‘லக்கி பாஸ்கர்’ திரைப்பட விமர்சனம்!

சென்னை:

தீபாவளி அன்று வெளிவந்த படங்களில் வெற்றிகரமாக ஓடிக்கொண்டிருக்கும் படம் தான் ‘லக்கி பாஸ்கர்’.  இப்படத்தில் துல்கர் சல்மான் கதாநாயகனாக நடித்திருக்கிறார். அவருக்கு ஜோடியாக மீனாட்சி சவுத்ரி, மாஸ்டர் ரித்திக் மற்றும் பலர் நடித்திருக்கின்றனர். இப்படத்தை கதை எழுதியிருப்பது வெங்கி அட்லூரி.‌ இப்படத்திற்கு ஜிவி பிரகாஷ் இசை அமைத்திருக்கிறார்.

இப்படத்தின் கதையை பொருத்தவரையில்,

மும்பையில் உள்ள ஒரு வங்கியில் 1989ஆம் ஆண்டு காசாளராக பணி செய்து கொண்டிருக்கும் கதாநாயகன் துல்கர் சல்மான் தனது தந்தை, தங்கை, தம்பி மற்றும் மனைவி, மகனுடன் வாழ்ந்து கொண்டிருக்கிறார். வங்கியில் காசாளராக பணி புரிந்து கொண்டிருந்தாலும் நடுத்தர குடும்பத்தில் பிறந்ததால் தான் சம்பாதிக்கும் பணம் பற்றாக்குறையால் பலரிடம் கடன் வாங்கி விட்டு அதை திரும்ப கொடுக்க முடியாமல் பொருளாதார ரீதியாக மிகவும் கஷ்ட நிலை இருக்கிறார் துல்கர் சல்மான். கடன் தொல்லையால் வேதனைப்பட்டுக் கொண்டிருக்கும் துல்கரை  ஒரு கடன்காரன் நடு ரோட்டில் வழி மறித்து அவமானப்படுத்தி, அவரது ஸ்கூட்டரை பிடுங்கிக் கொண்டு சென்று விடுகிறார்.

இந்நிலையில் துல்கர் சல்மானின் நண்பன் வங்கியில் கடன் பெறுவதற்காக ராம்கியை அழைத்து வருகிறார். பிசினஸ் செய்வதற்காக ராம்கி கேட்கும் பணத்தை கொடுக்க முடியாத காரணத்தால் நேர்மையாக இருக்க வேண்டிய துல்கர் தவறான வழியில் ராம்கிக்கு  வங்கி லாக்கரில் இருந்த லட்சக்கணக்கான பணத்தை எடுத்து கொடுக்கிறார். இந்த சூழலில் ராம்கியுடன் இணைந்து துல்கரும், அவரது நண்பனும் எப்படியாவது பணம் சம்பாதிக்க வேண்டும் என்று முயற்சிக்கின்றனர். இந்த சமயத்தில் பங்கு வர்த்தகத்தில் பணத்தை முதலீடு செய்யும் ஒருவரிடம் துல்கருக்கு தொடர்பு ஏற்படுகிறது. இதனால் பங்கு வர்த்தக நண்பர் சொல்லுக்கு கட்டுப்பட்டு வங்கியில் உள்ள கோடிக் கணக்கான பணத்தை வர்த்தக ரீதியாக கொடுத்து உதவி செய்கிறார்.

அவர் மூலம் பங்கு வர்த்தக நுணுக்கங்களை தெரிந்துக் கொண்ட துல்கர் சல்மான் எப்படியாவது பெரிய அளவில் பணம் சம்பாதிக்க வேண்டும் என்ற எண்ணத்தில் அவருடன் இணைந்து வங்கியில் உள்ள பணத்தை எடுத்து பங்கு வர்த்தகத்தில் ஈடுபடுகிறார். இதனால் அவர்  கோடிக்கணக்கான பணத்தை சம்பாதிக்கிறார். வங்கிக்குத் தெரியாமல் பணத்தை எடுத்ததால் துல்கர் சல்மான் பல சவால்களை சந்திக்க நேரிடுகிறது. இறுதியில் அவர் சம்பாதித்த பணத்தை வைத்துக்கொண்டு பணக்காரராக வலம் வந்தாரா? இல்லையா? என்பதுதான் ‘லக்கி பாஸ்கர்’ படத்தின் மீதி கதை.

