’டிரெண்டிங்’ திரைப்பட விமர்சனம்!

By Radha Pandian On Jul 20, 2025

சென்னை:

ராம் பிலிம் ஃபேக்டரி சார்பில் மீனாட்சி ஆனந்த் தயாரித்துஆனந்த் ஜி வழங்கும் டிரெண்டிங் படத்தை எழுதி இயக்கியிருக்கிறார் சிவராஜ். இப்படத்தில் கலையரசன், பிரியாலையா, பிரேம் குமார், பெசன்ட் ரவி,வித்யா போர்கியா, சிவன்யா ஆகியோர் நடித்துள்ளனர்.

இப்படத்தின் கதையைப் பொருத்தவரையில்,

தற்போது உள்ள காலகட்டத்தில் இந்தியாவில் உள்ள அனைவருமே யூடியுப் சேனல் பார்த்து சமையல் செய்யவும், ‌ உடற்பயிற்சி, நடன பயிற்சி மற்றும் பல விஷயங்களை தெரிந்து கொள்கிறார்கள். இந்த சூழ்நிலையில் கலையரசன் பிரியாலையா தம்பதிகள் தங்களது பெயரில் யூடியூப் சேனல் ஒன்றை நடத்தி வருகின்றனர். அதன் மூலம் வரும் வருமானத்தில் இருவரும் சொகுசு வாழ்க்கை வாழ்ந்து வருகிறார்கள். இந்நிலையில் ஒரு நாள் மூன்று லட்சத்திற்கும் மேற்பட்ட பார்வையாளர்களை கொண்டிருக்கும் அந்த சேனல் திடீரென்று டெலிட் ஆகிவிடுகிறது. ஒரு கட்டத்தில் வருமானம் இன்றி தவிக்கும் அவர்கள் தங்கள் வாங்கிய கடனை அடைக்க முடியாமல் தவிக்கின்றனர். அந்த நேரத்தில் அவர்களது செல்போனில் இருந்து ஒரு மர்ம‌நபர் தாங்கள் ரியாலிட்டி ஷோ நடத்துவதாகவும், அதில் பங்கேற்று வெற்றி பெற்றால் கோடிக்கணக்கில் பணம் சம்பாதிக்கலாம் என்றும் கூறுகிறார்.

அந்த மர்ம நபர் கூறிய மாதிரி டாஸ்க் என்ற பெயரில் சில கடுமையான விதிமுறைகளை கொண்ட அப்போட்டியில் கலந்து கொள்ள கலையரசன், பிரியாலையா தம்பதிகள் ஒப்புக்கொள்கிறார்கள். அந்த மர்ம நபர் சொல்லும் டாஸ்க் போட்டியில் பணத்தை வென்றால் யாரிடமும் தெரிவிக்க கூடாது என்றும் கட்டளையிடுகிறார். இந்த சூழ்நிலையில் கலையரசன் பிரியாலையா தம்பதிகள் தங்களது வீட்டிலேயே ஏழு நாட்கள் விளையாட வேண்டும் என்றும் அந்த மர்ம நபர் சொல்லும் போட்டியில் வெற்றி பெற்றால் பரிசுத்தொகை உயரும் என்றும் தோல்வியை அடைந்தால் வெற்றி பெற்ற பரிசு தொகையை இழக்க நேரிடும் என்றும் கூறுகிறார்.

