‘கேங்கர்ஸ்’- திரைப்பட விமர்சனம்!
சென்னை:
சுந்தர்.சி, வடிவேலு, கேத்ரின் தெரசா, வாணி போஜன், விச்சு, மைம் கோபி, முனிஸ்காந்த், அருள்தாஸ் ஹரிஷ் பெராடி, சந்தனபாரதி, மாஸ்டர் பிரபாகர், மது சூதனராவ், ரிஷி இவர்களுடன் கவுரவ தோற்றத்தில் விமல் நடித்துள்ள படம்தான் ‘கேங்கர்ஸ்’ சுந்தர் சி இயக்கியுள்ள இப்படத்தை குஷ்பு சுந்தர் (Avni Cinemax P Ltd) தயாரித்துள்ளார்.
இப்படத்தின் கதையைப் பொருத்தவரையில்,
அரசன் கோட்டையில் உள்ள ஒரு உயர்நிலை பள்ளியின் தாளாளராக இருக்கும் மைம் கோபி மற்றும் அவரது சகோதரரான அருள்தாஸ் காவல்துறையின் துணையுடன் பலவித குற்ற செயல்களுடன் பல அட்டுழியங்கள் செய்து வருகின்றனர். அவர்களது செயல்களால் பள்ளியும், மாணவர்களும் பெரிதும் பாதிக்கப்படுவதோடு, மாணவிகள் சிலர் மாயமாகும் சம்பவங்களும் நடக்கிறது. இதனால், அங்கு நடக்கும் பிரச்சனைகள் குறித்து ஆசிரியை கதாநாயகி கேத்ரின் தெரசா காவல்துறை கமிஷ்னர் அலுவலகத்திற்கு இ மெயில் மூலம் புகார் ஒன்றை அனுப்புகிறார். அந்த புகாரின் பேரில் ரகசிய விசாரணை நடத்த காவல்துறை அதிகாரி ஒருவரை காவல்துறை கமிஷனர் இந்த ஊருக்கு அனுப்பி வைக்கிறார்.
இந்த சூழலில் ஏற்கனவே வடிவேலு அங்கு உடற்பயிற்சி ஆசிரியராக பணி புரிந்துக் கொண்டு இருக்கும் நேரத்தில் புதியதாக அந்த பள்ளியின் உடற்பயிற்சி ஆசிரியராக கதாநாயகன் சுந்தர் சி அங்கு வருகிறார். பள்ளி நிர்வாகத்தை கண்டித்து கேத்ரின் தெரசா காவல்துறைக்கு புகார் கொடுத்ததால் நிர்வாகிகளான மைம் கோபியும் அருள்தாஸும் கேத்ரின் தெரசாவை ஆசிரியர்கள் முன்னிலையில் அவமானப்படுத்துகின்றனர். புதிதாக வேலைக்கு சேரும் உடற்பயிற்சி ஆசிரியர் சுந்தர்.சி, தன் அடையாளத்தை மறைத்துக் கொண்டு வில்லன் மைம் கோபி மற்றும் அருள்தாஸ் கோஷ்டியை அடித்து துவம்சம் செய்கிறார்,
சுந்தர்.சி ரகசியமாக இந்த ஊருக்கு வந்த காவல்துறை அதிகாரி என கதாநாயகி கேத்ரின் தெரசா நினைத்துக் கொள்கிறார். ஆனால், சுந்தர்.சி காவல்துறை அதிகாரி இல்லை என உண்மை தெரிய வர அப்படி என்றால் அவர் எதற்காக அந்த பள்ளியில் உடற்பயிற்சி ஆசிரியராக சேர்ந்து மைம் கோபியையும் அருள்தாசையும் கடுமையாக தாக்குகிறார்? இதற்கு காரணம் என்ன? பள்ளிக்கு அனுப்பிய உண்மையான காவல் அதிகாரி யார் ? என்பதை காமெடி சரவெடியுடன் சொல்லும் படம்தான் ‘கேங்கர்ஸ்’.
