திப் பிடித்துள்ளன.

ஒளிப்பதிவாளர் எஸ்.திரு  கதையின் காட்சிகளை ஒளிப்பதிவு செய்த விதமும் மதுரையின் இயல்பையும், அங்குள்ள உணர்வுகளையும் அழகாகப் பதிவு செய்ததை பாராட்டலாம்.

இப்படத்தின் கதையை சரவணன் சந்திரனும் கார்த்திக் சுப்புராஜும் இணைந்து எழுதி இருக்கிறார்கள்.அதற்கு, திரைக்கதை எழுதி இயக்கியிருக்கிறார் கார்த்திக் சுப்புராஜ். ஒரு ஆண் எப்படி பெண்மைத்தனமாக மாறுகிறார் என்ற பாலின சமத்துவத்தை தனக்கே உரிய பாணியில் ஒரு கதையைச் சொல்லியிருக்கிறார். இந்த சினிமா உலகில் கமர்ஷியல் கதைகள் மட்டும் அல்ல மக்களின் மனங்களை கவரும் படங்களையும் தன்னால் இயக்க முடியும் என்பதை மீண்டும் நிரூபித்துக் காட்டியிருக்கிறார் கார்த்திக் சுப்பராஜ்.

மொத்தத்தில் இந்த ’டோரதி’  ஒரு மாறுபட்ட கதை அம்சம் உள்ள படம்.

ரேட்டிங் 3/5.

RADHAPANDIAN.