‘மூக்குத்தி அம்மன் 2’ மஹாசக்தி – திரைப்பட விமர்சனம்!

சென்னை:

நயன்தாரா, துனியா விஜய், ரெஜினா கசாண்ட்ரா, ஊர்வசி, யோகி பாபு, மைனா நந்தினி, கருடா ராம், இனியா, அபினயா, ஸ்ருதி எஸ், சிங்கம்புலி அண்ணவி, வி.ஆர்.சுவாமிநாதன், சிவகுமார் எஸ், சுனில் வர்மா இந்துக்கூரி, வர்ஷினி வெங்கட், பழ. கருப்பையா, ஆனந்த அதிஷ்ட லட்சுமி, நித்தின் சத்யா, டெப்லினா சாகி மற்றும் பலர் நடித்திருக்கும் படம்தான் “மூக்குத்தி அம்மன்-2” மஹாசக்தி. இப்படத்தை சுந்தர். சி இயக்கி இருக்கிறார். இப்படத்தின் துள்ளலான பாடல்களுக்கும், பிரம்மாண்ட பின்னணி இசைக்கும் ஹிப் ஹாப் தமிழா இசையமைத்துள்ளார்.

இப்படத்தின் கதையைப் பொருத்தவரையில்,

மூக்குத்தி அம்மன் முதல் பாகத்திற்கும் தற்போது வெளி வந்திருக்கும் படத்தின் கதைப்படி எந்த சம்பந்தமும் இல்லாமல் இது ஒரு புதிய கதையாக உருவாகி இருக்கும் படம்தான் “மூக்குத்தி அம்மன்-2” மஹாசக்தி.

சென்னையில் போலீஸ் கான்ஸ்டபிளாக இருக்கும் சக்தி என்ற நயன்தாரா கொஞ்சம் பயந்த சுபாவம் உள்ளவர். போலீஸ் நிலையத்திலிருந்து தனது வீட்டிற்கு வரும் நயன்தாரா இரவு படுத்து உறங்கும்போது அவருக்கு அடிக்கடி சில மர்மமான கனவுகள் வருகின்றன. அந்தக் கனவுகளில் மயிலாஞ்சி என்ற கிராமம் தொடர்ந்து தோன்றுவதுடன், தன் கண்முன்னே ஓடும் மாயக்குதிரை, போர்க்களத்தில் எழும் படையின் அரவம், மற்றும் புரியாத நிழல்கள் அவரை மனதளவில் வேதனைப்படுத்துகின்றன.

அவருக்குள் மயிலாஞ்சி கிராமத்தின் தேவதையான மூக்குத்தி அம்மன் அருள் இருப்பது அவருக்கே தெரியாது. இந்தக் கனவுகளால் குழப்பமடையும் நயன்தாரா, அதன் பின்னணியைத் தெரிந்துகொள்ள மயிலாஞ்சி கிராமத்தில் உள்ள போலீஸ் நிலையத்திற்கு பணிமாற்றம் வாங்கிச் செல்கிறார். அங்கு 2,000 ஆண்டுகள் பழமையான, காடுகளுக்குள் மறைந்திருக்கும் ‘மூக்குத்தி அம்மன்’ கோயில் ஒன்றை அவர் கண்டுபிடிக்கிறார். ஆனால் அந்தக் கோயிலில் மூன்று தெய்வங்கள் இருக்கின்றன. இப்போது அதில் இரண்டு தெய்வங்கள் மட்டும் இருக்க, நடுவில் இருக்கும் ஒரு தெய்வத்தின் சிலை மட்டுமே இல்லை.

இந்த சூழலில் தீய சக்தி சாத்தானின் ஆதிக்கம் பெற்றுள்ள ரெஜினா மற்றும் ரெஜினாவின் கணவர் துனியா விஜய்க்கும் இடையில் மூக்குத்தி அம்மன்  மீது 2000 ஆண்டு காலத்துப் பகை உள்ளது. அந்தப் பகை தீர்க்கப் படாமலேயே உள்ளதால் அந்தக் காலத்திற்காகக் காத்திருக்கும் அவர்கள் ஒன்பது கிரகங்கள் ஒன்று சேர்ந்து ஒரே நேர்க் கோட்டில் சந்திக்கும் போது மீண்டும் மோதுகிறார்கள். அப்போது தான் ஒரு அம்மன் என்பதை அறியாமல், தன்னை சுற்றி நடக்கும் மர்மத்தின் ரகசியத்தை அறிந்துக் கொள்ள நயன்தாரா முயற்சிக்கிறார். தீய சக்திகள் நயன்தாராவை நெருங்கும் போதெல்லாம், அவருக்குள் அறியாத சில விசித்திர அதிர்வுகளும், தெய்வீக ஆற்றலும் வெளிப்படுகின்றன. இறுதியில் மூக்குத்தி அம்மன் வடிவில் இருக்கும் நயன்தாராவை ரெஜினா மற்றும் ரெஜினாவின் கணவர் துனியா விஜய் இருவரும் இணைந்து அழித்தார்களா? தனது மூக்குத்தி அம்மன் என்ற தெய்வ சக்தியால் ரெஜினா- துனியா விஜய் இருவரையும் நயன்தாரா அழித்தாரா? என்பதுதான் “மூக்குத்தி அம்மன்-2” மஹாசக்தி படத்தின் மீதிக் கதை.

