‘டியர்’ – திரைப்பட விமர்சனம்!

சென்னை:

ஆனந்த் ரவிச்சந்திரன் இயக்கத்தில் ஜி. வி. பிரகாஷ், ஐஸ்வர்யா ராஜேஷ், ரோஹினி, தலைவாசல் விஜய், இளவரசு, காளி வெங்கட், அப்துல் லீ, J. கமலேஷ், நந்தினி, கீதா கைலாசம், மகாலக்ஷ்மி சுதர்சனன், மற்றும் பலர் நடித்துள்ள திரைப்படம்தான் ‘டியர்’.

இப்படத்தின் கதையைப் பொருத்தவரையில்,

தனியார் தொலைக்காட்சியில் செய்தி வாசிப்பாளராக இருக்கும் கதாநாயகன் ஜி.வி.பிரகாஷ், அம்மா ரோகிணி மற்றும் அண்ணன் காளி வெங்கட்டுடன் வாழ்ந்து வரும் நிலையில், பிரபலமான செய்தி சேனலில் சேர்ந்து பணி புரிய வேண்டும் என்று ஆசைப்பட்டு, அதற்கான முயற்சியில் ஈடுபடும் நேரத்தில் ஜி.வி.பிரகாஷின் அண்ணனும், அம்மாவும் அவரை திருமணம் செய்து கொள்ள வற்புறுத்துகின்றனர். நாயகன் ஜிவி பிரகாஷுக்கு  சின்ன சத்தம் வந்தால் கூட தூங்கமாட்டார். அமைதியான தூக்கத்தை விரும்பும் அவருக்கு திருமணம் செய்துக் கொள்வதில் விருப்பம் இல்லை என்றாலும், தனது குடும்பத்தினரின் சொல்லுக்கு கட்டுப்பட்டு திருமணத்திற்க்கு ஒப்புக் கொள்கிறார்.

இந்த சூழ்நிலையில் தனியார் நிறுவனத்தில் வேலை பார்த்து கொண்டு குன்னூரில் தனது அப்பா அம்மாவுடன் வசித்து வரும் கதாநாயகி ஐஸ்வர்யா ராஜேஷை பெண் பார்க்க வரும் வரன்களிடம் தூக்கத்தில் குறட்டை விடும் பிரச்சனையை வெளிப்படையாக அவர்களிடம் சொல்லி விடுவதால் திருமணம் நடைபெறாமல் நாட்கள் செல்கிறது. ஐஸ்வர்யா ராஜேஷ் சாதாரணமாக தூங்கினாலே அவருடைய தூக்கத்தில் மிக அதிகளவில் சத்தத்துடன் குறட்டை விடும் பழக்கம் சிறு வயது முதல் இருந்து வருகிறது.

இந்நேரத்தில் குறட்டை விடும் பழக்கத்தை மறைத்து, பெற்றோர்கள் விருப்பப்படி ஜி.வி.பிரகாஷுக்கும், ஐஸ்வர்யா ராஜேஷிக்கும் திருமணம் நடக்கிறது.  ஆனால் இருவரும் கட்டிலில் ஒன்றாக படுத்து உறங்கும்போது அதிக சத்தத்துடன் ஐஸ்வர்யா ராஜேஷ் குறட்டை விடுவதைக் கண்டு ஜி.வி.பிரகாஷ் அலறி அடித்து எழுந்து விடுகிறார். இந்நிலையில் ஜிவி பிரகாஷ் நினைத்ததுபோல் பெரிய தொலைக்காட்சியில் செய்தி வாசிப்பாளராக வேலை கிடைக்கிறது. இருவரின் திருமணத்திற்கு பிறகு. ஐஸ்வர்யா ராஜேஷ் உறங்கும்போது விடும் குறட்டையால் இருவருக்கும் மிகப் பெரிய அளவில் பிரச்சனை ஏற்படுகிறது. ஒரு கட்டத்தில் சரியான தூக்கம் இல்லாததால் வேலை நேரத்தில் வந்த திடீர் தூக்கத்தினால்  ஜி.வி.பிரகாஷின் வேலை பறி போகிறது. இதனால் வாழ்க்கையில் வெறுப்படைந்த ஜி.வி.பிரகாஷ்,  ஐஸ்வர்யா ராஜேஷிடம் இருந்து பிரிந்து வாழ குடும்ப நல கோர்ட்டில் விவாகரத்து பெறுவதற்கான முயற்சியில் ஈடுபடுகிறார். ஆனால் ஐஸ்வர்யா ராஜேஷ் விவாகரத்து கொடுக்க மறுத்து விடுகிறார். இறுதியில் ஜி.வி.பிரகாஷ் ஐஸ்வர்யா ராஜேஷிடமிருந்து விவாகரத்து பெற்றாரா? இல்லையா? என்பதுதான் ‘டியர்’ படத்தின் மீதிக் கதை.