இப்படத்தில் கதாநாயகனாக இயக்குனர் சுந்தர் சி நடித்திருக்கிறார். தனக்கு துணையாக வடிவேலுவையும் சேர்த்துக் கொண்டு தங்களது கூட்டணி வெற்றி கூட்டணி என்பதை மீண்டும் நிரூபித்து காட்டி இருக்கிறார் சுந்தர் சி. ஆக்ஷன், அதிரடி சண்டைக் காட்சிகளிலும், காதல் மற்றும் பாடல் காட்சிகளுக்குக் கூடுதல் முக்கியத்துவம் கொடுக்காமல் தன்னுடைய கதாபாத்திரத்தை உணர்ந்து நடிப்பில் அசத்துகிறார் .
பள்ளியில் உடற்பயிற்சி ஆசிரியர் கதாபாத்திரத்தில் நடித்திருக்கும் வடிவேலு, நகைச்சுவை காட்சிகளில் அனைவரையும் வயிறு வலிக்க சிரிக்க வைக்கிறார்.
இப்படத்தில் கதாநாயகியாக கேத்ரின் தெரசா நடித்திருக்கிறார். காதல், பாடல், நடிப்பு என எல்லா இடங்களிலும் ரசிகர்களை கவர்கிறார்.
சின்னத்திரை நயன்தாரா என்ற அடையாளத்தோடு வெள்ளித்திரையில் அறிமுகமான வாணி போஜன் இப்படத்தில் தனக்கு கொடுத்த கதாபாத்திரத்தை உணர்ந்து சிறப்பாக நடித்திருக்கிறார்.
கௌரவ தோற்றத்தில் சில காட்சிகள் மட்டும் நடிகர் விமல் நடித்திருக்கிறார். வில்லன் கதாபாத்திரத்தில் நடித்திருக்கும் மைம் கோபி, அருள்தாஸ், ஹரிஷ் பெராடி, காளை ஆகியோர் மிகச்சிறப்பாக நடித்திருக்கிறார்கள்.
பக்ஸ், முனீஷ்காந்த், சந்தான பாரதி, விச்சு, ரிஷி , மதுசூதன ராவ் என அனைவரும் இணைந்து நகைச்சுவையில் ரசிகர்களை சிரிக்க வைக்கிறார்கள்.
சி.சத்யாவின் இசையில் பாடல்கள் அனைத்தும் ரசிக்கும் விதத்தில் இருக்கிறது.பின்னணி இசையை மிக நேர்த்தியாக படத்தின் காட்சிகளுக்கு தகுந்தவறு சிறப்பாக அமைத்து இருக்கிறார்.
ஒளிப்பதிவாளர் இ.கிருஷ்ண மூர்த்தி படம் முழுவதையும் வண்ணமயமாக காட்சிப்படுத்தியிருக்கிறார்.
வெங்கட் ராகவனின் திரைக்கதை மற்றும் வசனம் படத்திற்கு பக்க பலமாக அமைந்து இருக்கிறது.
கதை, எழுதி இயக்கியிருக்கும் சுந்தர்.சி,மக்களைச் சிரிக்க வைப்பது மட்டுமே தனது நோக்கம் என்று செயல்பட்டு, காட்சிக்கு காட்சி சிரிக்க வைப்பதோடு, திரைப்படத்தை வேகமாகவும், விறுவிறுப்பாகவும் நகர்த்திச் செல்வதோடு, திரைப்படம் பார்க்கும் ரசிகர்களை சிரிக்க வைத்து அதில் வெற்றியும் பெற்றிருக்கிறார்.
மொத்தத்தில், ‘கேங்கர்ஸ்’ படம் வயிறு குலுங்க சிரிக்க வைக்கும்.
ரேட்டிங் 3.5/5.
RADHAPANDIAN.