‘மீசைய முறுக்கு 2 ‘ – திரைப்பட விமர்சனம்!

சென்னை:

ஹிப்ஹாப் தமிழா ஆதி, சைத்ரா ஜே ஆச்சார், கேதிகா ஷர்மா, ரம்யா ரங்கநாதன், ஹர்ஷத் கான், கருணாஸ், நாசர், ஆடுகளம் நரேன், யோகி பாபு, பாபா பாஸ்கர், விஜய் வரதராஜ், பகவதி பெருமாள், ஷாரா, கருணாகரன், சபரீஷ் ராமச்சந்திரன் மற்றும் பலர் நடித்திருக்கும் படம்தான் “மீசைய முறுக்கு-2” இப்படத்திற்கு இசை, கதை எழுதி இயக்கியிருக்கிறார் ஹிப்ஹாப் தமிழா ஆதி.

இப்படத்தின் கதையைப் பொருத்தவரையில்,

1970களில் சென்னை ராயபுரத்தை சேர்ந்த  தாஸ் என்கிற (ஹிப்ஹாப் தமிழா ஆதி) கானா பாடகராக வலம் வந்து கொண்டிருக்கிறார். இந்த சூழலில் அவர் கானா பாடல் என்ற கலையை வெளியே பெரிய அளவுக்கு கொண்டு செல்ல வேண்டும் என்ற எண்ணத்தில்,  மக்கள் மத்தியில் புகழ் பெற வேண்டும் என்று நினைக்கிறார். அவருடைய இந்த ஆசைக்கு கூடவே இருந்து உதவி செய்கிறார் மனைவி சைத்ரா ஜே. ஆச்சார்.  இப்படிப்பட்ட நேரத்தில் கானா பாடலை கர்நாடகா சங்கீதத்திற்கு இணையாக கொண்டு வர வேண்டும் என்று பாடுபடும் தாஸின் ஆர்வத்திற்கு மேட்டுக்குடி மக்கள் எதிர்ப்பு தெரிவித்து கானா பாடலுக்கு இணையாக கர்நாடக இசை இருக்காது என்று முட்டுக்கட்டை  போட்டு தோல்வி அடைய வைக்கின்றனர்.

அதனால் இரண்டாவது தலைமுறையிலாவது 1990களில், கானா தாஸின் மகனான டைகர் ரவி (இரண்டாவது ஹிப்ஹாப் தமிழா ஆதி), மேடைகளில் தன் திறமையை நிரூபிக்கத் துடிக்கும் இசைக் கலைஞராக இருக்கிறார். அப்போது பிராமணக் குடும்பத்தைச் சேர்ந்த பெரிய கர்நாடக இசை வித்வான் சேஷாத்திரி மகள் ரம்யா ரங்கநாதன் கல்லூரியில் படிக்கும் போது, வீட்டை விட்டு வெளியேறி (இரண்டாவது ஹிப்ஹாப் தமிழா ஆதி) டைகர் சிவாவை விரும்பி திருமணம் செய்து கொண்டு அவனுடைய இசை ஆர்வத்திற்கு ஊக்கம் கொடுக்கிறார். ஆனால் இவர்கள் மகிழ்ச்சியாக வாழும் நேரத்தில் எதிர்பாராத விபத்தில் மனைவி இறக்க தன்னுடைய கனவை தொலைக்கிறார் டைகர் ரவி.  அதனால் மகனை வளர்க்கும் பொறுப்பு மற்றும் இசைத்துறை உள் அரசியல் காரணமாக,   ஒரு கட்டத்தில் இசையை விட்டு விலகி, அவர் தனது வாழ்வாதாரத்திற்காக அரசு பஸ் டிரைவராக வேலைக்குச் செல்கிறார். இருந்தாலும் மகன் ஜீவாவை மிகவும் கஷ்டப்பட்டு வளர்க்கிறார்.

