’லவ் மேரேஜ்’ திரைப்பட விமர்சனம்!

சென்னை:

விக்ரம்பிரபு, சத்யராஜ், சுஷ்மிதா பட், மீனாக்ஷி தினேஷ், ரமேஷ் திலக், கஜராஜ், அருள்தாஸ் ம்ற்றும் பலர் நடித்திருக்கும் படம்தான் “லவ் மேரேஜ்” . இப்படத்தை சண்முக பிரியன் கதை எழுதி இயக்கி இருக்கிறார்.

இப்படத்தின் கதையைப் பொருத்தவரையில்,

மதுரை மாவட்டத்திலுள்ள உசிலம்பட்டியில் தனது குடும்பத்தினருடன் வாழ்ந்து வரும் விக்ரம் பிரபுவுக்கு 33 வயதாகவும் திருமணம் நடக்கவில்லை. பல இடங்களில் பெண் பார்த்தும் அது சரியாக அமையவில்லை. இதனால் வேதனை அடைந்த விக்ரம் பிரபுவிடம் அவரது உறவினர்கள் மற்றும் ஊரில் உள்ளவர்கள் அனைவரும் உனக்கு எப்போது திருமணம் என்று கேட்டுக் கொண்டே இருக்கிறார்கள். இந்த சூழ்நிலையில் ஈரோட்டுக்கு அருகில் உள்ள கோபிசெட்டிபாளையத்தில் ஒரு பெண்ணை அதாவது சுஷ்மிதாவை தனது திருமணத்திற்கு நிச்சயம் செய்ய தன் பெற்றோர் மற்றும் உறவினர்களுடன் கோபிசெட்டிபாளையத்திற்கு செல்கிறார்கள். விக்ரம் பிரபு, சுஷ்மிதாவை திருமணம் செய்ய ஒப்புக் கொண்டதால் அங்கு பெரியோர்கள் முன்னிலையில் விக்ரம் பிரபுவுக்கும் சுஷ்மிதாவுக்கும் நிச்சயதார்த்தம் நடைபெறுகிறது. நிச்சயதார்த்தம் முடிந்த பிறகு அவர்கள் உசிலம்பட்டிக்கு செல்கின்ற சூழ்நிலையில் லாக்டவுன் போட்டு 144  ஊரடங்கு உத்தரவு இருப்பதால் அந்த ஊரில் அங்கே இருக்க வேண்டிய சூழ்நிலை விக்ரம் பிரபுவின் குடும்பத்தினருக்கு  ஏற்படுகிறது.

அதனால் அந்த ஊரில் விக்ரம் பிரபு குடும்பத்தினர் தங்கி இருக்கும் போது ஒரு வாரத்திற்குள் இருவருக்கும் திருமணம் செய்து வைக்க இரு குடும்பத்தில் உள்ள  பெரியோர்கள் முடிவு செய்கின்றனர். இந்நிலையில் நிச்சயிக்கப்பட்ட பெண் சுஷ்மிதா யாருக்கும் தெரியாமல் தன் காதலன் ரியோ ராஜுடன் அந்த ஊரை விட்டு ஓடி விடுகிறார். இதனால் வேதனையில் இருக்கும் விக்ரம் பிரபுவின்  குடும்பம் அந்த ஊரை விட்டு கிளம்பும்போது மாமன் அருள்தாசால் பல பிரச்சனைகள் ஏற்படுகிறது. 33 வயதாகியும் திருமணம் செய்ய முடியாமல் தடைப்பட்டதால் என்ன செய்வது என்று புரியாமல் விக்ரம் பிரபு குடும்பத்தினர் தவிக்கின்றனர். இந்த சூழலில் விக்ரம் பிரபுவின் திருமணம் நடந்ததா? இல்லையா? என்பதுதான் “லவ் மேரேஜ்” படத்தின் மீதி கதை.

கதாநாயகனாக நடித்திருக்கும் விக்ரம்பிரபுவுக்கு மிக அருமையான கதாபாத்திரம் இது. இப்படத்தில் தனது சோகத்தை வெளிபடுத்தினாலும், அதை முகத்தில் காட்டாமல் சமாளித்து, அவரது தந்தை பிரபு மாதிரி அப்பாவித்தமான காட்சிகளில் மிகவும் சிறப்பாக நடித்திருக்கிறார். அந்த கதாபாத்திரத்தின் தன்மையை உணர்ந்து அதை சரியாகச் செய்து நல்ல வரவேற்பைப் பெறுகிறார்.

கதாநாயகியாக நடித்திருக்கும் சுஷ்மிதாபட் அழகாக இருக்கிறார். தனது கதாபாத்திரத்திற்கு தகுந்தவாறு இயல்பாக நடித்திருக்கிறார். காட்சிகள்  குறைவு என்றாலும் உடல்மொழியில்  அனைவரையும் ரசிக்க வைக்கிறார்.

இரண்டாவது நாயகியாக இருக்கும் மீனாட்சி தினேஷுக்கு படபடவெனப் பேசுகிற ஒரு துடுக்கான கதாபாத்திரம். அதற்கேற்றவாறு  நடித்து அனைவரையும் கவர்கிறார்.

சிறப்பு தோற்றத்தில் நடித்திருக்கும் சத்யராஜ், ரமேஷ் திலக், கஜராஜ், அருள்தாஸ் என அனைவரும் அளவாக நடித்து ரசிகர்களை கவர்ந்திருக்கிறார்கள்.

ஷான்ரோல்டனின் இசையில் பாடல்கள் கேட்கும் ரகம்தான். பின்னணி இசையில் அதிக சத்தம் இல்லாமல் அமைத்து இருப்பதை பாராட்டலாம்.

மதன் கிறிஸ்டோபர் ஒளிப்பதிவு செய்திருக்கிறார்.இயற்கைக் காட்சிகள் நம் கண்களுக்கு விருந்து அளிக்கிறது.

எழுதி இயக்கியிருக்கிறார் சண்முகப் பிரியன். நீண்ட நாட்களுக்குப் பிறகு இது போன்ற ஒரு குடும்ப கதையை ரசிகர்கள் ரசிக்கும் விதத்தில் கலகலப்பான குடும்ப கதையாக இயக்கியிருக்கிறார். ஜாதி ஒழிப்பு திருமணம், திருமணத்துக்கு வயது ஒரு தடையல்ல போன்ற கருத்துக்களை இப்படத்தில் பேசியிருப்பது பலருக்கு தன்னம்பிக்கையை கொடுக்கும் என்பதில் ஐயமில்லை. படத்தின் இறுதிக் காட்சியில் ஒரு நல்ல படத்தைப் பார்த்த மனநிறைவைக் கொடுத்திருக்கிறார் இயக்குனர்.

மொத்தத்தில், ‘லவ் மேரேஜ்’ குடும்பமாக சென்று பார்க்க வேண்டிய படம்.

ரேட்டிங் 3/5.

RADHAPANDIAN.