கதாநாயகனாக நடித்திருக்கும் ஜி.வி.பிரகாஷ் மிக சிறந்த முறையில் அருமையான நடிப்பை கொடுத்து அபாரமாக அசத்தியிருக்கிறார். பெரிய சேனலில் செய்தி வாசிப்பாளராக வேண்டும் என்கிற அவரது கனவு ஐஸ்வர்யா ராஜேஷ் விட்ட குறட்டையால் வீணாகி விட்டதால் அந்தப் பரிதவிப்பைத் தன் பதற்றத்தில் காட்டி நடித்திருக்கிறார் ஜிவி.பிரகாஷ். வழக்கமான பாணியில் இல்லாமல்  கதைக்கேற்றபடி சிறப்பான நடிப்பை வெளிப்படுத்தியுள்ளார் .

கதாநாயகியாக நடித்திருக்கும் ஐஸ்வர்யா ராஜேஷ் இதுபோன்ற கதாபாத்திரத்தில் தனது அனுபவ நடிப்பை வெளிப்படுத்தி விடுவார். தனது நடிப்பில் வித்தியாசம் காண்பித்து நடித்திருப்பது மிகவும் சிறப்பாக இருக்கிறது. தன் குறட்டை பிரச்சனையை தீர்க்க பல்வேறு முயற்சி செய்வது என நடிப்பில் பளிச்சிடுகிறார்.

மேலும் ஜிவி. ஜிவி.பிரகாஷின் அண்ணனாக நடித்துள்ள காளி வெங்கட், அவரது மனைவியாக நடித்துள்ள நந்தினி இருவரும் சிறப்பான நடிப்பை வெளிப்படுத்தி உள்ளனர். ரோகிணி, கீதா கைலாசம், இளவரசு, தலைவாசல் விஜய் என அனைவரும் தங்களது கதாபாத்திரத்தை உணர்ந்து மிக சிறப்பாக நடித்துள்ளனர்.

ஒளிப்பதிவாளர் ஜெகதீஷ் சுந்தரமூர்த்தியின் ஒளிப்பதிவு ஊட்டியின் இயற்கை எழில் மிகுந்த அழகை அனைவரும் ரசிக்கும்படி காட்சிபடுத்தி இருப்பது பாராட்டும்படியாக அமைந்துள்ளது.

இசையமைப்பாளர்  ஜி.வி. பிரகாஷ்குமாரின் இசையில் பாடல்கள் அனைத்தும் கேட்கும்படியாக அமைந்துள்ளது. பின்னணி இசையும்  சத்தம் அதிகம் இல்லாமல் கவனிக்க வைக்கின்றன.

2023 ஆம் ஆண்டு ‘குட் நைட்’ என்ற திரைப்படம் வெளியாகி மிகப்பெரிய அளவில் ரசிகர்கள் மத்தியில் வெற்றி பெற்றது. அந்த ‘குட் நைட்’ படத்தில் கதாநாயகனுக்கு குறட்டை வருவதால் தன் மனைவியிடம் சொல்ல முடியாமல் தவிப்பார்.  ஆனால் இந்த ‘டியர்’ படத்தில் கதாநாயகிக்கு குறட்டை விட்டு தூக்கத்தை கெடுக்கின்ற மாதிரி குறட்டை சத்தத்தை மையமாக வைத்து கதையை யோசித்த இயக்குனர் இன்னும் கொஞ்சம் கதையை மாற்றி யோசித்து இருந்தால் கண்டிப்பாக இந்த ‘டியர்’ படம் மிகப் பெரிய அளவில் வெற்றியை கொடுத்து இருக்கும். இருந்தாலும் குறட்டை சத்தத்தை மையமாக வைத்து கதையில் இருவருக்குமான அன்பான புரிதலை தீர்வாக சொல்லி அனைவரும் ரசிக்கும்படி படத்தை இயக்கியிருக்கிறார் இயக்குனர் ஆனந்த் ரவிச்சந்திரன்.

மொத்தத்தில் – இந்த ‘டியர்’ படத்தை அனைவரும் ரசிக்கலாம்.

ரேட்டிங்;3/5.

RADHAPANDIAN.