கலையரசனும் பிரியாலையாவும் தங்களது பணம் தேவைக்காக அந்த மர்ம் நபர் சொல்லும் போட்டியில் கலந்து கொள்கிறார்கள். அந்த மர்ம நபர் சொல்லும் டாஸ்க்கில் கலந்துகொண்டு ஒவ்வொரு போட்டியிலும் கலந்துக் கொண்டு வெற்றியும், தோல்வியும் அடைகின்றனர். அந்த மர்ம நபர் சொன்ன போட்டிகளில் வெற்றி பெற்று சில லட்சங்களை சம்பாதித்தாலும், அடுத்தடுத்த போட்டியின் மூலம் அவர்கள் இருவரும் எதிர்பார்க்காத சில சிக்கல்களை சந்திக்க நேரிடுகிறது. ஆனால் இறுதியில் அந்த மர்ம நபர் சொல்லும் போட்டியில் வெற்றி பெற்று பணத்தை சம்பாதித்தார்களா? அல்லது‌ தோற்றார்களா? என்பதுதான் ‘ட்ரெண்டிங்’ படத்தின் மீதி கதை.

கதாநாயகனாக நடித்திருக்கும் கலையரசன் மற்றும் கதாநாயகியாக நடித்திருக்கும் பிரியாலையா இருவரும் தங்களது கதாபாத்திரத்தை உணர்ந்து மிக சிறப்பாக நடித்து ரசிகர்களிடம் வரவேற்பு பெறுகிறார்கள். கலையரனுக்கு இணையான பொருத்தமான கதாபாத்திரத்திரம் என்பதால் அதற்கு ஏற்றவாறு உணர்ச்சிபூர்வமான காட்சிகளில் தனது கண்களில் காட்டும் தவிப்பும், போட்டிக்காக விருப்பமில்லாமல் பல காரியங்களை செய்ய துணியும்போதும் நடிப்பில் அசத்தி இருக்கிறார் பிரியாலையா.

சிறிய கதாபாத்திரம் என்றாலும் பிரேம் குமாரின் நடிப்பும் திரைக்கதைக்கு பலம் சேர்த்திருக்கிறது. மற்றும் பெசண்ட் நகர் ரவி, வித்யா போர்கியா, ஷிவனயா ஆகியோர் தங்களுக்கு கொடுத்த கதாபாத்திரத்தை உணர்ந்து நடித்திருக்கிறார்கள்.

ஒரே வீட்டில் நடக்கும் கதைக்களம் என்றாலும் அதை வைத்துக் கொண்டு காட்சிகளில் வேறுபாடு காட்டி பட்த்தை மிக சிறப்பாக படமாக்கியிருக்கிறார் ஒளிப்பதிவாளர் பிரவீன் பாலு.

இசையமைப்பாளர் சாம்.சி.எஸ் இசையில் பாடல்கள் கேட்கும் ரகம்தான்., பின்னணி இசையும் படத்தின் பல காட்சிகளில் அதிக சத்தம் இல்லாமல் பலம் சேர்த்து அனைவரையும் ரசிக்க வைத்திருக்கிறது.

யூடியூப் உட்பட சமூக ஊடகங்கள் மூலம் பணம் சம்பாதிக்கும் பலர் இதற்கான பல்வேறு உத்திகளைப் பயன்படுத்துகின்றனர். நமது நாட்டில் உள்ள பலரும் யூடியூபில் தங்கள் மானம் மரியாதை மறந்து பணம் சம்பாதிப்பதற்காக எப்படி எல்லாம் தரக் குறைவாக ஈடுபடுகிறார்கள் என்பதை வெளிச்சம் போட்டு காட்டி இருக்கிறார் இயக்குனர். சில அந்தரங்க விசயங்களையும் பகிர்ந்துக் கொள்ளும் அவலங்களும் யூடியூப் சேனல் மூலம் நடந்து வருகிறது. அத்தகைய மனிதர்களுக்கு அறிவுரையாக மட்டும் இன்றி அவர்களுக்கு விழிப்புணர்வு ஏற்படுத்தும் வகையில் இப்படத்தை எழுதி இயக்கியிருக்கிறார் சிவராஜ்.

மொத்தத்தில், ‘டிரெண்டிங்’ படம் அனைவரும் ரசிக்கக் கூடிய படம்.

ரேட்டிங் 3/5.

RADHAPANDIAN.

"Trending" Movie Review News Featured