‘ஏழுகடல் ஏழுமலை’ – திரைப்பட விமர்சனம்!

சென்னை:

நிவின் பாலி ,அஞ்சலி, சூரி நடித்துள்ள படம்தான் “ஏழு கடல் ஏழு மலை”. இயக்குனர் ராம் கதை, எழுதி இயக்கியுள்ளார்.

இப்படத்தின் கதையைப் பொருத்தவரையில்,

அந்த காலத்தில் எல்லாம் வயதான பெரியவர்கள் தனது பேரன் பேத்திகளுக்கு கதை சொல்லி தூங்க வைப்பது வழக்கம். அது போல் ஒரு பெண் தனது வீட்டில் இருக்கும் குழந்தைக்கு கதை சொல்வது போல ‘ஏழு கடல் ஏழு மலை’ படத்தின் ஆரம்ப காட்சி தொடங்குகிறது.

நடிகர் சூரி பல வருடங்களாக வெளிநாட்டில் வேலை  பார்த்துவிட்டு தனது மனைவி, மகளை பார்க்க வேண்டும் என்ற ஆர்வத்துடன் தீபாவளி அன்று இரவில் ரயிலில் பயணம் செய்கிறார். ஆனால் அந்த ரயிலில் கூட்டம் யாரும் அதிகமாக இல்லை. தீபாவளி என்பதால் அனைத்து மக்களும் அவரவர்கள் ஊரில் தங்கியிருக்கும் சூழ்நிலையில் அந்த ரயிலில், நீண்ட தாடி மீசையுடன் நிவின் பாலி வித்தியாசமாக பயங்கர தோற்றத்துடன் அமர்ந்திருக்கிறார். ஆரம்பத்தில் சாதாரண மனிதராகத் தெரியும் நிவின் பாலியின் நடவடிக்கைகள் சூரிக்கு சந்தேகத்தையும் பயத்தையும் ஏற்படுத்துகின்றன. அவர் எட்டாயிரம் ஆண்டுகளாக பல பிறவிகளாக வாழ்ந்து இறப்பு என்பது தெரியாமல் தனது காதலைத் தேடிக் கொண்டிருப்பதாக சூரியிடம் சொல்கிறார்.

தான் ஒரு சாதாரண மனிதன் அல்ல என்றும், எத்தனை வருடங்களாக காதலி அஞ்சலி எங்கே இருக்கிறாள் என்பதை கண்டறிவதற்கு செல்வதாக ஒரு மிரட்டலுடன் சூரியிடன் சொல்கிறார் நிவின் பாலி.  அவரது முரட்டுத்தனமான தோற்றத்தை கண்டு சூரி முதலில் மிரண்டு போகிறார். பிறகு அவர் நிவின்பாலியிடம்  நிதானமாக பேச ஆரம்பிக்கிறார். அப்போது  நிவின் பாலியின் பேச்சில், ஒரு மனித வர்க்கத்தின் மீது பிற உயிரினம் எழுப்பும் கேள்வியாக இருக்கிறது.  ஒரு மனிதன் தனது சுய நலத்திற்காக விலங்குகளை கொல்வது, அதனை துன்புறுத்துவது போன்ற கேள்விகளை கேட்டு சூரியை  மிரட்டுகிறார். இதனால் பயந்த சூழ்நிலையில் இருந்த சூரி எப்படியாவது நிவின் பாலியிடம் இருந்து தப்பிக்க வேண்டும் என்று நினைக்கிறார்.

அப்போது தன் காதலி  அஞ்சலி பற்றியும் நிவின் பாலி  கூறுகிறார். பல ஆண்டுகளாக  காலங்கள் மாறினாலும் நாகரிகங்கள் மாறி தற்போது பலவித சூழல்கள் உருவாகினாலும் தன் காதலியான அஞ்சலியை பல பிறவிகளை கடந்து தேடிக் கொண்டிருப்பதாக சூரியிடம்  சொல்கிறார் நிவின் பாலி. நான்கு, ஐந்து தலைமுறை யாக  தன் காதலியை தேடிக் கொண்டிருக்கும் நிவின் பாலி சொல்வது உண்மையா? பல ஆயிரம் ஆண்டுகளாக நிவின் பாலி உயிருடன் இருப்பதற்கான காரணம் என்ன?  அப்படி என்றால் அஞ்சலி யார்?  என்பதை சொல்வது தான் ‘ஏழு கடல் ஏழு மலை’ படத்தின் மீதி கதை.