இதில் கதாநாயகியாக நயன்தாரா போலீஸ் கான்ஸ்டபிளாக இருக்கும்போது நரபலி முயற்சியைத் தடுப்பது,அம்மனாக பெரும் பழியுணர்ச்சியை எதிர்கொள்வது உட்பட எல்லா இடங்களிலும் தனது கதாபாத்திரத்தின் தன்மையை உணர்ந்து  அப்பாவியான முகபாவனைகள் மூலமும், ஆவேசமான தெய்வப் பொலிவு மூலமும் இப்படத்தின் கதாபாத்திரத்தை தாங்கி பிடித்து இருக்கிறார். “மூக்குத்தி அம்மன்-மஹாசக்தியாக  தலையில் கிரீடம், உடல் முழுவதும் ஆபரணங்கள், கையில் திரிசூலம் என நயன்தாராவின் கம்பீரமான தோற்றம் படத்திற்குப் பெரிய பலமாக அமைந்து இருக்கிறது.

இந்தப் படத்தில் நயன்தாராவுக்கு இணையாக கவனம் ஈர்ப்பவர் ரெஜினா கசாண்ட்ரா. வழக்கமான கதாநாயகி கதாபாத்திரங்களிலிருந்து விலகி, தீய சக்தியின் உருவமாக அவர் காட்டும் அசுரத் தனமான நடிப்பு அனைவரையும் ரசிக்க வைக்கிறது. அவரது ஆடை அலங்காரம், கண்களில் தெரியும் கோபம், உடல்மொழி என அனைத்தும் வில்லி கதாபாத்திரத்திற்கு பெரிய அளவில் பலம் சேர்க்கின்றன.

வில்லனாக நடித்திருக்கும் துனியா விஜய் அரசியல் அதிகாரமும் அசுர குணமும் கொண்ட கதாபாத்திரத்தில் அதிரடி காட்டி, கதையின் வேகத்திற்கு ஈடு கொடுத்து  தனது கதாபாத்திரத்திற்கு நியாயம் சேர்க்கும் வகையில் நடித்திருக்கிறார்.

தெலுங்கு வில்லன்களை நினைவூட்டும் வகையில் கருடா ராம் வந்து அச்சமூட்டுகிறார் .சுனிலின வில்லத்தனம் எடுபடவில்லை.

நயன்தாராவின் அம்மாவாக நடித்திருக்கும் ஊர்வசி,யோகிபாபு ஆகியோர் சிரிக்க வைப்பதற்கென நியமிக்கப்பட்டிருக்கிறார்கள். அபிநயா,ராமச்சந்திரா ராஜூ, சிங்கம் புலி,விச்சு விஸ்வநாத்,மைனா நந்தினி, இனியா, நிதின் சத்யா, வி.ஆர். சுவாமிநாதன்,ஆகியோர் தங்கள் வேலையை நிறைவாகச் செய்திருக்கிறார்கள்.

ஒளிப்பதிவு செய்திருக்கும் கோபிஅமர்நாத், இந்தக்கதையை நிறைய கம்யூட்டர் கிராபிக்ஸ் காட்சிகள் மூலமே வெற்றிகரமாக அமைக்க முடியும் என்பதை உணர்ந்து அதனை வண்ணமயமாக தெய்வீகக் காட்சிகளையும் சண்டைக் காட்சிகளையும் அழகாகப் பதிவு செய்திருக்கிறார்.

ஹிப்ஹாப் தமிழா ஆதியின் இசையில் பாடல்கள் அனைத்தும் அம்மன் அருளை வழங்கும் வகையில் இருப்பதோடு, பின்னணி இசை படம் பார்ப்பவர்களை அதிர வைக்கிறது.  குறிப்பாக நயன்தாரா அம்மனாக விஸ்வரூபம் எடுக்கும் காட்சிகளில் இசை மிரட்டுகிறது.

அம்மன் சம்பந்தப்பட்ட சாமி படமும் என்னால் எடுக்கமுடியும் என்பதை நினைவூட்டும் விதத்தில் எழுதி இயக்கியிருக்கும் சுந்தர்.சி. இந்தப் படத்தின் முதல் பாதியில் கதை அங்குமிங்கும் தாவிச்சென்றாலும் இரண்டாவது பாதியில்  கிராஃபிக்ஸ் அசத்தல்களின் ஆட்டம் அதிகமாக்கி ஒரு சாதாரண பெண் திடீரென்று அம்மனாக உருமாறி நல்லதை நிலைநாட்டும் ஒரு உன்னத தெய்வத்தையும் அதற்கு பொருத்தமான திரைக்கதையிலும், தமிழ் சினிமாவுக்கு ஏற்றவாறு வடிவமக்கப்பட்டு  பிரம்மாண்டமான படத்தையும் தன்னால் இயக்க முடியும் என்பதை இந்தப் படத்தின் மூலம் நிரூபித்துக் காட்டியிருக்கிறார்.

மொத்தத்தில், ‘மூக்குத்தி அம்மன் 2 – மஹாசக்தி’ – அம்மனின் அவதாரத்தை உன்னதமாக எடுத்து காட்டும் படம்.

ரேட்டிங் 3.5/5.

RADHAPANDIAN.