இப்போதுள்ள காலத்தில் அதாவது (2026-ல்), கானா தாஸின் பேரனும், டைகர் ரவியின் மகனும், இளம் தலைமுறையைச் சேர்ந்தவருமான ஜீவா (மூன்றாவது ஹிப்ஹாப் தமிழா ஆதி), டிஜே-வாக வேலை பார்த்துக்கொண்டே, இசைக் கலைஞராக புகழ் பெற வேண்டும் என்ற கனவில் இருக்கிறார். தன் தாத்தா கானா தாஸ், அப்பா டைகர் ரவி ஆகியோரின் நிறைவேறாத லட்சியத்தை ஜீவா நிறைவேற்றும் முயற்சியில்  ஈடுபடுகிறார். ஜீவா தனது நண்பர்களுடன் சேர்ந்து ‘கானா’வை நவீன வடிவில் உலகறியச் செய்ய முயலும் போது, கார்ப்பரேட் இசை நிறுவனங்கள் மற்றும் பாரம்பரிய இசை ஆதிக்கவாதிகள் முட்டுக்கட்டையாக இருந்து பல தடங்கல்கள் செய்கின்றனர். ஆனாலும் அதற்கெல்லாம் பயந்து விடாமல் கானா இசைத்துறையில் சாதிக்க வேண்டும் என்ற கனவுடன் ஜீவா மேற்கொள்ளும் போராட்டத்தில் தன் தாத்தா மற்றும் தந்தையைப் போல் தோல்வியடைய விரும்பாமல்,  மூன்று தலைமுறை அவமானங்களை தனது திறமையால் உடைத்தெறிந்து வெற்றி பெற்றாரா? இல்லையா? என்பதுதான் “மீசைய முறுக்கு-2” படத்தின் மீதிக் கதை.

மூன்று தலைமுறை கானா பாடகராகவும் ஹிப்ஹாப் தமிழா ஆதியே நடித்திருக்கிறார்.அந்தந்தக் காலகட்டத்துக்கேற்ற உடைகள்,சிகையலங்காரம் ஆகியன மட்டுமின்றி உடல்மொழியிலும் மாறுபட்ட நடிப்பை வெளிபடுத்தியிருக்கிறார்.  ஒன்றுக்கொன்று வித்தியாசமான வாழ்க்கைச் சூழலுடன் மாறுபட்ட குணநலன்கள் கொண்ட மூன்று கதாபாத்திரங்களிலும் அவர் சிறப்பான பங்களிப்பைக் கொடுத்திருக்கிறார். மிகுந்த ஆர்வமுள்ள, ஒரு இலட்சியக் கனவைச் சுமக்கும் இசைக் கலைஞராக அந்த கதாபாத்திரத்தை அவர் சரியாகச் செய்திருக்கிறார்.

தந்தையாக பாபா பாஸ்கர் பொருத்தமான உணர்ச்சிகரமான கதாபாத்திரத்தில் மிக சிறப்பாக  நடித்திருக்கிறார் .தாத்தாவாக கருணாஸ் அனைவர் மனதிலும்  இடம் பெறுகிறார்.

சைத்ரா ஜே. ஆச்சார், கெட்டிகா சர்மா, ரம்யா ரங்கநாதன் என்று ஒவ்வொரு காலக்கட்டத்திற்கும் ஒரு நாயகி என்று மூன்று நாயகிகளும் தங்களது பணியை குறையில்லாமல் செய்திருக்கிறார்கள்.

ஆதியின் நண்பராக நடித்திருக்கும் ஹர்சத் கான், கருணாஸ், நாசர், ஆடுகளம் நரேன், சாரா, கருணாகரன், பகவதி பெருமாள்உள்ளிட்ட அனைவரும் தங்களுக்கு கொடுத்த கதாபாத்திரத்தை உணர்ந்து நடித்திருக்கின்றனர்.

ஒளிப்பதிவு செய்திருக்கும் பாலாஜி சுப்பிரமணியம் மூன்று வெவ்வேறு காலகட்டங்களுக்கு ஏற்றவாறு படம் முழுவதையும் கலர்புல்லாக காட்சிப்படுத்தியிருக்கிறார்.

எழுதி இயக்கி இசையமைத்திருக்கிறார் ஹிப்ஹாப்தமிழா ஆதி. கானா பாடல்களை கலை வடிவத்திற்கு இந்த  சமூகத்தில் உரிய அங்கீகாரம் கிடைக்க வேண்டும் என்ற கருத்தை மையமாக வைத்து, ஒரே குடும்பத்தின் மூன்று தலைமுறையினரின் இசையைப் பின்னணியாகக் கொண்டு இப்படக்கதையை சிறப்பாக எழுதியிருக்கிறார் ஆதி. காமெடி,  நட்பு, உணர்ச்சிகரமான காட்சிகள் என எல்லாவற்றிலும் தனது பங்களிப்பை மிக சிறப்பாக கொடுத்திருக்கிறார்.

மொத்தத்தில் ‘மீசைய முறுக்கு 2 ‘திரைப்படம் நல்ல ஒரு பொழுதுபோக்குப் படமாக இளம் ரசிகர்கள் ரசிக்கும் விதத்தில் உருவாகி இருக்கிறது.

ரேட்டிங் 3/5.

RADHAPANDIAN.