வங்கியில் காசாளர் என்ற கதாபாத்திரத்தில் கதாநாயகனாக நடித்திருக்கும் துல்கர் சல்மான், நடுத்தர குடும்பத் தலைவனாக  மாறுபட்ட முறையில் மிக அருமையாக அந்த கதாபாத்திரத்தை உணர்ந்து சிறப்பாக நடித்திருக்கிறார். வங்கியில் தனக்கான பதவி உயர்வு கிடைக்கவில்லை என்ற வருத்தத்தில், வங்கி மேளாளரிடம் கோபப்பட்டு, பிறகு அவரிடமே அழுது கெஞ்சும் காட்சிகளிலும் அசத்தலான மாறுபட்ட நடிப்பை வெளிப்படுத்தி இருக்கிறார். வங்கியில் பணிபுரியும் ஒருவன் எப்படி எல்லாம் ஊழல் செய்வானோ…அதை மிக தத்ரூபமான முறையில் உன்னதமான நடிப்பை வெளிப்படுத்தி  படத்திற்கு பலம் சேர்த்து இருக்கிறார் .

துல்கரின் மனைவியாக நடித்திருக்கும் மீனாட்சி சவுத்ரி கணவன் தவறு செய்யும்போது அதை தட்டி கேட்பதும், ஒரு கட்டத்தில் அந்தத் தவறை கேட்க முடியாமல் எதுவும் பேச முடியாமல் வாய்மூடி மௌனமாக இருப்பதும் இருவித நடிப்பை வெளிப்படுத்தி அனைவரது மனதையும் கவர்கிறார்.

முக்கிய கதாபாத்திரத்தில் நடித்திருக்கும் ராம்கி கதாபாத்திரத்திற்கு அதிக காட்சிகள் இல்லை என்றாலும் தனக்கு கொடுத்த பாத்திரத்தை உணர்ந்து மிகவும் அருமையாக நடித்திருக்கிறார்.

இந்த திரைப்படத்தில் நடித்திருக்கும் அனைவரும் தங்களுக்கு கொடுத்த கதாபாத்திரத்தில் அளவாகவும்  சிறப்பான நடிப்பை கொடுத்து கதையோட்டத்திற்கு பலம் சேர்த்திருக்கிறார்கள்.

ஜி.வி.பிரகாஷ் குமாரின் இசையில் பாடல்கள் சுமார் ரகம் என்றாலும் எடுபடவில்லை, பின்னணி இசை படத்திற்கு பலம் சேர்த்திருக்கிறது.

ஒளிப்பதிவாளர் நிமிஷ் ரவி, கதை நடக்கும் 1989 ஆம் ஆண்டை காட்சிகளில் காட்ட பெரிய அளவில் உழைத்து  இருக்கிறார். அந்த காட்சிகள் படத்திற்கு மிக அருமையாக அமைந்திருக்கிறது.

வங்கியில் நடக்கும் மோசடிகளையும் மற்றும் பங்குச் சந்தை மோசடிகளையும் மிக துல்லியமாக யோசித்து அதற்கேற்றவாறு  திரைக்கதை அமைத்து, அதன் பின்னணியில் நடுத்தர குடும்ப மக்களிடையே ஏற்படும் வாழ்க்கைப் போராட்டத்தையும் மற்றும் அவர்களது மனநிலையையும் மிக நேர்த்தியாக காட்சிப்படுத்தி வெற்றி பெற்று இருக்கிறார் இயக்குநர் வெங்கி அட்லூரி.

மொத்தத்தில், ‘லக்கி பாஸ்கர்’  படம் அனைவரையும் கவரும் என்பதில் ஐயமில்லை.

ரேட்டிங் 3/5.

RADHAPANDIAN.