பல ஆயிரம் ஆண்டுகளாக வாழும் கதாபாத்திரத்தில் இறப்பு இல்லாத மனிதராக நீண்ட தலை முடி தாடியுடன் நிவின்பாலி ஒரு மாறுபட்ட தோற்றத்துடன் நடித்திருக்கிறார்.  ஒரு வித்தியாசமான உணர்வுகளை தனது நடிப்பின் மூலம் வெளிப்படுத்த முயற்சி செய்திருக்கிறார். தனது உடல் மொழியிலும் வழக்கமான முறையில் பார்க்க முடியாமல், இந்த கதாபாத்திரத்திற்காக அவர் எடுத்திருக்கும் முயற்சிகள் பல காட்சிகளில் தெரிகிறது. வித்தியாசமான உணர்வுகளை தனது நடிப்பின் மூலம் வெளிப்படுத்த முயற்சி செய்திருக்கிறார்.

சூரிக்கு முற்றிலும் மாறுபட்ட கதாபாத்திரம். குடும்பத்தின் எதிர்காலத்திற்காக வெளிநாட்டில் பல ஆண்டுகள் உழைத்துவிட்டு, தனது சொந்த ஊருக்குத் திரும்பும் ஒரு சாதாரண மனிதனாக நடித்திருக்கிறார். வெள்ளந்தியாக ,கொஞ்சம் கேலி ,கிண்டல், பயம், பதற்றம் போன்றவற்றை, மிக சிறப்பாக வெளிப்படுத்தி நடிப்பில் அசத்தி இருக்கிறார்.

கதாநாயகியாக நடித்திருக்கும் அஞ்சலி, பல்வேறு காலகட்டங்களில் வாழும் ஒரு பெண்ணாக அதற்கேற்றவாறு பொருத்தமான நடிப்பை வெளிப்படுத்தியிருக்கிறார்.

இப்படத்தின் பெரும்பாலான காட்சிகள் ஒரு ரயிலுக்குள்ளேயே நடப்பதால், அதை சலிப்பூட்டாத வண்ணம் வித்தியாசமான கோணங்களிலும் விதவிதமான ஒளியமைப்பிலும் காட்சிப்படுத்தி ஒளிப்பதிவாளர் என்.கே. ஏகாம்பரம் படம் பார்க்கும் ரசிகர்களை கவர்ந்து இருக்கிறார்.

யுவன் சங்கர் ராஜா – சந்தோஷ் தயாநிதி ஆகியோர் இசையில் பாடல்கள் கேட்கும் ரகம்தான். அதிலும் “ஏழுஏழு கடல் தாண்டி” பாடல் ரசிகர்கள் மனதில் இடம் பிடித்து இருக்கிறது. பின்னணி இசையில் காட்சிகளும், அதன் உணர்வுகளும் இப்படத்தை வேறொரு உயரத்துக்குக் கொண்டு சென்றுள்ளன.

‘கற்றது தமிழ்’, ‘தங்க மீன்கள்’, ‘பேரன்பு’, ‘பறந்து போ’ என வெற்றிப் படங்களை இயக்கிய ராம், ஒரே ரயில் பயணத்தில் நிவின் பாலி, சூரி இருவரையும் சந்திக்க வைக்கும் இந்தக் கற்பனை கதையை வித்தியாசமான முறையில் இயக்க வேண்டும் என்ற முயற்சியிலும்,  தமிழ் சினிமாவில் நிறைய காதல் கதைகள் வந்தாலும் இப்படத்தில் காதல், வாழ்க்கை, மனிதர்களின் ஆசைகள், பிற உயிரினங்களுக்கு மனிதன் செய்த கொடுமைகள் பற்றி நிவின் பாலியின் கதாபாத்திரத்தின் மூலம் கேள்வி கேட்கிறார். ஒரு மனிதன் இறக்காமல் ஐந்து பிறவி எடுத்து ஒவ்வொரு ஆயிரம் ஆண்டுக்குமான கதை சொல்லும் விதம் புதியதாகவும், புது அனுபவமாகவும் இருக்கிறது.

மொத்தத்தில், ‘ஏழு கடல் ஏழு மலை’  படம் கண்டிப்பாக ஒரு புதிய அனுபவத்தை ஏற்படுத்தும்.

ரேட்டிங் 3/5.

RADHAPANDIAN.

.