’டி.என்.ஏ’ திரைப்பட விமர்சனம்!

சென்னை:

நடிகர் அதர்வா, நிமிஷா சஜெயன், பாலாஜி சக்திவேல், சேத்தன்,ரமேஷ் திலக், ரித்விகா, சுப்பிரமணி சிவா,கருணாகரன் மற்றும் பலர் நடிப்பில் வெளியாகி இருக்கும் படம்தான் “டி.என்.ஏ”

நெல்சன் வெங்கடேசன் இயக்கத்தில் வெளிவந்து இருக்கும், இப்படத்தின் கதையைப் பொருத்தவரையில்,

ஒரு பெண்ணை காதலித்து அந்தக் காதல் தோல்வி அடைந்ததாலும், காதலியின் மரணத்தாலும் அதிலிருந்து மீள முடியாமல் முழு  நேர குடிகாரனாகவே மாறி விடுகிறார் அதர்வா. ஒரு கால கட்டத்தில்  குடும்பத்தில் ஏற்படும் பிரச்சனைகளால் அதர்வா குடியை மறந்து திருந்தி வாழ வேண்டும் என்ற எண்ணத்தில் போதை மறுவாழ்வு மையத்தில் குடும்பத்தினர் அவரை சேர்க்கிறார்கள். மறுவாழ்வு மையத்தில் சேர்த்து அவரை ஓரளவுக்கு குடியில் இருந்து மீட்டு நல்ல மனிதராக வீட்டிற்குக்கு அழைத்து வருகிறார்கள். இந்த சூழ்நிலையில் அதர்வா தம்பிக்கு திருமணம் நடக்க வேண்டும் என்ற காரணத்திற்காக அதர்வாலுக்கு சிறிது மனநிலை பாதிக்கப்பட்ட பெண்ணை அதாவது நிமிஷா சஜயனை திருமணம் செய்து வைக்கிறார்கள். திருமணமாகி தனிக்குடித்தனம் செல்லும் அதர்வாவும், நிமிஷா சஜயனும் மிகச் சிறந்த தம்பதிகளாக ஒருவருக்கொருவர் புரிதலுடன் மிகவும் சந்தோஷமாக வாழ்ந்து வருகிறார்கள். ஒரு வருடம் கழித்து நிமிஷா சஜயனுக்கு மருத்துவமனையில் ஒரு ஆண் குழந்தை பிறக்கிறது. 

பிறந்த குழந்தையை பார்க்கும் நிமிஷா சஜயன், அதன் பிறகு குழந்தையை குளிப்பாட்ட எடுத்துச் சென்று மீண்டும் உறவினர்களிடம் காட்டி விட்டு நிமிஷா சஜயனின் அறைக்கு குழந்தையை எடுத்து வந்து மருத்துவர் முன்னிலையில் நர்ஸ் கொடுக்கிறார். ஆனால் அந்த குழந்தை தன்னுடையகுழந்தை இல்லை என்று மறுப்பு தெரிவித்து சத்தம் போடுகிறார். ஆனால், அது அவருடைய குழந்தைதான் என்று மருத்துவமனை நிர்வாகம் சொல்கிறது. உண்மையிலேயே நிமிஷா சஜயனுக்கு பிறந்த குழந்தை சில மணி நேரங்களில் கடத்தப்பட்டு வேறு ஒரு இடத்தில் வைக்கப்படுகிறது. தன் மனைவி சற்று மனநிலை பாதிக்கப்பட்டவர் என்றாலும் அவருடைய சொல்லில் உண்மை இருப்பதாக அதர்வாவும் உறுதியாக நம்புகிறார்.  அதன் பிறகு அதர்வா அந்த குழந்தையை டிஎன்ஏ சோதனை செய்து பார்க்க, குழந்தை தங்களுடையது இல்லை என்பதை அறிந்து அதிர்ச்சியாகிறார். தங்களது குழந்தையை கண்டுபிடிக்க களத்தில் இறங்கும் அதர்வா, தனது குழந்தையை கடத்தல் கும்பலுடமிருந்து மீட்டாரா? தனது குழந்தை ஏன் கடத்தப்பட்டது? என்ற கேள்விக்கு “டி.என்.ஏ” படம் பார்த்தால்  விடை கிடைக்கும்.

மதுவுக்கு அடிமையான இளைஞர் கதாபாத்திரம் என்றாலும் அதன் தன்மையை உணர்ந்து பொறுப்பான கணவன் மற்றும் தந்தையாக மிகப் பொருத்தமாக அனைவரும் ரசிக்கும் விதத்தில் மிக சிறப்பாக நடித்திருக்கிறார் அதர்வா. அவர் பல படங்களில் நடித்திருந்தாலும் இந்தப் படத்தில் தனக்கென்று ஒரு நல்ல கதாபாத்திரத்தை தேர்வு செய்து நடித்து இருப்பதை பாராட்டலாம். அவரது நடிப்பில் பல மடங்கு முன்னேற்றம் அடைந்து  இருப்பதை  இப்படத்தில் தெரிகிறது. இப்படம் அவருக்கு மிகுந்த நற்பெயரைப் பெற்றுத்தரும் என்பதில் ஐயமில்லை.

கதாநாயகியாக நடித்திருக்கும் நிமிஷா சஜயன்  மலையாள நடிகை என்றாலும் தமிழ் கதாபாத்திரத்தை உணர்ந்து அற்புதமாக வெளிப்படுத்தி இருக்கிறார். மனநிலை பாதிக்கப்பட்டவராக எதார்த்தமான நடிப்பை கொடுத்து அசத்தியிருக்கிறார்.

ரமேஷ் திலக், பாலாஜி சக்திவேல், விஜி சந்திரசேகர், சேத்தன், ரித்விகா,சுப்பிரமணியம் சிவா,மானசா செள்த்ரி உள்ளிட்ட அனைவரும் அவரவர் கதாபாத்திரத்திற்கு தகுந்தவாறு நடித்து இந்த படத்திற்கு பெரிய அளவில் பலம் சேர்த்து இருக்கிறார்கள்.

ஒளிப்பதிவு செய்திருக்கும் பார்த்திபன்,கதாபாத்திரங்களின் தன்மையை உணர்ந்து மிக சிறப்பாக காட்சிகளை படமாக்கி இருக்கிறார்.

இசையமைப்பாளர்கள் சத்யபிரகாஷ், ஸ்ரீகாந்த் ஹரிஹரன், பிரவின் சைவி, சஹி சிவா, அனல் ஆகாஷ் ஆகியோரது பாடல்களும், ஜிப்ரானின் பின்னணி இசையும் கதைக்கு ஏற்ப பயணித்திருக்கிறது.

கதை, எழுதி இயக்கியிருக்கிறார் நெல்சன் வெங்கடேசன். குழந்தை கடத்தலை மையமாக வைத்து மருத்துவ பின்னணி கலந்த இந்தக் கதைக்கு பொருத்தமான படத்தின் தலைப்பு வைத்து அனைத்து காட்சிகளையும் பரபரப்பாக அதிஷாவுடன் இணைந்து எழுதி இயக்கியுள்ளார். சமுதாய அக்கறை யோடு  குழந்தைகள் விஷயத்தில் நாட்டில் நடக்கும் நிகழ்வுகளைக் காட்சிப்படுத்தி அதிர்ச்சியும் விழிப்புணர்வையும் ஏற்படுத்தியிருப்பதை கண்டிப்பாக பாராட்ட வேண்டும்.

மொத்தத்தில், ‘டி.என்.ஏ’  படம் ரசிக்க வைக்கும்.

ரேட்டிங் 3/5.

RADHAPANDIAN.